1 # Pahadar 125 thun harei menek Chủ tịch Hồ Chí Minh, meng ini tal harei 25/5, Muyim Tổng hợp tỉnh Bình Định peih mbang parang iek thaot binguk “Chủ tịch Hồ Chí Minh hadiuk miat dalam hatai ayut sahabat dunya”. Mbang parang iek hu parang tabiak 110 thaot binguk juk mbong brei mboh ka rai diuk saong hatung hatian di Chủ tịch Hồ Chí Minh ngan haong bhap bani Việt Nam saong urang Bình Định dalam dom mbang hu taom gaok Wa; taphia di nan brei mboh hatung hatian iek prong di bhap bani angaok dunya brei ka Wa Ho prong uranam.

2/ Jeng patui bruk ini, tỉnh Ủy Kon Tum bahrau jao thưởng ka 35 kapul nyaom song 42 menuac urang ngak bruk naih gheih dalam bruk bac megru song ngak tui jalan hadah krah siam mekre di HCM, 35 kapul nyaom, 42 urang hu tỉnh ủy Kon Tum jao thưởng mbang ni lac dom kreih camin dalam bruk  sx, bac megru, khik caga an ninh chính trị trật tự an toàn xã hội song dalam rai duik dok dang yaok harei.  

3 # Pak Muyim Hồ Chí Minh daok peih mbang parang iek hu angan: “Hồ Chí Minh – Urang pamedeih hatai sáng tạo”. Mbang parang iek meyaih khan 79 kadha mek thaot  binguk Chủ tịch Hồ Chí Minh ngak đề tài di dom janih yau: hội họa, âm nhạc, thơ văn di labaih 70 tác giả dalam saong langiu negar. Bruk njauk biai nan lac, pak mbang parang iek, mbang akaok meti blah phù điêu “Chân dung Chủ tịch Hồ Chí Minh” (hợp kim nhôm) ngak meng thun 1948 hu meyaih khan tal urang mong iek. Ini lac tác phẩm kayua kĩ sư Võ Quý Huân, urang iek bruk gah  gang thép ngak vũ khí brei ka bruk mesruh metak peih ngak.

 4/ Thun ni, dom palao di Trường Sa dalam tỉnh Khánh Hòa peih tabiak asar kadha praong ka bruk bac megru song ngak tui jalan hadah krah siam mekre di HCM nan lac: “Trung thực, trách nhiệm, pambuak pagam song bhap bini, jum pataom dak padang Đảng bộ hacih saat khang kajap” Ngak tui panuac tacei ba di Chủ tịch Hồ Chí Minh, urang jakar, bol lin Trường Sa gamsong bol bala, bhap bini dalam taneh ia khik caga chủ quyền palao tasik di taneh ia, dong ngak brei hadah mbaok meta meng kan mai di Quân chủng Hải quân bhap bini Việt Nam. 

5 # Pak huyện đảo Lý Sơn, tỉnh Quảng Ngãi, kapul urang ngak bruk di Trung ương Kapul urang kamei Việt Nam, Kapul urang kamei bal Đà Nẵng saong tỉnh Quảng Ngãi bahrau peih ngak danak dak “Nao gam haong pulao tasik palei negar”. Danak dak hu alin brei 50 triệu đồng sapng jaik 80 pok pandap ka Kapul urang kamei huyện; alin hadiah yaok pluh pok jien bac ka anek saih lac anek kamuan urang taong ikan njauk takala tak metai tuk nao taong mek angaok bhum tasik Hoàng Sa, Trường Sa; alin brei pandap ka urang lin hu rai diuk kan kandah daok ngak bruk angaok pulao, yaok pok meng 500 ribau đồng tal 1 triệu đồng.

 6/ Tỉnh ủy Vĩnh Long bahrau peih pakak labik pahadar  Giáo sư, Viện sĩ, anh hùng lao động Trần Đại Nghĩa di xã Tường Lộc, huyện Tam Bình, tỉnh  Vĩnh Long. Labik pahadar Giáo sư  Giáo sư, viện sĩ Trần Đại Nghĩa  hu padang ngak lagaih song ilamu meng kan di bangsa. Danak dak hu padang di angaok taneh pronng 16.000m2, hu ngak dalam 2 thun song yaom jien abih tih jiak 51 tỷ đồng

7 # Tui Ban tacei pato Tây Nam Bộ “Adit rivang ma-in that hijao Bhum taneran kraong Cữu Long  thun 2015”  kayua Ban tacei pato Tây nam Bộ pambuak haong dom mentri, ngành Trung ương saong karja puk palei dom tỉnh Bhum taneran kraong Cữu Long  peih ngak meda rah tabiak meng harei 26/6 tal harei 2/7/2015 pak bal Cần Thơ. Ong Nguyễn Phong Quang – Phaok akaok ban thường trực Ban tacei pato Tây Nam Bộ, Akaok ban tacei pato Adit rivang ma-in that hijao brei thau:

- Băng: “Peih ngak Adit rivang ma-in that hijao Bhum taneran kraong Cữu Long nan lac bruk ngak biak hu makna, biak siam di bhum Vấn

taneh Tây nam Bộ. Bruk peih ngak dalam njauk mek hu chất lượng gah hạ tầng, đầu tư ka du lịch di drei. Yau nan khaol drei meng mek hu jak jeng siam mekre dalam bruk peih ngak adit ini”.

8/ Kayua pandiak thu dui atah, ia taba di angaok krong ribong thun lagu, Sở ngak nong song patagok palei pala tỉnh Bạc Liêu hu pachreih ba urang nong dalam tỉnh padeih patrun pajaih padai hè thu. Urak ni taneh padai hè thu hu patrun pajaih labaih 7000 ha beir jang  dut song rilo thun jiak 20.000ha. Ni lac thun camereip bilan padai Hè thu tỉnh Bạc Liêu gaok rilo kan kandah kayua langik tasik thu lagu.                                         

Patui veik khaw tin dunya:

9 # Yaok rituh bhap bani Cô-lôm-bia gam haong dom drei athur ranam di drei hu mbaok tame mbang pakacah nduac yaok thun pak bal ine Bô-tô-ga (Botoga) di Cô-lôm-bia piah rik pataom jien ka dom kadung jien pacang khik anek athur saong paglaong hatai saneng di anek manuac ka quyền di athur. Ngan haong ralo urang, hu mbaok tame mbang pakacah ini oh njauk lac piah ngak pahla thaoh bo daok brei mboh hatung hatian di drei ngan haong dom drei anek athr raong di drei.

10/ Gilang pariak dunya bahrau patabiak jalan ngak tagok jang 2 mbang jien buh ka pato pakai công dalam 5 thun anak tal, pataom tame bruk salih bahrau chất lượng jang tagok số lượng anek saih. Tui jalan ngak nan, meng ni tal thun 2020, Gilang pariak dunya hu buh tabiak  5 tỷ đô la Mỹ, tagok jang 2 mbang dut song pok jien pandar dalam 5 thun tapa piah dong labaih 120 triệu uranaih oh hu nao tal sang bac song labaih 250 triệu uranaih karei oh bac oh vak hu yaom lac daok hu nao tal sang bac.

          11# Puac adit tapa, bruk ngak pahla Lai-Bôn (Life Ball) piah pataom jien daong dom urang njaom mbak HIV/AIDS, rah tabiak pak bal ine Viên (Áo). Ini lac sa dalam dom bruk ngak pahla prong abih dunya piah pataom jien pacang cakak ruak AIDS. Hu mbaok dalam bruk ngak nan thun ini jeng hu ralo diễn viên, ca sĩ daneiy angan angaok dunya. Yaom harak tame iek bruk ngak ini lac 850 đôla Mỹ, pachreih jaik 40 ribau urang hu mbaok tame. Taong abih jien pataom hu meda panduan brei ka dom kadung jien ngak pahla atau dự án roh duah saong pacang caga AIDS./.