1/ Beir harei kabroi 1/4, javap jalei panuac tangi sua di Ủy ban Thường vụ Quốc hội, Akaok mintri y tế Nguyễn Thị Kim Tiến hu ndom tal dom jalan ngak piah pasiam bruk patrun y đức di dom urang kajar, công chức, viên chức gah y tế. Javap chalei panuac tangi sua ka bruk iek lap urang ruak BHYT di rilo sang iek ruak công lập, Akaok mintri y tế  Nguyễn Thị Kim Tiến brei thau:  

“Khoal hulin njauk hatai song dom urang QH ka bruk daok ngak ka bhap bini pandik hâti nan lac bruk iek lap gah ini, iek praong gah deih. Dalam tukvak anak tal, brei iek praong urảng ruak yau gauk. Meyah oh ngak yau nan,  BH oh mbaoh tangin pambuak bruk song dom sang iek ruak song yau nan oh meda hu urang ruak. Song meyah oh hu urang ruak ye sang iek ruak hu piah ngak hagait. Taphia di nan, piah patrun thủ tục kan kandah, khoal hulin brei salih bahrau, pásiam patagok tong abih khoa iek ruak ka urang ruak piah pabak ka urang ruak BH, trun meng 9  chữ ký di Bảo hiểm xã hội trun dok 6 chữ ký

2/ VN pachreih tui bruk paglaong labik dang di hukum dalam talei pambuak bruk saong dak padang bhap bini ASEAN". Nan lac panuac ndom di thứ trưởng mintri ngoại giao Hồ Xuân Sơn dalam nyaom ginum meyai mbang ka 3 ka bruk mbeik drei tame ASEAN tapa adat hukum ngan saong kadha “Cộng đồng kinh tế ASEAN” rah tabiak harei kabroi ¼. Nyaom ginum meyai ini hu labaih 100 urang lambaok nan lac dom urang ngak praong rajaei, học giả, chuyên gia gah hukum di 10 taneh ia ASEAN saong lambaok dom viện ruah duah dunya di 20 taneh ia angaok dunya hu mbaok tame.

3/ Pandiak gam gam rilo bilan tapa ngak ka rilo tỉnh di gah kreik negar laik tame thu lagu trak.

Di dom huyện gah bhum ceik tỉnh Quảng Trị, rilo taneh phun pala dok kurang ia pruh trak. Di huyện bhum ceik Hướng Hóa, pandiak bhang dui atah dom bilan ni mai ngak ka rilo taneh pala cà phê dok dalam tuk tabiak bingu njauk thu layau. Tong abih huyện hu 4.700 ha cà phê, urak ni yaok rituh ha cà phê dok metai thu

4/ Di tỉnh Quảng Nam, hajan dalam bilan 3 meng bloh tok hu labaih 20% ia duk saong thun dahlau. Meyah dalam dom harei tal langik daok pandiak, meda hu jaik 11.000 ha padai saong njam patam di dom puk palei dalam tỉnh njauk pandiak bhang. UB bhap bini tỉnh Quảng Nam hu brei panuac ka dom sang mac điện Sông Tranh 2, Đắk Mi 4, A Vương peih ia brei ka bruk pala drak, taphia di nan ba tabiak jalan ngak piah kuhria caga phun jien brei ka bruk pacang cakak pandiak bhang.

5/ Beir harei kabroi, di huyện Đạ Hoai, tỉnh Lâm Đồng  rah tabiak hajan patau gam song hangin ribuk dui atah labaih 30 minite ngak khut khat biak rilo. Hangin ribuk ngak ka tong abih huyện lihik điện dalam rilo tukvak, 86 boh sang par tabung, yaok pluh ha phun pala jaoh jaleih.

6/ Harei kabroi ¼, thành đoàn ban raya HCM peih bruk pataom iek veik bilan dam dara thun 2014 ngan saong kadha “dam dara dak padang văn minh đô thị”. Dalam bilan dam dara, thành đoàn hu peih bruk hướng nghiệp saong ba bruk ngak ka labaih 130 ribau dam dara; ngak salah bloh labaih 120 công trình dam dara pambuak saong dak padang văn minh đô thị, khik caga môi trường… 15 kapul dam dara hu ilamu glaong hu nao tal 10 xã padang ngak palei pala barau piah hu mbaok tame bruk tacei pato salih barau athur raong, phun pala, dom ilamu ngak nông công nghệ glaong saong padang ngak 15 baoh sang anit ranam di huyện Nhà Bè saong Cần giờ saong yaom jien abih tih nan lac 600 triệu đồng.

7/ Jit cúm menuk ada daok patrun, dalam 2 adit tapa dalam negar oh tamuh sruh jit ruak bahrau halei. Nan lac khau tin hu ba tabiak di mbang nyaom mban tacei jalan pakat negar pacang caga jit cúm menuk ada rah tabiak beir harei kabroi 1/4. Urak ni dalam negar dok 13 sruh jit ruak. Tong abih menuk ada njom ruak song ba nao am cuh klak jiak 15.000 drei. Gah y tế hu tacei jalan ka bruk pacang cakak jit cúm H7N9 di angaok anek menuac, tagok bruk pasang iek song tui iek labik ruak yau pruh jru pametai anek ruak, kreih pambah mbang dom darak pasa pablei salih menuk ada duik, pathau khan bruk pacang caga vi rút H7N9 ka menuac urang.

Patui di ini dom khau tin dunya:

8/ Tukvak tapa, rajaei Lào gam gam patabiak dom jalan ngak piah patagok jien mek tame kadung jien karja, pasiam dom kan kandah gah kinh tế jien padai saong ba tabiak jaslan ngak 6 bilan akaok thun ini mek hu 40% bruk ba tabiak dalam thun. Makna di bruk mek tame kadung jien karja Lào oh ngak hu nan lac kayua bruk patagok suai di gah ngak nông, pablei khoáng sản tabiak negar lingiu, pala phun công nghiệp daok takik. Rajaei Lào ba tabiak bruk mek jien tame kadung jien karja thun ini (2013-2014) nan lac 3 tỷ 100 triệu đô la Mỹ

9/ Yaom jien pablei salih nao mai di Trung Quốc song Liên minh châu Âu meda hu jiak 1 ribau tỷ đô la Mỹ dalam thun 2020. Nan lac panuac khan di akaok negar TQ Tập Cận Bình dalam harak ndom puac di ban raya Bru-gơ (Bỉ)  dahlau di tuk tamat mbang nao rivang Châu âu. Akaok negar TQ Tập Cận Bình jeng hu tong yaom glong talei pambuak bruk jien padai di TQ song Liên minh châu Âu nan lac biak prong./.   

10/ Công ty pablei rai Aeon di NB hu pablei phol thông minh yaom lap pandar mạng viễn thông oh talei meng harei 4/4 ngan saong yaom jien lap jang meteh duk saong dom hãng viễn thông praong dang akaok karei karei. Aeon tui kuhria meda pablei 8.000 phol thông minh Nexus, kayua doanh nghiệp ngak pandap điện tử blei pandar  LG Electronics (Hàn Quốc) saong hãng pabak dịch vụ ruah duah thông tin tapak Google Inc. (Mỹ) patagok, di 170 labik tame mạng./.