# Ủy ban Bhap bani tỉnh Bình Định njauk hatai brei Công ty Cổ phần đầu tư Cotec Healthcare, Công ty Cổ phần Kỹ thuật vật liệu xây dựng saong Sang iek ruak Đa khoa tỉnh Bình Định buh jien tame ngak dự án Sang iek ruak Đa khoa tỉnh Bình Định – binah peih prong tui jalan xã hội hóa. Dự án Sang iek ruak Đa khoa tỉnh Bình Định peih prong hu padang ngak 12 tal ngan haong 600 baoh taneng ndih iek ruak, angaok mblang taneh labaih 13.600 mét vuông. Taong abih jien buh tame ngak jaik 1.300 tỉ đồng, peih ngak meng ini tal bilan 1 thun 2020. Tuk ba tame pandar, Sang iek ruak Đa khoa tỉnh Bình Định meda peih prong  bruk iek ruak ka 1.500 mbang urang dalam harei ngan haong dịch vụ iek glang pren yava hu chất lượng glaong pabak hatai caong khin iek ruak di bhap bani Bình Định saong khu vực.

# UB bhap bini tỉnh Quảng Ngãi barau brei adat buh tabiak meng kadung jien karja 4 tỷ đồng piah peih bruk pasang iek, taong yaom tanut ô nhiễm di 6 gilang jru khik caga phun pala di tỉnh dalam thun ini. Sở tài nguyên saong môi trường tỉnh Quảng Ngãi gam saong dom jabat chức năng nao pasang iek, phân vùng tui tanut ô nhiễm, thau lac khối lượng taneh ô nhiễm brei langyah di yaok bhum dalam yaok gilang jru, meng nan pok panuac tagok UB bhap bini tỉnh dom jalan langyah. Dom gilang jru angaok nan daok ngak kan kandah tal môi trường saong rai diuk di bhap bini jaik taphia.

# 5 thun tapa, meng thau gul pataom, sami samar, hadah krah, Đảng bộ, raja-ei, bol lin saong bhap bani dom bangsa tỉnh Kon Tum pachreih tui BRUK pakacah gauk ranam taneh aia, grauk labik ngan haong ralo jalan ngak ba mai ralo siam mekre. Tapa nan hu daong khik ramik tốc độ patagok kinh tế yaok thun di tỉnh hu jaik 14%; baoh sang kathoat trun khang meng labaih 33%  daok 11,5%.

# Peih ngak danak dak daong muot BH “bak hatai bhap bini - ấm tình amaik ame” kayua UB an toàn jalan mbak pakat negar peih tabiak, dalam dom harei akaok thun bac barau 2015 – 2016, mban an toàn jalan mbak tỉnh Lâm Đồng hu alin hadiah 1000 muot BH ka anek saih saong baoh sang kan kathaot lac urang bangsa takik di puk palei. Taha palei K’Miếu daok di palei Tố Lan, xã An Nhơn, huyện Đạ Tẻh, tỉnh Lâm Đồng lac: Drei mboh lac tapa bruk ini mikva hu muot BH siam, piah hadei di ini mikva thau bo blei ka nyu khik kajap tính mạng di drei. Saong meng ini nao, kol dahlak  kham merat pathau khan, jak ba mikva tuk halei daok la angaok mô tô radaih mac brei hu muot BH piah khik tính mạng di drei tuk gaok bala angaok jalan mbak. 

# Meng thun 2003 tal ini, pak xã Mê Pu, huyện Đức Linh, tỉnh Bình Thuận hu 125 urang metai kayua ruak ung thư ngak ka bhap bani labik ini mboh huac. Bahrau ini, pasak Y tế caga ruak tỉnh Bình Thuận saong Viện Pasteur Nha Trang hu mbang pasang iek pak palei ung thư ini. Tapa pasang iek hu mboh pak 9 baoh sang hu urang njauk ung thư hu duah thau ye taong abih 9 baoh sang nan jeng ngak nong; aia piah ngak mbang ngak huak hu mek meng bingun kuac dalam meng 3-5 mét; 8/9 baoh sang bhian preh xịt, taom gaok haong jru pametai anek ruak, jru hareik dalam bruk pala drak.

# Kuhria tal tukvak ini, dom labik y tế dalam ban raya HCM hu 8.157 urang njauk ruak pandiak tabiak drah njauk tame ndih iek ruak, ralo jang 61% duk saong thun dahlau. Eng dalam adit tapa, dalam ban raya hu 416 urang njauk ruak pandiak tabiak drah tame ndih iek ruak. Tapa maong iek dom sang iek ruak Nhi dalam ban raya HCM jeng brei mboh ruak pandiak tabiak drah daok tagok khang, dalam nan hu takik di abih 6 urang metai. 

# Thủ tướng Raja-ei bahrau mboh tangin tame Quyết định ka 1537/ QĐ-TTG  patabiak bruk vận hành dom binek padang aia di krong Vu Gia - Thu Bồn. Tui nan, yaok thun, dom binek: A Vương, Đắk Mi 4, Sông Tranh 2, Sông Bung 4, Sông Bung 4A saong Sông Bung 5 angaok kraong Vu Gia - Thu Bồn njauk vận hành tui jalan thứ tự brei ngak dahlau: dalam bilan hajan ribuk, khik caga siam mekre công trình; daong ngak brei patrun aia sua labik gah ala; khik hu siam bruk phát điện.

Patui di ini dom khau tin dunya:

# Mintri ngoại giao Mỹ brei thau, taneh ia ini hu jao 4 kapal tuần tra barau ka Philippines di bilan 11 tal. Cty Willard Marine Inc hu taduan hợp đồng ngak tabiak saong jao mẫu kapal tuần tra barau ka gah cảnh sát tasik Philippines piah duh ka bruk ruah duah, daong urang njauk bala dalam khu vực.

# Tổng thống Pháp Ô-lăng (Francois Hollande) daok pok sap iew dom negar njauk mek hu sa panuac sanya haong gauk ka biến đổi khí hậu pak Nyaom biai ka Khí hậu di Liên hợp quốc pak Pháp dalam bilan 12 tal. Tui ong Ô-lăng, hu talei pambuak bruk di kadha biến đổi khí hậu bo bruk khủng hoảng nhập cư bo châu Âu daok gaok urak ini saong dom negar karei angaok dunya oh caik ka bruk khủng hoảng nhập cư ngak var lihik bruk biến đổi khí hậu.

# Akaok mintri QP Xinhgapo Eng Hen hu ieu phon ka akaok mintri In-đô-nê-xi-a ndomi veik bruk caong daong In-đô-nê-xi-a  pacang cakak dom mbang khuah glai di pulao Xu-ma-tra di taneh ia ini. Dahlau di nan, rajaei Xinhgapo jeng hu brei dom kapal haok padam pui khuah saong dom pandap panda karei tal In-đô-nê-xi-a  piah duah mboh tal 140 labik khuah di Xu-ma-tra, ralo jang 38 labik duk saong dom harei dahlau nan. Dom chuyên gia kuhria mboh lac, sauk thur mur saong ô nhiễm không khí meda catang jang meyah dom mbang khuah oh hu pasang iek saong ngin oh lagaih./.