#/ Tui Mentri Y tế, harei 1/3/2016, dom sang iek ruak dalam negar  ramik veik yaom 1.887 jit vụ y tế, brei tagok meng 30%. Bruk ini anak meta hu pandar ka urang hu thẻ bảo hiểm y tế - urak ini meblah jaik 77% akaok bol. Tui nan, yaom viện phí hu pandar meng harei 1/3 meng pandar ka urang ruak hu thẻ bảo hiểm y tế. Kayua yau nan ye, dom sang iek ruak njauk hu sa bảng yaom dịch vụ bahrau pandar, sa bảng giá dịch vụ klaak jeng pandar ka urang ruak oh hu bảo hiểm y tế saong sa bảng giá khám tui hatai caong khin, dom dịch vụ xã hội hóa.

#/ Tui Sở ngak nong song patagok palei pala tỉnh Đắc Lắc, bilan pala đông xuân 2015-2016, dalam tỉnh cakak trun labaih 5000 ha padai ia, min urak ni dok labaih 70.000 ha phun pala njauk pandiak trak, dalam nan rilo taneh lihik abih. Ia pruh dok kurang, gam song bruk kurang ia pruh di dom bhum atah bayah di tỉnh dok kurang biak khang, mik va blei ia piah pandar. Ong Nguyễn Hoài Dương, Giám đốc sở ngak nong song patagok palei pala tỉnh Đắc Lắc brei thau: Anak tal, khol hulin tacei pato lac, bruk njauk ngak dahlau nan  brei hu ia pandar ka bhap bini, ka sa tathuak ia di dom danao, krong ribong piah mek ia ka bhap bini, ka 2 meda kuac raok bingun di labik. Tacei  puk palei labik  kurang ia bo hu bingun bloh brei klah rabha ka mik va dalam palei.

# Dom harei tapa, langik pandiak bhang dui atah, độ mbak di dom baoh kraong dalam tỉnh Trà Vinh oh padeih tagok glaong saong njaum tame dalam dom ribaong thủy lợi praong ngak ka labaih 66.500 ha padai Đông Xuân pak tỉnh Trà Vinh njauk thu abih. Bruk bo bhap bini daok huac di abih urak ini lac phun padai daok dalam tukvak sraoh, meyah oh ginup aia taba piah pruh, mong yau lahik abih bilan yuak.

#/ Pahadar 57 thun harei padang Bộ đội Biên phòng (3/3/1959 – 3/3/2016),  huyện đoàn Châu Thành, tỉnh Tây Ninh hu nao rivang song brei pandap ka urang jakar, urang lin dom đồn biên phòng dok di huyện Châu Thành. Ni jeng lac bruk ngak bhian randap di huyện đoàn Châu Thành piah pachreih tui bruk “Nghĩa tình biên giới - hải đảo” kayua kapul dam dara Cộng sản Hồ Chí Minh pakat negar peih tabiak.

#/ Ủy ban Bhap bani tỉnh An Giang bahrau brei buh tabiak labaih 900 triệu đồng piah peih ngak dom jalan pacang caga jit ruak angaok kaya ikan dalam aia daok raong; khik hu kein laba dalam raong pala kaya ikan dalam aia saong paglaong bruk meriak gauk pablei kaya ikan raong dalam negar saong pablei tabiak negar langiu dalam thun 2016. Taphia di nan, Chi cục pachreih nong hu kaei urang raong pala ikan dalam aia ngak njauk tui quy hoạch ka bruk pala taong kaya ikan dalam aia saong peih ngak njauk lịch palao raong tui tacei pato di gah raong glang; ngak njauk quy trình kỹ thuật, khik iek chất lượng aia saong iek glang pren yava kaya ikan.

#/ Tui Đại tá Phan Văn Hùng - Phó Giám đốc Công an Hậu Giang, dalam thun 2016, Hậu Giang patagok rilo jalan ngak, dalam nan jhul pakhang bruk di Mban tacei jalan 138 jang yau pambuak bruk song dom ban, dom gah, kapul nyaom puk palei piah  patrun patakik tội phạm, tệ nạn xã hội song ma túy.Dom ban sit, dom huyện dalam tỉnh patagok bruk pathau khan dalam bhap bini ka bruk pacang caga tội phạm, abih di nyu nan lac bruk tacei tabiak  tội phạm, khik bruk “bhap bini khik caga an ninh Tổ quốc". Gah công an pataom tame dom labik trọng điểm, peih bruk khik iek meng 22 tuk tal 4 tuk mesup di dom jalan prong dalam tỉnh.

          #/ Di tuk 0h15 harei 1/3, taong abih 6 urang taong ikan angaok sruh gilai BTH 88217 TS hu mai veik tal Mũi Né siam mekre. Dahlau di nan, 6 thuyền viên hu gilai BV 90135 Ts saong BV 94229 Ts di urang taong ikan Bà Rịa- Vũng Tàu daong sraong hadei di 24 tuk theik angaok tasik. Urak ini pren yava di taong abih 6 urang daok hu siam veik.

            Patui di ni dom khau tin dunya:

          #/ Piah pachreih ba saong klah rabha kan kandah di jiak 100 boh sang urang Việt daok di ban ine Phnôm Pênh njauk khuak dalam mbang apui khuak trak, harei 1/3, Đại sứ quán Việt Nam di Campuchia, Tổng hội urang Campuchia asar Việt Nam song karja palei hu peih bruk brei pandap ka dom sang nan. Yaok pok pandap  yaom 60 đô la dalam nan hu jien, brah, mì tôm song pandap pandar dalam sang.

          #/ Karja bal Gia-các-ta (Jakarta), In-đô-nê-xi-a hu ieu pataom yaok pluh sruh radaih ủi klaak yaok rituh baoh sang pak “khu phố gom bhong” dalam sa chiến dịch palahik bruk mại dâm pak negar hu ralo urang Hồi giáo abih di dunya ini. Piah grap tanat an sinh xã hội, dahlau di nan sa adit, urang jakar hu khan brei ka 3 ribau baoh sang njauk tabiak truh labik ini piah panduan nao daok di labik bahrau hu karja padang ngak brei. Taphia di nan, dom urang ngak kumei me-in jeng hu rami ramik duah bruk karei brei ngak.

#/ Mintri Ngoại giao Hàn Quốc brei thau, akaok kapul ginum biai 6 gah di Trung Quốc Vũ Đại Vĩ, hu nao tal ban ine Xơ-un, Hàn Quốc piah ginum biai song dom urang dang akaok HQ ka bruk palao Triều Tiên. Mbang taom gaok di 2 gah rah tabiak hadei di tuk Mỹ song TQ njauk hatai sa thỏa thuận ka bruk peih prong bruk trừng phạt dalam Nghị quyết di Hội đồng Bảo an Liên hợp quốc pamaong tame Cộng hòa dân chủ bhap bini  Triều Tiên hadei di dom mbang thử hạt nhân song chuh tên lửa bahrau ni di negar ni./.