1/ Harei kabroi, ¾ di Phủ Chủ tịch, akaok negar Trương Tấn Sang hu taduan ong Hur Nam Sik, Thị trưởng ban raya Busan dok ba  akoak kapul Doanh nhân, urang ilamu Hàn Quốc mai rivang song ngak bruk di VN. Di var taduan raok, akaok negar hu panuac caong rajaei HQ, ban Busan dong ka bhap bini VN dok di HQ ba drei tame raidiuk pak nan song ndom lac rajaei VN halan hatain dong ka DN urang HQ ngak bruk di VN yau di angaok taneh ia di drei.

2/ Biar harei ¾, ngak bruk saong urang dang akaok tỉnh Đồng Tháp ka Đề án padang ngak veik gah ngak nông tỉnh tal thun 2020, pamaong tal thun 2030, phaok thủ tướng Vũ Văn Ninh caong khin tỉnh ĐT brei pambuak quy hoạch di tỉnh saong quy hoạch di bhum, di dom mintri, dom gah di TƯ piah padang ngak veik gah ngak nông. ĐT brei ngak ka pasiam đề án piah pok tagok rajaei brei peih ngak, piah mek hu bruk patagok gah ngak nông 4,5% yaok thun dalam tukvak 2011-2015 saong 5% yaok thun tukvak 2016-2020.

3/ Tal urak ni, Liên đoàn Lao động ban Đà Nẵng hu dong ka 5000 urang ngak dok pah sang trọ hu blei điện yaom lap, 993 đồng/ kwh.. Tui nan urang ngak pah sang trọ, yaok 4 urang hu kuhria lac sa boh sang, hu kuhria yaom pablei rai điện pandar. LĐLĐ ban raya pambuak bruk song công ty Điện lực Đà Nẵng song po sang trọ tut angan tame oh tagok yaom jien điện di urang ngak daok pah sang, piah khik caga quyền lợi ka urang ngak.

4/ Hadei di sa tukvak joa lange, meteh melam harei kabroi ¾, labik thủy điện Sông Tranh 2, huyện Bắc Trà My, tỉnh Quảng Nam rah tabiak tra sa mbang megei baoh taneh tatuan khang, ngak ka bhap bini labik thủy điện oh ndih hu. Tapa số liệu brei thau di dom blai, pasak dut iek bruk megei baoh taneh hu langyah saong khan lac, mbang megei baoh taneh angaok nan rah tabiak di 21 tuk 48 minit, khang 3,4 độ Richter, dalam jaik 5km. Ini lac mbang megei baoh taneh hanjul saong oh hu khat lahik. Min, kayua pasak labik megei nan nyu kaoh, jaik 5km min,  nan ye mbang megei baoh taneh nan nyu ngak brei tatuan mbaok haluk saong ralo bhap bini meda thau hu.

5/ Pandiak bhang dui atah ngak ka ia hijan di rilo labik dalam dom tỉnh Bình Thuận, Ninh Thuận song Tây Nguyên hu dom labik ia hijan trun 90% dut song tukvak ni thun dahlau. Dalam tuk nan, halau ia khik piah di dom danao ia bahrau hu meng 60 tal 70% dung tích thiết kế. Ia njom mbak rah tabiak ngak kan kandah tal bruk pala drak song bruk ngak mbang ngak huak di bhap bini gah ala krong Vu Gia-Thu Bồn (Quảng Nam), labik tapen tasik gah pai di bhum taneran krong CL, abih di nyu nan lac pandiak bhang trak rah tabiak di tỉnh Hậu Giang. Urak ni, mintri ngak nong song patagok palei pala brei 3 kapul ngak bruk nao tui iek song tacei pato bruk pacang caga pandiak bhang di Trung bộ, Đông Nam bộ song Tây Nguyên.

6/ Harei kabroi ¾, di ban sit Cần Thơ, mban khik ramik dự án khik caga pren yava urang gila saong uranaih di mintri y tế hu peih nyaom meyai peih bruk ngak thun 2014 ka gah y tế 63 tỉnh ban dalam taneh ia. Dalam nyaom meyai, ralo urang lambaok dalam taneh ia saong dunya hu ginum meyai ka jalan ngak pasiam kan kandah dalam bruk peih ngak dom kadha di thun 2014 di dự án khik caga pren yava urang gila saong uranaih. Taphia di nan ba tabiak bruk ngak hong gauk nan lac patagok bruk iek glang pren yava urang gila, piah ka bhap bini hu iek glang pren vaya gila mbuan lagaih di abih, samar di abih saong chất lượng siam di abih; hu mbang tui dom sarak di karja ka bruk iek glang pren yava urang gila.

7/ Meng harei 21 tal harei 25/4 anak tal, di sang iek ruak Răng Hàm Mặt Trung Ương ban raya HCM, kapul bilac draih cambuai klao VN (Operation Smile Vietnam) peih danak dak bilac draih brei saoh ka uranaih song dam dara uranaih VN njauk mbaih cambuai. Dom urang hu daong blac raih nan lac dom urang mbaih cambuai dok di ban raya HCM song dom tỉnh jiak taphia.. Urang ruak hu dong tong abih yaom jien bilac draih, jru, dom janih y tế karei karei , song hu dong jien radaih nao mai, mbang menyum dalam tuk vak dok ndih iek ruak. Labaih 24 thun peih ngak di VN, kapul bilac draih cambuai klao VN hu bilac draih siam ka 20.000 uranaih njauk mbaih cambuai song dom dị tật hàm mặt karei dok grauk labik dalam negar.

Patui di ini dom khau tin dunya:

8/ Diễn đàn QP Mỹ-ASEAN hu peih tabiak di Ha-oai  harei kabroi ¾ (tui mong VN) hu mbaok di urang dang akaok bol bala dom taneh ia ĐNA, dalam nan hu akaok mintri QPVN Phùng Quang Thanh. Ini lac mbang camereip di abih diễn đàn ini hu peih tabiak, brei mboh labik dang praong di ASEAN dalam bruk tái cân bằng di Mỹ tapa châu Á – Thái Bình Dương saong jeng lac tukvak piah patagok talei pambuak bruk di dom gah.

9/ Lingiu bruk ginum biai mbang 5 ka Hiệp định pablei salih tự do di VN song Liên minh Hải quan (dalam nan hu Nga, Belarus, Kazakhstan), harei 3/4, di ban raya Almaty, dom DN dalam kapul ginum biai di VN hu var tom gaok song dom DN mbiah song sit di Kazakhstan piah ginum biai klah rabha khau tin song duah thau ka bruk patagok, jalan pambuak bruk song gauk dalam tukvak anak tal. DN Kazakhstan tong yaom glong dom jalan pambuak bruk bo VN caik ka Liên minh Hải quan tukvak tapa.

10/ Dom urang ngak praong gah Y tế TQ harei kabroi ¾ hu panuac lac hu gac 2 urang njom vi-rút cúm H7N9. Yau nan, kuhria meng akaok thun tal ini, TQ hu duah mboh gilac 130 urang njom vi-rút cúm H7N9 di menuac, dalam nan 38 urang metai./.