# Harei 14/3, pak tỉnh Vĩnh Phúc, Uỷ ban bhap bani tỉnh Vĩnh Phúc peih bruk taduan mek bằng inem mek pakat negar inem krung dak rai sajarah saong danh lam thắng cảnh Tây Thiên - Tam Đảo (huyện Tam Đảo) saong inem krung kiến trúc nghệ thuật Tháp Bình Sơn (huyện Sông Lô). Pak nan, lambaok urang pal akaok Đảng saong karja, Phaok Thủ tướng Raja-ei Vũ Đức Đam hu pok brei Bằng công nhận Inem krung Pakat negar ka 2 inem krung di tỉnh Vĩnh Phúc nan lac inem krung dakrai saong danh lam thắng cảnh Tây Thiên - Tam Đảo (huyện Tam Đảo) saong inem krung kiến trúc nghệ thuật Tháp Bình Sơn (huyện Sông Lô). 

# Thủ tướng rajaei bahrau mbaoh tangin brei ngak đề án patagok kapul urang jakar công chức, viên chức urang bangsa takik dalam tuk vak bahrau. Jalan ngak daok pamong tal nan lac pasiam thể chế, sarak ka bruk palih ruah, pandar song khik ramik kapul urang jakar công chức, viên chức urang bangsa takik piah dak padang, patagok urang jakar công chức, viên chức urang bangsa takik, hu akaok sahaneng chính trị khang kajap hu hatung hatai siam, hu ilamu ngak bruk, rik dong pakhang patagok siam lagaih dalam bruk khik ramik karja. Patagok parilo urang jakar công chức, viên chức urang bangsa takik di dom jabat  karja

# Biar harei 14/3, Ủy viên Bộ Chính trị, Akaok Ủy ban Trung ương mặt trận Negar Việt Nam Nguyễn Thiện Nhân tadhau ayuh ong Nguyễn Thế Kỷ, urang dang Akaok bahrau di Rayo sap ndom Việt Nam. Tadhau ayuh Urang dang akaok bahrau di Rayo sap ndom Việt Nam, ong Nguyễn Thiện Nhân ndom lac: dalam  71 thun tapa, Rayo sap ndom Việt Nam hu rik daong biak prong ba taneh aia salih bahrau taong abih gah. Lac urang ka 6 taduan bruk dang Akaok Rayo sap ndom Việt Nam, tukvak ini hu makna biak prong tuk dalam taneh aia bahrau ngak hu jayak Nyaom roya Đảng pakat negar mbang ka 12 saong anak tal nan lac peih bruk Palih ruah urang ka Quốc hội mbang 14 saong urang ka Hội đồng bhap bani dom pakat vaktu 2016-2021.

# Harei kabroi 14/3 di ban sit Điện Biên Phủ, Tổng cục Du lịch (mintri ilamu, Thể thao song  Du lịch) pambuak bruk song UB bhap bini Điện Biên peih nyaom biai patagok pandap du lịch dalam tỉnh. Tuk vak tapa, tinh Đ.Bien hu iek prong bruk patagok du lịch. Du lịch dong biak prong tame bruk patagok KT, patruh eik patrun kathaot, khik ramik ilamu di tỉnh. Thun bloh, ĐB taduan hu labaih 420.000 tuai damuai. Labaih 30 tham luận hu ndom puac dalam nyaom biai pataom tame bruk paglaong labik dang di dom puk palei dalam bruk patagok du lịch bhum Tây Bắc, jalan patagok pandap du lịch song patagok du lịch Điện Biên khang kajap.

#  Công an huyện Mù Cang Chải, tỉnh Yên Bái bahrau cap mek urang angan Giàng A Sử, ndih tapui thun 1988, bangsa Mông, daok pak palei Háng Cơ Bua, xã Púng Luông, huyện Mù Cang Chải, urang ngak brei khuah glai dalam harei 9/3/2016 meng blaoh, ngak khat lahik 50ha glai thông labaih 20 thun. Pak jabat điều tra, urang angan Sử hu taduan mek bruk ngak suan adat hukum di drei. Urak ini jabat điều tra daok ngak hồ sơ bruk ini.

# Melam 14/3, di xã Hòa Đồng, huyện Tây Hòa, tỉnh Phú Yên, mBan liên lạc Kapul urang dahlau deih ngak bol lin Trường Sa peih mbang taom gaok pahadar 28 thun :“Sự kiện Trường Sa” (14-3-1988- 14-3-2016). Jiak 400 urang dalam Kapul urang dahlau deih ngak bol lin Trường Sa mai meng dom tỉnh, ban Đà Nẵng, Bình Định, Phú Yên, Khánh Hòa, Ninh Thuận, Đắc Lắc, Bình Dương mai pataom mbaok, pahadar, dar phol dom đồng đội anh dũng mesruh metak var klak rup drei di palao Gạc Ma. Di mbang taom gaok. Urang ba gauk hadar veik sa saman hào hùng, khang hatai pan phao khik caga tasik, pulao Trường Sa, chủ quyền ginreih di taneh ia, saong daok pachreih ba gauk, dong ba gauk dalam rai duik.

          7 # Tỉnh Bình Thuận urak ini hu jaik 90.000 urang daok kurang aia pandar. Dalam nan, trak di abih lac huyện Hàm Tân; bruk kurang aia rah tabiak di taong abih dom xã – bal sit, ngan haong 40.000 urang kurang aia pandar meng puac bilan 2. Mikva njauk nao blei aia meng tỉnh Đồng Nai saong Bà Rịa - Vũng Tàu ba mai  pandar. Meng akaok bilan 3 ini, pak Bình Thuận, hu 3 hệ thống ba aia hacih padeih bruk ba aia. Dom hệ thống ba aia hacih karei meda peih ngak suai di abih tal puac bilan 4 thun ini.

Khaw tin dunya:

# Harei 14/3 Akaok Vụ Xúc tiến công nghiệp di mintri ngak Kong Thái Lan, ong Xổm-chai  brei thau negar ni hu peih sa chiến dịch bahrau piah pabel itabiak negar langiu dom pandap ngak Kong tapa VN. Dom DN mbiah song sit SME) di Thái Lan dok hu pachreih ba ngak tabiak song pablei tabiak negar langiu dom janih pandap tapa darak pasa VN, negar pambuak bruk pablei salih prong ka 4 di TL dalam khu vực ASEAN. Tui ong, VN hu mong lac dok duah thau bruk đa dạng ka dom janih mẫu song pandap panda ka dom pandap ngak cong dalam nan hu dom pandap di TL.

# Hadei di 6 thun padang ngak, tháp Thượng Hải hu ngak salah blaoh saong daok caga raok tuai damuai mai rivang ma-in. Tui panuac di Hội đồng Sang glaong tal saong Đô thị Habitat di bilan dahlau, tháp Thượng Hải hu ba tame anagn lac baoh sang glaong dang ka dua dunya, tok dang hadei baoh sang Burj Khalifa pak Dubai. Hu công ty Gensler Mỹ thiết kế, tháp Thượng Hải glaong 632 m, daok pak khu tài chính di bal. Sang tháp bahrau ini glaong tapa dua baoh sang glaong abih pak Trung Quốc nan lac Pasak Jien padai Dunya Thượng Hải (492 m) saong Tháp Jin Mao (420,5 m). 

# Cao ủy Liên hợp quốc ka urang tỵ nạn, hu panuac lac dom urang di cư di trại tị nạn Idomeni di tapen jalan negar Tây Bắc Hy Lạp jiak song Macedonia doklaik tame kan kandah trak. Urak ni hu labaih  14.000 urang dok gar di dom labik tapen negar Hy Lạp- Macedonia hadei di tuk Macedonia kreik pambah mban. Urang duik dok dalam khu trại tạm lac 12.000 urang dalam tuk 2000 urang karei dok di gah langui dom mblang taneh. Rilo uranaih ba tame sang eik ruak kayua njom dom janih virus song kan si suak yava tuk bruk vệ sinh  dak harei dak trun./.