# Pak jabat Raja-ei,  Phó Thủ tướng Nguyễn Xuân Phúc bahrau taduan raok 35 urang naih gheih lambaok ka labaih 1.300 taha akaok palei saong urang hu angan je dalam bhap bani urang bangsa takik di tỉnh Bắc Cạn, tukvak Kapul nyaom tabiak rivang Hà Nội. Phaok Thủ tướng Nguyễn Xuân Phúc caong khin dom taha akaok palei, urang hu angan je patui veik patagok bruk ngak di drei, peih ngak siam dom sarak di Đảng, Karja, nao dahlau dalam bruk khik ramik ilamo bangsa, ngak siam bruk pathau khan sarak, jak ba bhap bani pataom tame patagok bruk ngak mbang pala drak, tah klaak dom adat cambat oh daok laghaih haong rai diuk harei ini…

# Daok dalam tabung glaong bilan hajan, gam saong bruk takik sangka pacang cakak ruak, nan ye jit pandiak tabiak drah daok pambak praong di tỉnh Đắc Lắc. Kuhria tal urak ini, taong abih dom huyện, ban sit, ban praong di tỉnh Đắc Lắc hu urang ruak pandiak tabiak drah abih tih labaih 450, ralo jang 40% duk saong thun dahlau. Gam saong bruk kakei bhap bini caik hatai sangka tal ruak ini, gah y tế tỉnh Đắc Lắc kham merat pambuak bruk haong karja dom puk palei, kapul nyaom peih ralo jalan pacang cakak jit ruak yau peih bruk pahacih môi trường, pametai loăng quăng, bọ gậy, pruh jru pametai jamuok

# Meng harei 21 tal harei 26/9 tal, pak bal Đà Nẵng meda rah tabiak Nyaom gru pato   bruk ngak pakat negar thun 2015.Hu mbaok 236 gru pato di 159 labik pato bruk ngak di 56 tỉnh, bal dalam negar. Taong abih bruk ngak hu tut angan dalam mbang nyaom ini nan lac 41 bruk ngak (ralo jang 3,5 mbang dut haong mbang nyaom thun 2012 nan lac 12 bruk ngak). Bruk peih mbang nyaom yau ini piah duah tabiak gru pato hu kadha pato xuất sắc, jalan pato siam lagaih; paglaong chất  lượng pato bruk ngak Việt Nam pabak hatai caong khin patagok dalam tukvak yam tame khu vực ASEAN dalam puac thun 2015.

# Harei kabroi 10/9, di sangmegik Rahim, Quận 1, ban raya Hồ Chí Minh hu rah tabiak nyaom roya urang Islam mbang ka 5, tukvak 2015 – 2020. BUrang Islam ban raya HCM hu labaih 7.500 urang daok di 17 quận, huyệ. 5 thun tapa, mban lambaok urang Islam hu ngak siam bruk dang tabiak ngak talei pambuak karja, kapul nyaom saong urang bangsa Chăm, tacei ba mikva diuk rai saong ngak bruk agama tui njauk hukum Islam, njauk hukum Karja. Tukvak tapa, bruk ngak pahala jeng hu Đảng, karja, dom mban ngành, kapul nyaom daok di ban raya sangka. Tapa nan, mban lambaok hu alin hadiah ka dom baoh sang urang chăm kan kathaot labaih 500 paok pandap, 2 tấn brah saong jien abih tih  labaih 3 tỷ đồng.

# Tỉnh Bến Tre urak ini hu labaih 2.700 doanh nghiệp ngak mbang pablei salih saong yaom phun jien brei thau abih tih labaih 11.300 tỷ đồng, ba bruk ngak ka jaik 42.000 urang ngak. 8 bilan di thun 2015, jien mek tame meng bruk pablei tabiak di tỉnh hu labaih 400 triệu USD, mboh ralo nan lac dom janih pandap kaya nong, kaya ikan dalam aia saong dom pandap panda ngak tabiak meng la-u.

# Peih bruk jak ba daong phun jien daong ka urang đảng kan kathaot daok ngak bruk di chi bộ palei, khóm yam tapa kan kandah, 4 thun tapa, tỉnh Trà Vinh hu labaih 29.800 urang đảng hu mbaok tame rik daong labaih 3 tỉ 500 triệu đồng, daong ka 396 urang đảng kan kathaot nyim phun jien oh kuhria laba dalam 2 thun piah ngak mbang. Yaok urang đảng kan kathaot nyim 5 triệu đồng. Taong yaom ka dom bruk ngak hu dalam tukvak peih bruk jak ba ini, ong Nguyễn Quốc Vạn – akaok mban peih bruk tỉnh ủy Trà Vinh brei thau: Jalan ngak nan lac daong ka dom urang đảng gaok kan kandah yam tagok, kham merat piah hu phun jien ngak mbang tani tanat rai diuk, piah tapa nan yam tagok ngak saim bruk ngak. Tapa bruk ini dom urang taduan hu phun jien jeng yau dom urang hu jien piah daong njauk hatai saong jalan tacei pato di tỉnh.

# Peih mbang jak ba “Urang Việt Nam brei pandar pandap Việt Nam”, melam kabroi (10/9) Pasak Xúc tiến Thương mại Sóc Trăng peih pakak mbang darak ba pandap Việt mai palei pala pak huyện Cù Lao Dung daok dalam danak dak Xúc tiến Thương mại negar 2015. Mbang darak pachreih 28 doanh nghiệp hu mbaok tame parang iek, meyaih khan pandap panda di 70 gian hàng. Dom janih pandap hu parang tabiak mboh ralo nan lac dom janih pandap bhian pandar yaok harei, dom janih pandap ngak meng tangin, pajaih phun pala brei ka bruk ngak nong.

Patui di ini dom khau tin dunya:

# Harei 10/9, sang iek ruak Chợ Rẫy – Phnôm Penh, lac sang iek ruak pambuak bruk di Việt Nam-Campuchia dalam gah y tế, pambuak bruk saong kapul bác sĩ ranaih umo halan hatian CPC peih danak dak iek ruak saong brei jru saoh ka urang kan kathaot di CPC. Ini lac bruk ngak gam gam di sang iek ruak Chợ Rẫy - Phnôm Pênh ngan saong bruk daong di dom doanh nghiệp VN daok ngak bruk di CPC. Tui danak dak meng harei 10 tal harei 12/9, dom y bác sĩ di sang iek ruak hu iek ruak, brei jru saoh ka 500 urang ruak kan kathaot oh hu jien mai iek ruak. 

# Raja-ei Ailen harei kabroi (10/9) brei thau taduan raok 4 ribau urang  tị nạn tui danak dak khik caga urang tị nạn di negar ini. Dom urang tị nạn akaok meti meda nao tal Ailen dalam dom adit tal. Dalam nan hu gam 600 urang hu taduan raok meng akaok thun ini yau danak dak di Liên minh châu Âu saong labaih 500 urang urak ini daok pak Ailen.

# Harei kabroi 10/9, rajaei NB brei thau jeng oh ka kuhria hu dom khat lihik kayua hajan ia sua rah tabiak di labik gah brak ban ine Tôkyo, dalam tuk ralo sang danaok di bhap bini njauk ia sua ba seik. Tui kuhria barau abih harei kabroi 10/9, takik di abih 2 urang lahik, ralo urang gar dalam baoh sang kreih ia sua. Dalam tuk nan, jaik 100 ribau urang hu panduan nao grap taneh ia NB dalam harei ini hadei di tuk hajan khang dui atah ngak ka ia dalam dom kraong nduac tame binek./.