1/ Harei ni, 3/6, Qh ginum biai ka dự án hukum padang ngak QH (pasiam veik) song dự án hukum padang ngak  Tòa án bhap bini (pasiam veik). Dahlau di nan, dalam mbang nyaom harei kabroi, QH hu tong yaom pabak bruk peih ngak bruk patagok KT song kadung jien karja thun 2013, dom urang vakil jeng mboh lac brei buh dahlau 16 ribau tỷ đồng dalam kadung jien karja brei ka gah bol lin tasik, kiểm ngư song urang tong ikan.

2/ Melam kabroi 2/6, akaok negar Trương Tấn Sang hu var taduan rok amuk Penny Pritzker, akaok mintri pablei salih Hoa Kỳ daok rivang saong ngak bruk di VN. Akaok negar TTS caong khin dua taneh ia VN – Hoa Kỳ peih ngak siam dom thỏa thuận ka talei pambuak bruk kinh tế, pablei salih, đầu tư, daong ngak ka talei pambuak bruk dua taneh ia dak harei dak patagok khang kajap, praong dalam jang.

          3/ Beir harei kabroi 2/6 tui pasang iek di gah kiểm ngư VN, gah TQ jeng daok hu mbaok labaih 120 kapan dok taom dar labik giàn khoan Hải Dương 981. Atah di nan meng 20 tal 25 hải lý, labaih 50 kapan tong ikan di urang tong ikan VN jeng dok tong chap kaya ikan song gah kiểm ngư di VN jeng dok hu mbaok khik tasik,khik chủ quyền taneh ia di angaok tasik.

4/ Melam harei nan, di ban sit Biên Hòa hu rah tabiak danak dak “Triệu triệu baoh hatai pamaong tal tasik, pulao” kayua rayo papar sap papar binguk tỉnh Đồng Nai peih tabiak. Ralo bhap bini Đồng Nai hu brei mboh bruk hadah mbaok meta ka kapul kiểm ngư, cảnh sát tasik daok ngak bruk di tasik, khik caga chủ quyền di palei negar. Chuẩn Đô đốc Lê Kế Lâm, akaok kapul ilamu – kỹ thuật saong kinh tế tasik ban raya HCM lac:

Băng: “Ala bruk tacei ba di Đảng saong karja kol drei pandar ralo jalan ngak yau meng bloh nan lac njauk, lagaih saong hatai di bhap bini, hu bhap bini dunya pok meyaom. Kayua kol drei iek praong jalan đấu tranh sron mbon khik caga chủ quyền min drei oh ngak kan kandah tal bruk nao mai angaok  tasik biển đông saong karei di nan lac tranh thủ bruk ủng hộ di dunya”.

5/ Tui mintri pato megru mbang pakacah môn ngữ văn harei kabroi (2/6) hu tong abih labaih 900 ribau thí sinh hu mbaok tame pakacah tamat pakat bac trung học phổ thông thun 2014,  samu 99,75% dom anek saih tut angan tame pakacah. Mesup harei ni 3/6 dom thí sinh pakacah môn bắt buộc nan lac Toán học, beir harei hu 2 mbang pakacah môn tự chọn nan lac Hóa học song môn Địa lý.

6/ UB bhap bini tỉnh Cà Mau hu mbaoh tangin brei peih ngak đề án daong sang daok dalam dua thun 2013 – 2014, brei labaih 6.500 baoh sang hu buh pren yava ka cách mạng, ngan saong yaom jien labaih 228 tỷ đồng. dalam nan, 4.700 baoh sang hu daong padang ngak barau, 1.800 baoh sang hu daong ngak pasiam veik. Meng akaok thun 2013 tal ini, dalam tỉnh hu labaih 1.200 baoh sang hu buh pren yava ka cách mạng hu mbang tui sarak daong sang daok.

          7/ Melam bloh 2/6 di ban raya HCM, trại hè Thanh Đa mbang ka 36 kayua Liên đoàn lao động song Thành đoàn ban raya pambuak bruk peih ngak hu 4.500 anek di công nhân viên chức lao động ban raya mai patom mbaok. Ni lac dom adei sit umo meng 10 tal 15 thun song anek saih slut mbut, bac megru naih joi.

Patui di ini dom khau tin dunya:

8/ barau ini, di ban ine Pretoria di Nam Phi, Đại sứ Việt Nam dalam angan lac urang dang akaok UB ASEAN di Pretoria (APC) gam saong Đại sứ quán Việt Nam peih “harei thể thao saong baoh sang ASEAN 2014", hu mbaok di labaih 400 urang, dalam nan hu ralo urang jakar ngoại giao, nhân viên, baoh sang, gam saong urang lambaok bhap bini VN saong ayut sahabat Nam Phi.  

9/ Di ban ine Oslo, hu jiak 200 mik va urang Việt di Nauy hu tual hala doh sambo meriak patuh katam VN song hala doh NaUy, rilo biểu ngữ meng 4 sap Việt, Trung, Na Uy song sap Anh hu asal lac: TQ brei ba giàn khoan tabiak truh bhum tasik VN,  Hoàng Sa song  Trường Sa nan lac di Việt Nam.

10/ Jit aih caraoh daok tamuh khang di ralo labik di tỉnh Tây Bắc Nam Phi dalam dom harei tapa. Takik di abih 3 uranaih di tỉnh Tây Bắc metai kayua aih caraoh lahik ia saong suy thận, dalam tuk yaok ribau urang karei mboh yau glaih glar saong labaih 300 urang karei tame ndih iek ruak. Makna tamuh jit aih caraoh di taneh ia ini nan lac kayua ô nhiễm halau ia, ia pandar nyu njom ia nerak tachauk./.