1/ Mintri ilamu TT saong DL hu mbaoh tangin tame đề án peih harei pataom ragu ragam meng kan dom taneh ia ASEAN - 2015. Tui nan, “harei pataom ragu ragam meng kan dom taneh ia ASEAN - 2015” mbang akaok meti hu peih tabiak di VN meng harei 1 tal harei 6/8/2015. Tui kuhria, harei pataom hu peih tabiak di ban sit Thanh Hóa, hu mbaok 12 kapul nghệ thuật di dom taneh ia dalam ASEAN, dom taneh ia pambuak bruk di ASEAN saong sa kapul daoh tamia meng kan di VN.

2/ VN barau mek hu giải sa dalam bruk pakacah ngak tem ka Cộng đồng kinh tế ASEAN. Taong abih dua mẫu tem kayua VN ngak jeng brei mboh bruk thống nhất di Cộng đồng kinh tế ASEAN tui jalan “sa meta maong, sa ilamu, sa cộng đồng”. Mẫu tem ini hu phát hành di harei 8/8 di yaok taneh ia thành viên piah salam uan bruk pahadar mbang ka 48 harei padang ASEAN.

3/ Thun 2015, HN peih bruk padang ngak iek “labik oh hu sauk pakao”. Cambaih laih nan lac: “labik du lịch oh hu sauk pakao”, “nhà hàng, khách sạn oh hu sauk pakao”, “jabat ngak bruk oh hu sauk pakao” abih di nyu nan lac dom labik pasak, pataom ralo menuac yau labik phố cổ, pasak pablei salih, tapen Hồ Hoàn Kiếm.

4/ Lễ hội bilan xuân Côn Sơn – Kiếp Bạc 2015 tỉnh Hải Dương hu peih tabiak meng harei 4 tal harei 7/3/2015 (nan lac harei 14 tal harei 17 bilan sa - thun anek sak pabe). Lễ hội thun ini peih tabiak njauk saong tuk pahadar 50 thun harei Wa Hồ mai rivang Côn Sơn. Labik inem krung Côn Sơn - Kiếp Bạc hu karja pok brei angan inem krung pakat negar thun 1962, thun 2012 hu pok brei angan inem krung pakat negar đặc biệt.

5/ Urang vak thư pháp angan Hồ Công Khanh (Đà Nẵng) barau patabiak sa baoh tapuk thư pháp ariya đặc biệt ngak meng kayau saong patau randaih. Ong palih ruah 6 candiah kapal hương praong 35 x 95 cm saong ngak jeng dom blah tapuk, dreih yau thư tịch klak, meda lauk veik hu. Angaok nan mbat 100 asal patau randaih, yaok asar patau lac 2 câu ariya lục bát hu vak tui jalan thư pháp. Hồ Công Khanh brei thau 100 asal patau  pandar piah vak thư pháp hu palih ruah meng yaok ribau asal patau bo ong saong dom anek saih di drei roh duah dalam dom thun tapa, tapen dom craoh sit  di Đà Nẵng saong Quảng Nam.

6/ Dalam thun ini tỉnh Khánh Hòa ba tabiak bruk lac taduan raok 3 triệu mbang tuai damuai du lịch nội địa, dalam nan gah du lịch jhul pakhang danak dak “urang VN du lịch VN – yaok mbang nao dak mboh anit ranam taneh ia palei negar”. Tỉnh Khánh Hòa daok patui bruk yaih khan angan du lịch Nha Trang – Khánh Hòa lac sa labik mai văn minh, kajap kro saong siam mekre.

7/ Yaom lac bruk jao giải Osca mbang ka 87 hu tamat bloh min bruk nan ngan saong khán giả Việt jeng daok kandong veik tal harei ini tuk mehit lac Tom Cross - Minh Tâm urang asal Việt akaok meti mek hu jayah di hạng mục padang phim gheih di abih ngan saong bộ phim Whiplash hu njom mbak angaok Internet. Hadei di jaik 20 thun dalam bruk ngak, Minh Tâm rik daong labaih 40 bộ phim dane angan Hollywood yau We Own the Night (2007), Crazy Heart (2009), The Switch (2010), Whiplash (2014).

8/ Adat xăm mbaok bhian hu iek yau biểu tượng di bruk siam binai saong quyền lực di urang kamei di bộ lạc Muun, Magan saong Chin, labik tây bắc Myanmar. Dalikan khan lac, meng samar cổ đại, labik ini dane angan ndih tapui tabiak dom urang kamei siam binai. Kayua yau nan ye, kol lin sa ong patao Miến Điện bhian nao tapa palei piah cap mek dom urang kamei siam binai di abih. Piah oh njauk patao takre kumei siam binai cap nao, dom urang kamei siam binai hu xăm mực juk tagok mbaok./.