1# Tòa án bhapbini pakat glaong barau peih bruk brei thau Quyết định padang Học viện Tòa án saong peih mbang pakacah pilih ruah Thẩm phán thun 2016. Akaok taneh ia Trương Tấn Sang, akaok mban tacei pato salih bharau tư pháp Trung ương mai pataom mbaok. Học viện Tòa án hu brei bruk pato pakai, pasram megru paglaong ilamu urang jakar Tòa án; pato pakai ilamu xét xử ka dom urang jakar tư pháp; pato pakai  đại học, hadei đại học, tạo nguồn urang jakar, Thẩm phán hu chất lượng glaong, pabak bruk salih bahrau tư pháp saong mbeik drei tame dunya .  

2# Tổng cục kaya ikan (Mintri ngak nong saong patagok palei pala) bahrau peih nyaom biai taong yaom bruk khik caga siam mekre salamat ka dom kapal ikan saong urang ngak ikan tuk tuk taong chap ikan angaok tasik. Dalam thun 2015, bala di tasik pambuak tal kapal ikan tagok khang, meblah 43,5 % dom mbang bala di tasik. Lingiu makna kayua lingik tasik, daok hu makna kayua urang ngak ikan oh caik hatai sangka, yau ye: kapal ikan nao tasik atah daok lac dom sruh kapal sit, oh khik caga hu siam mekre salamat...

3# Anak bruk urang tuai Australia njaom virus Zika hu nao tapa dom tỉnh, ban ye ban raya Hồ Chí Minh, Khánh Hòa, Bình Thuận saong tỉnh Lâm Đồng, mintri Y tế hu pandar Sở Y tế Lâm Đồng paglaong bruk cảnh báo jit ruak kayua virus Zika tagok tanut ka 2. Lâm Đồng lac labik mbuan si njom mbak virus Zika kayua ban sit du lich Đà Lạt bhian raok tuai dunya mai daok, padheih padhaiy. Yau nan ye, Sở Y tế Lâm Đồng patagok bruk pasang iek dịch tễ di labik  dân cư, labik du lịch saong patagok pasang  iek urang ruak, mek darah urang ruak pandiak di dom labik hu rilo tuai du liich mai daok piah dut iek. 

4# Piah ba du lịch jeng bruk ngak mbang khang, Ủy ban bhap bini huyện Phú Quý, tỉnh Bình Thuận bahrau padang jalan patagok du lịch tal thun 2020. Tui nan, huyện pulao pataom tame bruk pachreih ba urang buh jien tame patagok dom kapul  kapal cao tốc, trung tốc piah dui katut tukvak, ngak brei panak jang meng pulao tal baoh taneh; ieu urang buh jien tame patagok dom bruk duh ka du lịch yau ye ngak pasiam jalan nao tal dom labik du lịch; parilo kapal tasik, mblang kapal haok, mblang radaih, khách sạn nhà hàng, ngak tabiak rilo janih du lịch dui pachreih tuai damuai.

5# Di sang daoh Trưng Vương, kapul urang njauk jru mek kalik kruac ban sit Đà Nẵng pambuak bruk saong dom mban ngành pambuak tal peih danakdak taom gaok, daoh tamia ngan saong kadha “ bilan Xuân ka adei – mbang yaka 4". Danakdak taduan hu bruk pachreih daong di labaih 150 labik, menuac urang dalam saong langiu taneh ia ngan saong yaom jien daong abih tih 3 tỷ 300 triệu đồng. Taong abih yaom jien saong pandap hu urang daong nan, hu ba nao daong ka labaih  5.000 urang njauk jru mek kalik kruac di ban sit Đà Nẵng.

6# Ủy ban bhap bini tỉnh Đồng Nai bahrau alin harak meyaom brei ka ong Huỳnh Ngọc Hoàng (umo 46 thun) saong ong Huỳnh Ngọc Sơn (umo 53 thun), sang daok di khu phố 4, phường Bửu Hòa, ban sit Biên Hòa, Đồng Nai kayua samar khan brei urang khik gác chắn jalan pasei thau bruk tatua Ghềnh jaleih, daong plaih hu bala tuk radaih pui mai jaik tal tatua Ghềnh.

7# Brei panuac dalam mbang họp báo  dahlau di tuk pakacah saong tuyển Iraq rah tabiak di melam 29/3 dalam vòng loại World Cup 2018 bhum châu Á, Huấn luyện viên Nguyễn Hữu Thắng ndom lac tuyển Iraq khang jang kol drei biak rilo. Min, ông saong dom anek saih di drei tuk halei jeng kham merat saong daok caga ngak ka urang mboh tatuak drei anak Iraq. 

8# Mintri Y tế, Dịch vụ xã hội saong bình đẳng Tây Ban Nha bahrau khan lac taneh ia ini hu 58 urang njom virút Zika. Taong abih dom urang ruak jeng njom virút hadei di tuk nao tal dom taneh ia daok tamuh jit ruak kayua virút Zika. Urak ini Tây Ban Nha oh ka mboh urang njom Zika halei dalam taneh ia. Tui panuac di dom urang ngak praong dang akaok gah y tế, janih jamaok ba  virút Zika di Tây Ban Nha tok hu mboh di dom labik saong kan si ba ruak.

9# Mbang ribuk khang Ka-ti (Katie) meng blaoh hu hajan praong ba tal hajan xua ngak kan kandah trak tal raidiuk bhapbini saong jalan nao mai di dom taneh ia bhum Tây Âu. Di Anh, xua praong ngak ka jaik sa ratuh mbang par njauk salih jalan atau klak par. Rilo mbaik tatua praong njauk kareik bambang. Jaik 23 labik gaok njauk tabiak cảnh báo xua ribuk. Di taneh ia Pháp daok jaik taphia nan, takik abih 60 rabau baok sang di gah Tây Bắc  lihik menyek. 5 labik hu caik dalam mức báo động "da cam," glaong yaka 2 dalam bruk báo động di Pháp. Di Hà Lan lingik jhak kayua hajan xua ngak ka yaok pluh sang njauk nao plaih di labik karei.

10# Nga daok pandar bruk iek ruak lao meng thiết bị laser mboh hu siam lagaih. Dom urang ilamu Nga brei thau trực khuẩn lao – janih ba tal ruak lao nan nyu metai tuk gaok sóng laser . Ini lac bruk biak siam njauk uan tabuan tuk iek ruak. Bruk njauk biai nan lac, pandar tia laser meda iek hu jaik abih dom janih ruak, abih di nyu nan lac dom ruak viêm. Lingiu ruak lao phổi, dom bác sĩ Nga daok pandar  thiết bị laser piah pasiam ruak yau ye ruak vẩy nến, viêm phế quản…../.