Trang tin 10h30 -14h30, ngày 16/10

1 # Patui veik danak dak taom gaok cử tri dahlau di  mbang nyaom 8, Quốc hội mbang 13, harei kabroi (15/10), Akaok negar Trương Tấn Sang saong dom urang Quốc hội đơn vị bầu cử ka 1, Kapul urang Quốc hội bal raya Hồ Chí Minh hu taom gaok cử tri quận 4 bal raya Hồ Chí Minh. Pak van taom gaok, cử tri brei panuac pandik hatai ka bruk ba pandap lậu trang thiết bị di gah y tế pak ralo tuyến cơ sở ralo sang iek ruak, dua tra nan lac bruk suy thoái ka đạo đức di dom gru jru caik kein laba tagok angaok pren yava di urang ruak blaoh bruk phân biệt pasang iek meng bảo hiểm y tế saong tui dịch vụ. Dalam gah pato megru, cử tri caong khin Quốc hội pandar gah pato megru mong iek gilac hu quá tải halei oh, njauk pabak sap negar langiu tame pakat mầm non saong pakat sa halei oh, dalam tuk sap amaik menek daok ndom oh ka cambaih. Njauk mong iek gilac dom khoản rik daong mek angan lac amaik ame halar hatian. Taduan mek panuac di cử tri ka bruk tavak tavaiy dalam gah y tế saong pato megru, akaok negar mboh lac, biak di nyu daok hu ralo hạn chế ngak ka bhap bani duh hatai, Đảng saong Karja hu Nghị quyết ka salih bahrau taong abih gah pato megru, dom panuac sua tangi di cử tri hu dom urang lambaok taduan mek piah ngak bruk tapak haong dom gah chức năng, piah duah jalan langyah dalam tukvak anak tal.

2/ Dalam dom bruk di mbang nao rivang công hòa lien bang Đức, biar harei sup saong melam kabroi 15/10 tui mong VN di Berlin, Thủ tướng Nguyễn Tấn Dũng hu taom gaok tổng thống Đức Giô-a-khim Gau-cơ. Di var taduan raok thủ tướng Nguyễn Tấn Dũng, tổng thống Đức Giô-a-khim Gau-cơ ndom lac Đức tuk halei jeng iek praong bruk jhul pakhang talei pambuak bruk hu urang dang akaok saong bhap bini dua taneh ia padang, pabak tapa ralo rai rah. Dua gah njauk hatai anak bruk patagok siam di talei pambuak bruk VN – Đức saong njauk hatai patagok talei pambuak bruk di taong abih dom gah, abih di nyu nan lac chính trị, kinh tế, pato megru. Dalam tuk dua taneh ia daok pamaong tal harei pahadar 40 thun padang talei pambuak bruk di thun 2015.

Mesup harei ini 16/10, thủ tướng Nguyễn tấn Dũng saong kapul urang lambaok pakat glaong VN tabiak truh ban ine Berlin, tamat siam mekre mbang rivang cộng hòa liên bang Đức saong nao tal ban Milan, I-ta-li-a piah hu mbaok tame nyaom meyai pakat glaong Á-Âu mbang ka 10 (ieu lac ASEM 10). 

3 # Biar harei 15/10, huyện Điện Bàn, tỉnh Quảng Nam peih bruk am cuh klaak tapol ada 1.000 drei praong hu 35 harei di baoh sang amuk Hà Thị Linh daok pak palei Phong Nhị, xã Điện An. Dalam dom harei tapa, tapol ada ini hu  110 drei metai saong 150 drei karei njauk nyaom ruak, mboh nyu klaak mbang, pandiak glaong, tabiak darah. Taduan hu panuac khan, gah chuyên môn mek 3 mẫu ruak payua nao ka Pasak Thú y bhum 4, Cục Thú y dut iek. Tapa nan mboh lac, taong abih 3 mẫu ruak njauk dương tính abih ngan haong chủng vi rút cúm A/H5N1. Piah pacang cakak jit ruak pambak prong, balai thú y huyện Điện Bàn, tỉnh Quảng Nam hu pambuak bruk haong puk palei pachreih urang jakar am cuh klaak taong abih tapol ada di amuk Linh. Taphia di nan peih bruk pruh jru  pametai anek ruak, puh ramik alam môi trường, van ro saong pruh jr pametai anek ruak di labik prong.

4/ Pahadar  50 thun harei anh hùng liệt sĩ Nguyễn Văn Trỗi ndih trun ka taneh ia (15/10/1964 – 15/10/2014), melam kabroi (15/10), Thành Đoàn ban raya Hồ Chí Minh hu peih bruk pok meyaom 27 dam dara urang ngak mek hu giải thưởng Nguyễn Văn Trỗi mbang ka 7. Thun ini, giải thưởng Nguyễn Văn Trỗi daok hu jao ka dom dam dara urang ngak nan lac dom urang jakar đoàn, gam kham merat hu mbaok tame dom bruk ngak di đoàn gam lac dom kreih ginu dalam bruk salih barau kỹ thuật di dom doanh nghiệp. 

 5 # Melam kabroi (15/10), bhap bani saong urang jakar huyện Phước Long, tỉnh Bạc Liêu peih ngak prong prang bruk taduan mek Huân chương Lao động pakat sa di akaok negar alin brei ka dom urang naih gheih dalam bruk ngak meng thun 2009 tal thun 2013, rik daong tame bruk dak padang Chủ nghĩa xã hội saong khik caga palei negar.  Urak ini bhap bani urang  Phước Long hu jien mek tame labaih 33 triệu đồng sa urang sa thun, tagok jaik 15 mbang dut haong thun bahrau padang veik huyện. Tỷ lệ baoh sang kathaot di huyện trun daok tok 9% dalam puac thun dahlau.

Patui di ini dom khau tin dunya: 

6/ Mesup harei 15/10, gilang pariak TƯ HQ brei patrun yaom jien laba tal tanut biar di abih dalam tuk taneh ia ini daok kham merat jhul samar bruk pasiam veik kinh tế. Gilang pariak TƯ HQ khan lac brei patrun meng 0,25% daok 2% saong ini lac mbang cakak trun jien laba mbang ka dua dalam thun ini. Yaom laba ini samu yaom 2% bo HQ khik kajap luac 17 bilan meng bilan 2 thun 2009, tukvak tabung glaong di mbang khủng hoảng kinh tế dunya. Kaya pandap gah ngak công dalam bilan 8 di HQ jeng patrun daok 0,6% duk saong bilan dahlau nan, pacap rajaei ba tabiak paok jien kích thích jien padai pabak tame 4 tỷ 700 triệu đô la. 

7 # Dalam mbang nao rivang di Thủ tướng Trung Quốc Lý Khắc Cường tal Italia, dua gah hu mboh tangin tame harak pambuak bruk ralo gah ngan haong yaom jien tagok tal 10 tỷ đôla Mỹ. Brei panuac haong urang vak hadei di mbang ndom biai nao mai haong ong Lý Khắc Cường, Thủ tướng Italia Mat-tê-ô Renzi (Matteo Renzi) taong yaom glaong mbang rivang ini saong mong ini  lac jalan peih tabiak piah pambuak bruk di dom doanh nghiệp Italia haong dom doanh nghiệp Trung Quốc. Bruk njauk biai nan lac, dalam mbang rivang ini, Trung Quốc hu buh tabiak jaik 7 tỷ đôla piah jeng cổ đông di ralo doanh nghiệp Italia.

8/ Dalam kham merat piah patrun bruk mbuan njom mbak di jit Ê-bô-la, negar Anh jeng hu ba tabiak ngak dom quy trình pasang iek vi-rút Ê-bô-la ngan saong dom tuai damuai mai meng dom taneh ia tây Phi di mblang kapal haok Hia-thrâu – mblang kapal haok praong di abih saong hu rilo menuac sia nao mai di abih di Luân Đôn. Mintri y tế Anh brei thau, bruk nan  hu daong ka negar Anh duah mboh dom urang njom Ê-bô-la dalam 3 bilan tal kayua Anh nan lac sa labik hu rilo tuai du lịch pilih ruah piah nao tal./.