1/ Thủ tướng rajaei bahrau tacei pato dom jalan jhul patagok bruk pablei tabiak negar langiu kaya nong, kaya ikan song pandap mbang VN tame darak pasa Singapore. Thủ tướng rajaei jao ka mintri ngak nong song patagok palei pala dang tabiak ginum biai, mbaoh tangin tame harak sanya pambuak bruk pablei salih gah kaya nong, kaya ikan, ngak bruk song  Cục dut iek Động - Thực vật song hacih saat pandap mbang Singapore piah patagok talei pambuak bruk, piah jhul patagok bruk pablei tabiak negar langiu dom janih pandap kaya nong, kaya ikan song pandap mbang di VN tame darak pasa Singapore.

2/ Tỉnh Quảng Ngãi meda palih ruah đơn vị tư vấn dalam taneh ia piah quy hoạch huyện pulao Lý Sơn. Nan lac panuac khan kayua akaok UB bhap bini tỉnh Quảng Ngãi ba tabiak dalam mbang họp barau ini piah taong yaom bruk kinh tế xã hội 9 bilan akaok thun 2015 di tỉnh Quảng Ngãi. Meng ini mbiah tal puac thun, tỉnh Quảng Ngãi daok pasang iek dom adat hukum saong padang dom sarak mbuan lagaih, peih tabiak jalan lagaih di abih ka dom gah đầu tư. Ndom ka quy hoạch huyện pulao Lý Sơn, ong Trần Ngọc Căng, akaok UB bhap bini tỉnh Quảng Ngãi brei thau:

“Quy hoạch patagok huyện pulao Lý Sơn ye ini lac huyện pulao tiền tiêu, sarak di UB bhap bini tỉnh lac daa gah đầu tư dalam taneh ia, nan lac dom urang tư vấn quy hoạch dalam taneh ia piah peih ngak quy hoạch. Ngan saong huyện Lý Sơn lac oh praong, taneh sit min praong gah an ninh quốc phòng saong lac pulao tiền tiêu di tỉnh Quảng Ngãi”.

          3/ Khik kajap darak pasa meng kan, patagok hu chất lượng pandap panda, langyah samar bruk di darak pasa…, nan ye 25 DN pablei tabiak negar langiu kaya ikan di tỉnh Bạc Liêu hu ngak tabiak song pablei tabiak negar langiu labaih 36.000 tấn kaya ikan dom janih, dalam nan hadang liar hu 35.300 tấn, rilo jang 16% dut song tuk vak ni thun dahlau. Ni lac thun tỉnh Bạc Liêu hu sản lượng kaya ikan pablei tabiak negar langiu rilo di abih kuhria meng dahlau mai.

4/ Urang kamei metian hu quyền padeih hợp đồng ngak bruk. Ini lac asal kadha barau dalam nghị định 85/2015/NĐ-CP tacei tabiak cambaih laih dom paka di mintri hukum ngak bruk ka sarak ngan saong urang ngak lac urang kamei. Hu ba tabiak ngak tui meng harei 15/11/2015, urang ngak lac urang kamei metian meyah hu xác nhận di labik iek ruak hu thẩm quyền ka bruk lac meyah daok ngak bruk meda ngak jhak tal anek kamar ye hu quyền eng drei peih atau tạm hoãn hợp đồng ngak bruk.

          5/ Di ban sit Nha Trang, Cục khik ramik iek ruak mintri Y tế bahrau peih bruk pato pasram “ Patagok bruk iek ruak pandiak tabiak ruak Dengue song bac megru ilamu meng bruk urang metai kayua pandiak tabiak darah” ka 135 urang jarka y tế di 3 tỉnh dok hu urang ruak pandiak tabiak darah tagok samar nan lac Khánh Hòa, Lâm Đồng song Đắk Lắk. Di mbang pato pasram, dom urang jarka y tế hu bác sỹ di sang iek ruak Nhi đồng 2, sang iek ruak Nhiệt đới ban raya Hồ Chí Minh tacei pato dom kadha ka ruak pandiak tabiak darah. Hadei di tuk hu pato pasram, dom urang jarka y tế mai veik palei meda tacei veik hu bruk pacang caga song iek ruak pandiak tabiak darah ka dom urang jakar y tế di labik di drei.

6/ Meng akaok thun tal jaik kreih bilan 9, tỉnh Ninh Thuận hu jaik 50 urang njauk ruak pandiak tabiak drah. Urak ini ruak pandiak tabiak drah rah tabiak di 5/7 huyện, ban dalam tỉnh; rilo meng mboh di dom huyện Ninh Phước, Thuận Nam. Anak bruk ini, pasak y tế dự phòng tỉnh Ninh Thuận hu pambuak bruk saong dom puk palei samar pruh jru pametai anek ruak, pathau khan ka bhap bini thau jalan pacang cakak, ngak hacih saat labik công cộng, tame bruk palahik jamuak, lăng quăng pak di sang, pacang cakak jit ruak.

7/ Urak ni, di dom sang iek ruak uranaih di ban raya HCM hu mboh oh lac ruak pandiak tabiak darah dok tagok bo ruak tangin takai cambuai jeng dok tagok khang, dalam nan hu rilo urang ruak trak. Tui pasak y tế dự phòng ban raya, kuhira meng akaok thun tal ni, ban raya hu jiak 10.000 urang ruak pandiak tabiak darah, rilo jang 76% dut song tuk vak ni thun 2014. Urang ruak tangin takai cambuai dalam ban raya nan lac 5.400 urang. Bruk njauk biai nan lac meng bilan 9 tal bilan 11 lac tuk tabung glong ka 2 dalam thun di ruak tangin takai cambuai.

Patui di ini dom khau tin dunya:

8/ Pasak ruah duah VN Việt Nam saong ASEAN di Viện Viễn Đông - Viện Hàn lâm Khoa học Nga (RAN) hu yaih khan harak ilamu, tapuk duah thau “VN harei ini”. Hatai sahneng ngak tabiak baoh tapuk nan hu meng sa thun dahlau kayua dom urang ilamu pasak ruah duah VN saong ASEAN ba tabiak. Tiến sĩ sajarah dak rai Cô bê lép lac urang tacei pato gam saong 24 tác giả dang akaok di Nga ka VN ngak tabiak.

           9/ Hàn Quốc song Triều Tiên hu ba brei ka gauk angan dom urang calah gauk gar dalam mesruh metak Triều Tiên meda hu mbaok dalam mbang taom gaok anak tal. Hadei di tuk duah thau cambaih laih dom urang gauk gar dok duik song cong khin taom gaok gauk, tui kuhria dalam harei 8/10 anak tal, 2 gah hu ba brei ka gauk harak angan puac di abih di yaok gah hu labaih 100 urang hu mbaok dalam mbang taom gaok . labaih 66.000 urang HQ, rilo meng lac dalam umo 80 tal 90 thun, cang hu taom gaok gauk gar daok daok di Triều Tiên.

          10/ Hadei dom harei ba chreih chrai ka ban Munich di Đức, harei pataom bia Óc-to-bơ-phét dane angan dunya hu tamat bloh di harei 5/10. Yaom lac mbang peih tabiak ini, lac mbangka 182 min jeng yau yaok thun, harei pataom bia Oc-to-bơ-phet thun ini jeng daok lac harei pataom chreih chrai, pachreih tal 6 triệu tuai damuai meng grap labik angaok dunya mai hu mbaok. Hu 6 triệu tuai damuai hu mbaok tame, harei pataom bia Munich thun ini pablei hu labaih 7 triệu lít bia, ralo tuai damuai mai meng Ôxtrâylia, Bỉ, Braxin, Mỹ daok cắm trại di dom labik dalam ban piah hu ba drei tame bruk chreih chrai di harei pataom./.