# Biar harei (26/5) pak jabat Raja-ei, Thủ tướng Nguyễn Tấn Dũng hu van taom gaok urang lambaok dom trí thức dalam Liên hiệp dom Kapul  khoa học kỹ thuật Việt Nam. Pak van taom gaok,  Thủ tướng Nguyễn Tấn Dũng hu panuac lac: raja-ei biak sangka, daong palagaih ka dom urang khoa học, kapul nyaom trí thức saong Liên hiệp dom kapul  khoa học kỹ thuật Việt Nam patui veik ngak siam bruk ngak di drei, rik daong tame bruk dak padang sapng patagok di taneh aia.

# Patui mbang nyaom ka 9, QH mbang 13, mesup harei 27/5 dom urang QH pang harak pathau khan pasang iek dự án hukum tổ chức cơ quan điều tra hình sự;, ginum biai di Hội trường ka danak dak padang ngak hukum adat di QH thun 201, pasiam danak dak padang adat hukum mbang 13 song thun 2015 song ginum biai paka 60 di hukum BHXH thun 2014. Beir harei, QH  ginum biai di tổ ka dự án hukum tố tụng hình sự (pasiam veik).  

# Page harei (26/5), Mentri Thông tin truyền thông pambuak bruk haong Ủy ban bhap bani tỉnh Nghệ An peih parang iek bản đồ saong parang tabiak tư liệu ngan haong kadha “Hoàng Sa, Trường Sa di Việt Nam – dom bằng chứng dakrai sajarah saong adat hukum”. Pak mbang parang iek ini, langiu di bruk parang tabiak, meyaih khan ralo harak tư liệu, văn bản, kaya panda pambuak pagam tal dua pulao Hoàng Sa, Trường Sa, daok hu jaik 100 bản đồ hu brei thau meng kan mai di dom urang roh duah, học giả dalam saong langiu taneh aia. Dom tư liệu parang iek, meyaih khan pak mbang parang iek brei mboh dom karja Việt Nam meng saman phong kiến tal saman xã hội chủ nghĩa hu khai phá, xác lập, peih ngak saong khik caga chủ quyền taneh aia ngan haong dua baoh pulao Hoàng Sa-Trường Sa saong ralo bhum pulao tasik karei di taneh ia Việt Nam. Mbang parang iek meda rah tabiak meng harei 26 tal harei 30/5/2015.

# Meng di tuk peih  ngak sarak BH thất nghiệp mbiah tal harei ni, tỉnh Quảng Nam hu labaih 27 ribau urang oh hu bruk ngak hu mbang tui trợ cấp song yaom jien buh tabiak labaih 154 tỷ đồng. Hu thau, urak ni di tỉnh hu labaih 2.600 po pandar urang ngak hu đóng BH thất nghiệp ka 110 ribau urang ngak. Pasak dịch vụ bruk ngak – Sở Lao động Thương binh song  Xã hội tỉnh Quảng Nam hu peih bruk langyah pathau khan bruk ngak ka yaok ribau urang oh hu bruk ngak, samar duah hu bruk ngak ba drei tame bhap bini.

# Huyện Đam Rông, tỉnh Lâm Đồng urak ini hu 16 mô hình điển hình baoh sang dam dara urang Đoàn cakrok patagok kinh tế hu jien mek tame labih 200 triệu đồng yaok thun. Dom jalan ngak mbang ini kayua dam dara urang  Đoàn  ngak po patagok kinh tế tui jalan padang ngak dom bein – danao, bein – van ro, bein – danak – van ro. Huyện đoàn Đam Rông hu palih ruah ini lac dom jalan ngak mbang siam piah pambak prong ka dam da urang đoàn puk palei, abih di nyu lac dam dara urang bangsa takik mai bac megru ilamu ngak mbang, iek glang phun pala, anek athur raong ba mai ralo jak jeng siam mekre.

# Dalam tỉnh Đắc Nông urak ni hu jiak meteh dalam abih tih 150 HTX padeih ngak bruk atau gaok rilo kan kandah dalam bruk sx. Piah pasiam veik song dong ka dom HTX ni ngak bruk hu kein lagaih. Ong Bùi Hoa Thám, Phó chủ tịch Liên minh hợp tác xã tỉnh Đắc Nông brei thau:  Đắc Nông hu sangka tal bruk padang dom kapul pambuak bruk song HTX  tui jalan pambuak pagam dalam bruk ngak nong, rik dong dalam bruk dong duah bruk ngak song duah hu jien di yaok ribau urang.

# Tal ini, Kapul urang sup meta (takhlaoh) bal Đà Nẵng hu tín chấp Gilang pariak Sarak karja saong meng kadung jien negar langyah brei ka yaok rituh mbang urang sup meta mesre labaih 6 tỷ đồng patagok bruk ngak mbang kinh tế, tui dom jalan ngak yau raong glang, pablei salih sit, blei dom janih pandap piah ngak mbang... Urak ini, Kapul urang sup meta bal Đà Nẵng hu 7 labik ngak bruk xoa bóp ấn huyệt, ngak pandap thủ công mỹ nghệ yau tăm krem, gai puh bah... ba bruk ngak tani tanat ka labaih 200 hội viên ngan haong jien bilan meng 1 triệu 600 ribau  tal 2 triệu meteh sa urang sa bilan. Ong Võ Văn Ngọ, Akaok kapul Urang sup meta bal Đà Nẵng brei thau:  Dalam tukvak 2010-2015, danak dak ba brei bruk ngak ka hội viên mesre jien phun oh hu mek jien jhung ngak mbang kinh tế mboh hu ralo siam mekre, tapa truh eik patrun hu kathaot saong paglaong akaok saneng ka hội viên. Patagok dom jak jeng siam mekre, dalam dom thun tal, gam peih prong gam patagok  quy mô piah ka urang sup meta (takhlaoh) hu ralo bruk ngak jang. Langiu di nan daok tranh thủ phun jien meng Trung ương hội saong dom kapul nyaom karei piah ka hội viên mesre.

Patui di ni dom khau tin dunya:

# Tân hoa xã hu ba panuac di cảnh sát Lào brei thau, 10 anek saih tiểu học lihik tuk sa boh kapan pajeng tuai gaok bala di angaok krong Nam Ngum labik nduac tapa Pắc-Ngum (Pak Ngum) atah di ban ine Viên-chăn (Vientiane) labaih 60 kilômét. Tui khau tin, bala nan rah tabiak di mesup harei 27/5. 10 anek saih lihik dalam mbang gaok bala dalam nan hu 8 uranaih kamei song 2 uranaih likei. Karja Lào huac lac dom anek saih ni metai. Boh kapan gaok bala tuk dok pajeng 35 anek saih bac tal 5 song 4 gru pato. Tong abih tuai damuai di angaok kapan oh chuh aow phao, dalam tuk boh kapan tok brei pajeng rilo di abih 15 urang. Karja Lào dok duah thau bruk ini.

# Harei (26/5), kapul ngak pahla Ót-pham (Oxfam) brei thau hu takik abih 16 triệu urang Yêmen daok oh hu aia hacih piah pandar, tuk  Arập Xêút patui veik dom mbang không kích piah taong tayah kol phiến quân Hu-thi (Houthi) pak Yêmen. Dalam panuac brei thau harei 26/5, Ót-pham khan lac, dom mbang không kích di Arập Xêút ngak brei rilo urang Yêmen oh hu aia hacih piah pandar. Kapul ngak pahla Ót-pham jeng khan lac, mbuan si tamuh jit ruak prong pak Yêmen yau ruak pandiak dom, jit tả saong aih craoh tuk bhap bani daok pandar ia oh hacih.

# Tuai du lịch Mỹ mai rivang Cu ba tagok khang dalam thun ni, kayua talei pambuak bruk di 2 negar dok dalam tuk vak “patagok”. Tui khau tin bahrau di abih, dalam 5 bilan tapa hu jiak 51 ribau 500 tuai du lịch Mỹ mai rivang Cuba. Tuai du lịch Mỹ oh hu gauk gar di Cuba mai negar ni jeng tagok khang, yaok ribau urang ni mai Cu ba meng dom negar ka 3 yau Mê-hi-cô, piah plaih dom giới hạn gah du lịch di Mỹ. Oh lac hu tuai du lịch Mỹ, tuai dunya mai Cu Ba jeng tagok 14% dalam thun ni dut song tuk vak ni thun dahlau.