# Thủ tướng Raja-ei bahrau mboh tangin brei ngak dom bruk di Dự án “Jhul pakhang quyền di urang jaoh jo Việt Nam” kayua Jabat Patagok Dunya Hoa Kỳ daong brei. Dự án hu peih ngak dalam 5 thun (2016 - 2020) pak Mentri Lao động - Thương binh saong Xã hội saong dom tỉnh: Thái Bình, Thừa Thiên - Huế, Quảng Nam, Bình Định, Bình Phước, Tây Ninh, Đồng Nai ngan haong yaom jien abih tih labaih 21 triệu USD. Dự án ini peih paglaong pren diuk rai độc lập, ba mbuan lagaih ka urang jaoh jo ba drei tame dalam rai diuk; pasiam sarak, hukum, peih ngak siam dom jalan ngak, bruk ngak daong ka urang jaoh jo.

          #/ Ủy Ban bhap bini tỉnh Bình Định bahrau brei harak chứng nhận đăng ký đầu tư ka dom urang buh jien tame ngak dự án du lịch prong  di ban Quy Nhơn. Tal tuk vak ni, dalam tỉnh Bình Định hu labaih 500 dự án phun jien đầu tư dalam negar, abih tih yaom phun jien đăng ký 80 ribau tỷ đồng song 59 dự án đầu tư tapak di negar langiu, phun jien đăng ký labaih 1, 7 triệu đô la Mỹ. Ong Hồ Quốc Dũng, Akaok UB bhap bini tỉnh Bình Định brei thau: Tuk bo khol hulin dui pachreih hu dom labik praong dang akaok, nyu ngak jeng pren pambak biak prong. Nan ye hadei di tuk FLC tame ye urak ni khol hulin hu rilo dự án bahrau, dalam nan hu dom urang đầu tư dalam song langiu negar, hu dom tập đoàn biak prong di negar langiu jeng hu buh jien tame ni, yau tập đoàn di Singapore.

# Pak tỉnh Phú Yên, dalam tuk ralo palei oh hu labik praong thik raih anek athur atau hu min oh siam ka môi trường, ye pak huyện bhum ceik Sông Hinh padang ngak hu siam labik praong thik raih anek athur tui jalan khép kín, tuk akaok mereip mboh hu siam lagaih. Dahlau diah, tuk oh ka hu labik praong thik raih, 12 baoh sang ngak mbang gah thik raih pak bal sit Hai Riêng bhian thik raih pabui, limo pak sang nan ye oh siam ka môi trường bo daok ngak srau dhau tal rai diuk di bhap bani dalam palei. Urak ini taong abih hu tame labik thik raih ini kayua huyện buh jien tame padang ngak. 

          #/ Tui Sở Công thương tỉnh Đồng Nai, dalam tỉnh hu jiak 80 darak pasa tamuh eng song yaok rituh labik pablei salih meblah abih jalan nao mai. Labik hu rilo pasa, labik pablei salih tamuh eng rilo di abih bhian mboh di  ban Biên Hòa, huyện Long Thành, Trảng Bom lac labik hu rilo công nhân, urang ngak. Anak meta mboh lac, di dom pasa tamuh  eng di ĐN bhian rah tabiak bruk gar jalan. Pandap mbang menyum oh hacih saat, hareik harom bak jalan ngak jhak tal alam môi trường.

# Pasak Y tế dự phòng tỉnh Tiền Giang brei thau, tal akaok bilan ini, dalam tỉnh hu jaik 600 urang njauk ruak pandiak tabiak darah, rilo jang 234% dut haong tukvak ini thun dahlau. Anak bruk tagok samar di ruak pandiak tabiak darah, gah y tế tỉnh daok peih bruk pacang caga ruak pandiak tabiak darah; jak ba bhap bani peih ngak saong khik bruk pametai anek lăng quăng dalam tỉnh. Amuk Nguyễn Thị Nương, Akaok Balai Y tế xã Quơn Long, huyện Chợ Gạo – labik hu ralo urang njauk ruak pandiak tabiak darah pak tỉnh Tiền Giang lac:

           Dalam bruk ini, Balai y tế  nyaom mban tacei pato saong parabha bruk ka dom thành viên, pataom tame bruk pathau khan. Pathau khan tapak ka bhap bani thau  hu dom jalan pacang caga ruak pandiak tabiak darah, pataom tame bruk pametai anek lăng quăng.

          #/  Tỉnh Sóc Trăng peih nyaom biai Pataom iek veik danak dak pakat negar ka bruk ngak, pato bruk ngak song patrun kan kathaot tuk vak 2011-2016 dalam tỉnh. Dom thun jiak di ni, danak dak pakat negar ka bruk ngak, pato bruk ngak saong patrun kathaot hu daong pato bruk ngak, ba bruk ngak, dak harei dak paglaong jien mek tame ka urang ngak, tani tanat rai duik, jhul patagok KTXH di tỉnh Sóc Trăng, abih di nyu nan lac boh sang ka, boh sang urang bangsa takik song bhum palei pala di tỉnh.

# Huyện pulao Phú Quốc, tỉnh Kiên Giang daok tame tukvak tabung glaong bilan pandiak bhang. Bruk thu lagu, pandiak khang dui atah saong thu aia ngak ka labaih 37.000 ha taneh glai angaok pulao ini mbuan khuah pakat 5, pakat biak nguy hiểm. Ong Huỳnh Long Hải, Akaok Hạt Kiểm lâm huyện Phú Quốc brei thau, langik pandiak, thu lagu dui atah ya hatai saneng ka bruk pandar apui yaok harei, cuh hamu cuh apuh, mblang harek raong glang athur di bhap bani oh ka glaong meda ba tal khuah glai.

Patui di ni dom khau tin dunya: :

#/ Labaih 200 urang nhập cư suan adat bahrau hu Hy Lạp payua nao veik Thổ Nhĩ Kỳ tui sa thỏa thuận di Liên minh Châu âu – Thổ Nhĩ Kỳ piah pacang cakak bruk urang tỵ nạn song nhập cư suan adat tame Châu Âu. Harei 4/4, abih tih 202 urang nan hu tagok kapan di dom palao Létx-bótx (Lesbos) song Chi-ốtx (Chios) di Hy Lạp, hu ba tal Đi-ki-li (Dikili) di gah pai Thổ Nhĩ Kỳ. Rilo urang dalam nan mai meng Pa-ki-xtan song Áp-ga-ni-xtan.

          # Harei 4/4, sa trực thăng du lịch gaok bala pak bang Ten-nét-xi (Tennessee) di Mỹ, ngak ka taong abi 5 urang angaok kapal haok metai abih. Tui panuac khan di labik nan, sruh trực thăng Beo 206 (Bell 206) duh ka bruk ngắm cảnh meng angaok glaong gaok bala tuk 15 tuk meteh pak hạt Sê-vi-ơ (Sevier), dalam bang Ten-nét-xi. Rayo papar binguk palei nan hu ba panuac po sruh kapal haok nan brei thau ka manuac urang metai dalam mbang njauk bala nan.

          # Quốc hội Campuchia bahrau brei tapa đề xuất di thủ tướng Hun Xen pok urang pan akaok bahrau di 8 dalam 27 mintri. Ni lac mbang salih bahrau camereip di rajaei  CPC tuk vak ka 5 ( 2013-2018)