1./Di xã Hiền Lương, huyện Hạ Hòa, tỉnh Phú Thọ, rija Đền Mẫu Âu Cơ thun sak pabe 2015 hu peih tabiak. Tui truyền thuyết, harei 7 bingun bilan 1 tui saka ia bulan, tiên nữ Âu Cơ trun dunya, hadei di nan hu taom gaok saong jeng diuk di Lạc Long Quân bloh caih tabiak pok kadung hu 100 baoh, jeng 100 urang anek. Ini lac asal di duah baoh panuac “đồng bào”, jeng lac peih akaok ka but pajaih Tiên Rồng – muk kei di urang Việt. Piah hadar tal Tổ Mẫu Âu Cơ saong tapa nan pato pakai ilamu di bangsa, meng labaih 500 thun dahlau, patao Lê Thánh Tông brei padang Đền Thờ Tổ Mẫu Âu Cơ di xã Hiền Lương, huyện Hạ Hòa.

2./ Lễ hội Xuân Yên Tử bahrau peih tabiak di mblang bein Lễ trường Giải Oan, labik inem krung Yên Tử, ban sit Uông Bí. Kadha bahrau di hội thun ini lac ba abih dom janih dịch vụ angaok jalan meng baha Giải Oan tagok baha Đồng trun gah la. Meng livik mai, labik pablei salih pandap mbang menyum hu pacang tagok mboh biak kanjah, ieu dui tuai damuai ngak jhak tal meta maong di urang mai hành hương di Yên Tử. Lingiu bruk oh brei pablei ralo athur glai dalam labik inem krung, mBan peih bruk daok brei menuac nao tacei pato bhap bini, tuai damuai atah jaik khik caga siam mekre, salamat, oh salih jien rai saong takik pandar jien rai dalam labik inem krung.

3./. Angaok kraong Đăk Bla, labik nduac tapa ban sit Kon Tum - tỉnh Kon Tum bahrau rah tabiak harei pataom pakacah ghe độc mộc meng kan.  Tame pakacah thun ini, hu 8 kapul gam saong 100 vận động viên mai meng dom xã, phường daok tapen kraong di ban sit Kon Tum saong huyện Sa Thầy. Karei jang dom thun dahlau, lingiu jalan pakacah 1.500m, thun ini daok hu 2 jalan pakacah nan lac 100m saong 200m. 

4./Di Thế Miếu (Đại nội Huế), Pasak khik ramik inem krung medil Huế bahrau peih bruk padang ngak veik adat hạ nêu saong peih mbaok akaok thun, tamat danak dak taduan raok Tết thun sak pabe 2015 di labik inem krung Huế. Dalam bruk padang ngak veik adat hạ nêu thun 2015, Pasak khik ramik inem krung medil Huế hu peih ngak veik adat khai ấn meng bruk vak thư pháp hu đóng ấn triện uan thun bahrau siam mekre alin hadiah ka tuai damuai mai rivang iek inem krung medil Huế.

5./Di rạp xiếc mblang bein Gia Định, sang daoh Nghệ thuật Phương Nam daok peih ngak danak dak xiếc Việt - Nga, hu mbaok 6 nghệ sĩ xiếc mai meng Liên bang Nga saong Cộng hòa Belarus gam saong dom nghệ sĩ di nhà hát saong kapul xiếc thú Hồng Lộc. Yaom lac mbang camereip danak dak xiếc Việt - Nga hu sang daoh Nghệ thuật Phương Nam peih tabiak di ban raya Hồ Chí Minh min nyu pachreih hu biak rilo menuac, hadei di 10 mbang parang me-in, hu labaih 8.000 mbang urang mai maong iek.

6./Parang iek “Sơn mài Sài Gòn 3” daok rah tabiak di sang bac Đại học Mỹ thuật ban raya Hồ Chí Minh. Parang iek hu yaih khan tal bhap bini 63 blah rup cih sơn mài di 63 urang lac dom họa sĩ di  Kapul Mỹ thuật ban raya Hồ Chí Minh, dhar kapul Mỹ thuật di dom tỉnh, ban, dom họa sĩ Prang saong dom gru pato, dom SV di sang bac. Lingiu bruk yaih khan dom blah rup cih nan, parang iek mbang ini daok hu makna piah khik ramik saong patagok ilamu meng kan di nghệ thuật sơn mài Việt Nam, peih tabiak jalan daong ka dom gru pato saong SV bac megru, paglaong ilamu, pachreih bruk roh duah piah khik ramik saong patagok rup cih sơn mài./.