# Harei ini (11/3), Nyaom biai mbang ka dua Ban Chấp hành Trung ương Đảng khóa XII patui veik ngak bruk harei mbang ka dua, ginum biai ka danak dak ngak bruk toàn khóa di Ban Chấp hành Trung ương; danak  dak patagok kinh tế - xã hội 5 thun 2016 - 2020; bruk brei thau ka urang jakar pal akaok pakat glaong di dom jabat Karja saong dom kadha prong karei. Nyaom biai mbang ini, Bộ Chính trị pok tagok  Trung ương brei panuac ka bruk khan brei thau angan urang ứng cử  Akaok negar, Thủ tướng raja-ei, Akaok Quốc hội nan lac dom chức danh pal akaok glaong abih di Karja drei.

# Tui panuac khan di mintri Tài nguyên và Môi trường: Liên hợp quốc ba tabiak angan ieu di harei ia dunya 22/3 thun ni lac “ Ia song bruk ngak”. Angan ni hu palih ruah piah brei mboh yaom glaong di ia ngan saong bruk ngak jeng yau rai diuk  di bhap bini. Danak dak mít tinh pakat negar pahadar harei ia dunya thun 2016 hu rah tabiak di mesup harei 22/3 di ban Thanh Hó. Urak ni hu labaih 1 tỷ 500 ribau urang, hu jiak sa meteh urang ngak dunya ngak bruk hu pagam tal ia.

# Page harei 10/3, labaih 400 đoàn viên dam dara Đoàn khối dom jabat Trung ương gah kreh negar saong Đoàn viên dam dara Cảng hàng không Dunya Đà Nẵng hu mbaok tame bruk brei jaik 300 đơn vị darah. Thun ini, Bal Đà Nẵng meda peih ngak 30 mbang brei darah pahla saong taduan mek jaik 33 ribau đơn vị darah. Ayut Lê Trung Kiên, Đoàn viên dam dara Cảng hàng không Dunya Đà Nẵng, 17 mbang brei darah pahla brei thau: Dahlak hu blaoh 17 mbang brei darah, yaok mbang brei darah dahlak mboh biak bui sambai kayua lac tanjoh darah di dahlak hu cứu diuk ralo urang. Dahlak jeng caong khin dom ayut sahabat, dom urang Đoàn viên dam dara jeng hu mbaok tame brei darah piah cứu sống diuk ralo urang ruak daok caong khin hu darah.

# UB bhap bini tỉnh Bình Thua65nbahrau buh tabiak meng kadung jien karja tỉnh labaih 2 tỷ đồng piah blei ia pandar ka mik va  bhum pandiak bhang Hàn Tân. Labaih 9.500 urang hu dong meng kadung jien ni lac dom urang di boh sang kathaot,  jiak si kan, sang dalam sarak karja song mik va bangsa takik dok kurang ia pandar kayua pandiak bhang rah tabiak. Yaok urang hu dong blei 40 lít yaok harei, dalam tuk vak 3 bila, ngan song yaom jien 60.000 đồng/mét khối.

# Tal urak ini, Bal raya Hồ Chí Minh hu labaih 5 ribau urang blei hu mboh tangin tame hợp đồng mesre phun jien meng pok tín dụng 30 ribau tỷ đồng ka urang hu jien mek tame biar blei sang daok ngan haong taong abih phun jien labaih 6 ribau tỷ đồng. Tui adat hukum di Gilang pariak Karja, meng harei 1/6 anak tal, urang blei mesre jien meng pok jien ini meda ciuk jien jhung thương mại, oh njauk lac jien jhung lãi suất ưu đãi yau urak ini. Bruk ini meda ngak kan kandah ka urang blei hu jien mek tame biar. Urak ini dom gilang pariak pak bal raya Hồ Chí Minh daok brei mesre thương mại trung saong atah vaktu ngan haong jien jhung meng 8-11% sa thun, glaong jaik dua mbang dut haong jien jhung ưu đãi di pok 30 ribau tỷ.

# Piah pacang pandiak, njom mbak dong ka phun padai, gah ngak nong tỉnh Long An hu ginum biai song mban khik caga Hồ Dầu Tiếng piah dong tathuak ia jhul mbak di krong Vàm Cỏ Đông;  pambuak bruk song tỉnh Tiền Giang piah mek ia taba meng krong Tiền tame ka bhum  ngak nong gah barak di tỉnh. Ni lac thun camereip tỉnh Long An njauk ngak yau ini kayua labaih 15 ribau ha padai di dom huyện gah barak tỉnh dok thu lagu trak song ia mbak dok njom tame dalam mblang hamu. Ông Lê Văn Hoàng, Giám đốc sở ngak nong song patagok palei pala  tỉnh Long An cho brei thau: Pandiak bhang njom mbak di Long An dok patagok. Tui nan, độ mbak 4 gram/lít  tapa truh krong Vàm Cỏ Đông di Bến Lức, tapa truh ar Rạch Chanh di krong Vàm Cỏ Tây, ban sit Tân An. Yaok thun tuk vak ni, ia krong Vàm Cỏ Tây dok taba song Vàm Cỏ Đông dok di tanut 1-2 gram/lít.

# Daok pak tỉnh Vĩnh Long, kayua pambak độ mbak tagok glaong saong  njaom tame dalam mblang hamu hu ngak ka labaih 1.270 ha padai hè thu samar njaom mbak, labaih 1.000ha padai đông xuân daok dalam vaktu sraoh saong padai   hè thu avar daok dalam vaktu nih njauk kurang aia pruh. Daok aia pandar, pak dua huyện Vũng Liêm, Trà Ôn saong sa binah huyện Mang Thít halau aia meng krong ribaong, kênh rạch langiu labik ar pacang abih njuak njapm mbak saong si tapa 2 binah ribau. Urak ini dalam tỉnh hu 12 sang mac aia, balai ba aia pandar njauk njaom mbak ngan haong jaik 18.000 baoh sang.

Khaw tin dunya:

# Kuhria tal puac bilan 1 thun ni, urang VN dok di negar Hàn Quốc lac 134 ribau urang song jeng kapul urang negar langiu prong ka 3 di negar ni, hadei di Trung Quốc song Mỹ. Tui pathau khan nan,, tong abih urang negar langiu dok di HQ kuhria tal tuk vak ni lac 1 triệu 900 ribau urang, tagok 6% dut song tuk vak ni thun dahlau.

# Harei kabroi (10/3), bruk bầu tổng thống pak Myanmar hu chính thức peih mbaok, dalam bối cảnh Hạ viện, Thượng viện saong dom lambaok kayua bol bala chỉ định đệ trình talei angan ứng cử viên hu mbaok tame mbang nduac đua meblah kik tổng thống. Đảng Liên đoàn negar brei ka dân chủ pal akaok hu pok ong Htin Kyaw, 69 thun, lambaok ka Hạ viện tranh cử chức Tổng thống Myanmar. Meyah njauk cử, ong Htin Kyaw meda salih ka ong Thên Xên kuhria meng puac bilan 3. 

# Labaih 500 anek saih di bang Tây Ben-gan, negar Ấn Độ harei  9/3, njauk jru mek hadei di tuk menyum jru tẩy giun. Tui rayo papar sap Ấn độ, dom anek saih ni hu sang bac brei jru tẩy giun piah menyum. Min dom anek saih tame sang iek ruak hadei di tuk mboh sabil meta song taaok. Mintri Y tế Ấn Độ hu ba chuyên gia y tế tal dom labik nan piah duah thau, saong brei padeih bruk brei  jru tẩy giun nan./.