1/ Harei kabroi 10/4, nyaom biai urang QH chuyên trách brei panuac  tame dự án hukum padang ngak (pasiam veik). Phaok akaok QH Nguyễn Thị Kim Ngân pan akaok nyaom biai. Ni lac dự án hukum hu pok tagok di mbang nyaom ka 6, QH mbang 8. Dom asal kadha dok hu hatai sahneng karei di gauk taduan hu rilo panuac brei pasiam, pabak dahlau di tuk pok tagok mbang nyaom 7, QH mbang 8 anak tal yau dom kadha njauk rami ramik, quy hoạch padang ngak, danak dak buh jien tame padang ngak, harak adat padang ngak atau palih ruah yrang thầu song dom kadha brei hu piah ngak bruk di urang đầu tư negar langiu.   

2/ Harei kabroi 10/4, diễn đàn châu Á Bác Ngao thun 2014 ngan saong kadha “tương lai barau di châu Á: padang động lực patagok barau” hu peih tabiak di ban sit Bác Ngao, tỉnh Hải Nam, TQ. Phaok thủ tướng rajaei Vũ Đức Đam pan akaok kapul VN hu mbaok tame diễn đàn saong hu kadha phát biểu di mbang peih bruk. Dalam kadha phát biểu di drei, phaok thủ tướng Vũ Đức Đam ndom lac châu Á daok dang anak cơ hội saong sứ mệnh yam tagok khang kajap; dom nền kinh tế châu Á daok pamaong tal bruk patagok bao trùm saong khang kajap nan lac lagaih saong xu thế chung di thời đại. Dalam tukvak ini, brei patagok talei pambuak bruk dom nền kinh tế saong di dom khu vực tapa dom khuôn khổ pambuak bruk yau bhap bini ASEAN, Hiệp định pambuak bruk kinh tế taong abih khu vực (RCEP) saong dom hiệp định pablei salih tự do karei.

3/ Piah caga điện pabak ka bilan thu, tập đoàn điện lực Việt Nam hu panuac pandar dom Tổng Công ty Điện lực brei khik bruk pabak điện an toàn, ginup. Dalam nan bhian tui iek bruk phụ tải di labik drei khik iek. Pataom taong abih dom tổ máy nhiệt điện dhang, khí meng di tuk tame bilan thu, khik ginjup công suất song peih tani tanat dom tổ máy, pabak công suất song sản lượng, patom tame ngak pasiam dom thiết bị piah peih dom tổ máy nhiệt điện dhang gah barak yau  Quảng Ninh 2, Hải Phòng 2, Nghi Sơn 1 và Vĩnh Tân 2....

4/ Kapul urang QH tỉnh Cà Mau hu pasang iek bruk peih ngak sarak hukum ka bruk patrun kan kathaot tukvak 2005 – 2012 di huyện Thới Bình. Dalam dom thun tapa, bruk patrun kathaot hu huyện caik hatai, sangka, huyện hu brei 17.000 mbang baoh sang kan kathaot mesraiy phun jien ngan saong yaom jien labaih 119 tỷ đồng, tapa nan daong ka dom baoh sang kan kathaot hu phun jien piah patagok bruk ngak mbang, yam tagok patruh kathaot. Dalam 8 thun hu brei BHYT saoh ka 110.000 mbang baoh sang kan kathaot, urang joh jo, urang bảo trợ xã hội, ngan saong phun jien labaih 7 tỷ đồng. Kapul pasang iek taong yaom glaong dom bruk huyện ngak hu dalam tukvak tapa; taphia di nan caong khin huyện patui khik kajap saong kham merat ngak salah bloh dom tanut patrun kathaot.

5/ Urak ni, kayua langik tasik siam lagaih nan ye dom boh sang pala njam di BRVT jang yau dom labik karei dalam taneh ia hu njauk njam, min yaom trun khang ngak ka urang nong salih tapa phun pala karei hu kein liba jang. Tui yaom yau urak ni, urang pala njam khat labaih 500đồng sa kg. Tukvak ni dom boh sang urang nong dalam tỉnh daok salih tapa pala dom janih phun pala karei hu yaom glong jang yau amriak, tangei. 

6/ Piah patak pataom điện năng jeng yau patrun phun jien ngak mbang ka urang nông, dom blai bơm di huyện Tháp Mười, tỉnh Đồng Tháp hu salih barau công nghệ meng bơm jhul tapa bơm hút, daong patak pataom  meng 30 tal 40% điện năng pandar. Tui duk ngak nông saong patagok palei pala huyện Tháp Mười, urak ini dalam huyện hu 115 blai bơm điện brei ka bruk pruh labaih 34.000 ha padai, meblah 93% abih tih taneh, dalam nan labaih 80% blai bơm điện hu salih barau công nghệ bơm  tui jalan bơm lùa atau bơm hút, rik daong ngak brei patrun jien điện, bilan ptrun pajaih hu avar jang, khik kajap njauk lịch saong abih di nyu nan lac patrun hu yaom kaom dalam bruk ngak mbang pala drak.  

7/ Urang nong pala darang di Bến Tre dok tak klak phun darang piah salih tapa pala kruac bung klik hijao, chôm chôm, song dom janih phun mbang boh karei hu kein liba jang, kayua gaok kan knadah dalam bruk pacang caga ruak chổi rồng, sa janih jit ruak ngak khat lihik trak di angaok phun darang, oh lac di bến Tre bo dok mboh di grauk dom tỉnh, ban di bhum taneran krong CL. Di tỉnh BT urak ni hu jiak 5000 ha taneh pala darang, dalam nan hu labaih 1500 ha njom ruak chổi rồng. Ong Nguyễn Văn Khâm, Akaok kapul urang nong di huyện Chợ Lách, sa labik hu taneh pala darang rilo di abih dalam tỉnh brei thau, ruak chổi rồng tamuh song ngak khat lihik di angaok phun darang meng 6 thun dahlau, min mbaih tal urak ni bruk pacang caga dok gaok rilo kan kandah.

Patui di ini dom khau tin dunya:

8/ Ấn Độ và Campuchia barau ini hu ginum meyai ka jalan patagok saong peih praong talei pambuak bruk di dua taneh ia dalam mbang nao rivang 4 harei tal KPC di Thư ký mintri Ngoại giao Ấn Độ Anil Wadhwa. Di mbang ginum meyai, phaok thủ tướng KPC gam pan akaok mintri ngoại giao Hor Namhong hu panuac ieu Ấn Độ pasang iek buh tame ka gah ngak nông, du lịch di taneh ia, abih di nyu nan lac sangka tal bruk peih sa jalan par tapak di dua taneh ia. Taphia di nan, dua gah jeng hu sanya patagok talei pambuak bruk dalam merat pacang khủng bố dunya, tội phạm tapa taneh ia saong tệ nạn pablei salih ma túy.

9/ Gah jalan tasik Singapore song Malaysia hu peih pasram haong gauk mbang camereip ka bruk pacang cakak hóa chất sraiy rah takai tasik Johor. Jabat khik ramik jalan tasik song pabah lamnge tasik Singapore song Gah môi trường negar brei thau, bruk pasram ni piah paglaong pren ngak di dom gah chức năng 2 negar dalam bruk langyah bala kayua hóa chất sraiy dalam tuk pajeng nyu tapa eo tasik Johor.

10/ Jabat Nông lương Liên Hợp Quốc (FAO) hu caik angan ka danak dak patruh eik di khu vực Mỹ Latin tui angan di aruah Tổng thống Venezuela Hugo Chavez, Giám đốc iek gah khu vực Mỹ Latin saong Caribbe di  FAO Raul Benitez brei thau. Tui ong Benitez, aruah Tổng thống Chavez hu nao dahlau dom urang dang akaok karei angaok dunya 10 thun saong hu ba danak dak patruh eik di Venezuela jeng biak. Urak ini hu jaik 60% bhap bini Venezuela hu blei pandap mbang di mạng lưới parabha công cộng saong hu mbang tui yaom trợ giá di karja./.