1# Đề án “Paglaong sap Việt ka uranaih mầm non, anek saih sang bac pakat sa bhum bangsa takik tukvak 2016 - 2020, pamaong tal 2025” barau hu Thủ tướng rajaei phê duyệt. Đề án kham merat tal thun 2020, hu takik abih 35% uranaih bangsa takik tal thun nao bac sang bac uranaih saong 90% uraniah bangsa takik tan thun mẫu giáo thau puac, thau vak sap Việt . Đề án hu pandar di dom labik pato mầm non, sang bac pakat sa hu urnaih anek saih sang bac pakat sa urang bangsa takik di 42 tỉnh, ban di Trung ương hu rilo bhapbini bangsa takik.

2/ Tui kuhria, dalam thun 2016, tỉnh Bạc Liêu daok peih ngak sarak brei ka bhap bini bangsa takik tui quyết định 74 di rajaei ka bruk daong taneh daok, taneh pala drak, salih bruk ngak ka 3.686 baoh sang ngan saong yaom phun jien abih tih labaih 18 tỉ đồng. Taphia di nan, Bạc Liêu daok hu daong ka 258 anek saih, sinh viên cử tuyển daok bac di dom sang bac pato pakai chuyên nghiệp dalam saong langiu tỉnh.  

3# Meng dom harei akaok bilan hè ini, jaik 800 uranaih hu mai tut angan tame mein hè di sang thiếu nhi tỉnh Sơn La ngan saong dom tan bac năng khiếu ye: cih, cầu lông, caoh blong, đàn Organ, thanh nhạc, tamia, akhan Anh…Amuk  Nguyễn Thị Hướng, Giám đốc sang thiếu nhi tỉnh Sơn La brei thau : Hè thun 2016 ini langiu peih dom bruk saong pabak ilamu dom tan bac năng khiếu, kol dahlak jeng hu dom bruk ngak hu tính chất xã hội, pachreih dom adei ngak dom bruk pahla, piah klah rabha  trach nhiem saong dom sang kan kandah dalam tỉnh. Dom bruk rah tabiak dalam tuk hè jeng lac piah dom adei pataom tame dom bruk hu makna ndung bak pato pakai glaong, plaih dom tệ nạn xã hội.

4/  Di tỉnh Thừa Thiên - Huế, gulang pariak ngak nông saong patagok palei pala VN, dhar Huế barau peih bruk alin hadaih 9/15 máy bộ đàm piah daong thông tin liên lạc ka urang taong cap ikan nao tasik, rik daong khik kajap an ninh, chủ quyền tasik pulao. Dom máy bộ đàm daok veik hu alin ka dom po kapal hu công suất 400 CV tagok, hadei di tuk dom kapal ini ngak bloh di anak tal. Dom máy daong thông tin liên lạc mbang ini hu ký hiệu VX – 1700, yaok máy yaom 28 triệu đồng.

5# Meng akaok thun 2016 tal ini, tỉnh Nghệ An taduan raok labaih  1.000.000 mbang tuai, dalam nan hu jaik 26.800 mbang tuai dunya; jien mek tame meng du lịch hu labaih 676 tỷ đồng. Tỉnh jeng daok caga dom bruk njauk ngak piah harei 8/6 ini peih pakak jalan par Vinh – Bangkok. Ini lac jalan par praong, ba mbuan lagaih ka dom bruk ngak mbang gah kinh tế, ilimo, du lịch, pabak bruk nao mai di bhapbini dua taneh ia. 

6/ Yaok rituh urang đoàn dam dara saong bhap bini huyện Kon Plông, tỉnh Kon Tum hu pala 140 phun Osaka angaok jalan meng jalan roya 24 tal danao Đắc Ke; pala 1000 phun mai anh đào di labik kabo liệt sĩ huyện saong 1000 phun bingu mban patih di labik quy hoạch gah meraong pasak hành chính huyệ. Mai hu mbaok meng avar saong kham merat hong yaok urang pala phun, saai A Hủ, bangsa Sê Đăng, sa urang dalam palei brei thau: “Hu mbaok tame var pala phun dahlak biak sambai saong biak takre. Mikva Sê đăng mboh glai quý, pala ka glai nyu hijao saong siam hadei di ini caik veik ka anek kamuan. Huyện Kon Plông urak ini daok patagok du lịch. Piah patagok hu du lịch brei pala hu phun kayau saong khik hu sambo hijao di huyện Kon Plông”

7#  Kapul Giáo hội Phật giáo tỉnh Bà Rịa Vũng Tàu saong dom phật tử di ban raya Hồ Chí Minh hu peih bruk ravang, alin 154 bồn padang ia pandar janih 500 lít, yaok ratuh paok pandap saong yaom jien abih tih labaih 200 triệu đồng ka bhapbini kathaot bhum bãi ngang xã Phước Dinh, huyện Thuận Nam, tỉnh Ninh Thuận. Bruk ngak ini piah klah rabha dom kan kandah saong bhapbini kathaot puk palei pasiam dom khut khat di mbang panidak bhang, yam tagok tani tanat raidiuk.

Patui di ini dom khau tin dunya:

8/ Yaom lac kết quả puac abih oh ka brei thau, min tui kuhria hu jaik 75% dom urang buh phiếu oh njauk hatai bruk ba tabiak lac karja Thụy Sỹ brei jien yaok bilan ka yaok rah ra meng tuk ndih tapui tal tuk metai, sa yaom jien ginup diuk rai bo oh hu điều kiện halei gam tui.

9# Dalam tuk ia xua daok trun takik di ralo labik di ban ine Pa-ri (Paris), Pháp ye rilo puk palei di Đức jeng daok dang anak bruk ia xua tagok glaong. Ia xua rah tabiak trak di quận Uên-hêm (Weilheim), bang Ba-va-ri-a (Bavaria). Karja puk palei ini njauk tabiak panuac khẩn cấp kayua hajan praong dui atah ngak dauk praong .

10/ Prang hu pandar yaok jalan pacang cakak piah khik ka vòng chung kết giải caoh mbanh vô địch châu âu 2016 hu rah tabiak meng harei 10/6 tal harei 10/6 tal di 10 mblang vận động dalam taneh ia Prang, hu siam mekre. Ini lac mbang ka 3 Prang dang tabiak peih vòng chung kết giải caoh mbanh vô địch chạu âu hadei dom thun 1960 saong 1984, min oh ka mbang halei bruk an ninh ngak ka dom urang ngak praong mboh duh hatai tal yau nan, meng hadei di bruk tấn công khủng bố haok radah di ban ine Paris bilan 11/2015, ngak ka labaih 130 urang metai./.