Khaw tin 10h30 saong 14h30 harei 17-10-2015 

# pak van peih bruk “Bilan tabung glaong brei ka urang kathaot” thun 2015 kayua Ủy ban Trung ương Mặt trận Negar Việt Nam peih ngak di harei 16/10 pak Hà Nội, Phaok Thủ tướng Vũ Văn Ninh pok sap iew bhap bani dalam saong langiu negar, dom doanh nghiệp, jabat, dom bol lin pal phao karaong iek glaong ilamu gul pataom, daong ba gauk meng pandap panda tal tinh thần ka bhap bani kathaot dalam negar. Pak van peih bruk, Ủy ban Trung ương Mặt trận Negar Việt Nam hu taduan mek jien brei ka urang kathaot Trung ương jaik 18 tỷ đồng.

# Harei 16/10, di Đà Nẵng, Bộ Tư lệnh Quân khu 5 peih bruk  pahadar 70 thun harei truyền thống tapon nyom bol pan phao kraong Quân khu 5 ( 16/10/1945- 16/10/2015). Tapa nan, lambaok ka dom urang dang akaok Đảng, karja, Phó Thủ tướng Nguyễn Xuân Phúc hu alin Huân chương Quân công hạng nhất ka tapon nyom bol pan phao kraong Quân khu 5. Lambaok mintri Quốc phòng Lào hu pok Huân chương Tự do hạng Nhất di karja Lào ka tapon nyom bol pan phao kraong Quân khu 5. 

# Ủy ban bhap bani tỉnh Quảng Ngãi bahrau brei thau: Kadung jien daong brei oh bayar gilac di jabat Pambuak bruk dunya Hàn Quốc (Koica) meda daong ka  tỉnh padang ngak sang mac halang mbak jeng aia taba. Phun jien buh tame ngak sang mac tui kuhria dahlau nan lac 260 tỷ đồng. Sang mac hu công suất 2.000m3 sa harei melam, ginup ba aia taba ka labaih  16.000 urang angao pulao prong di huyện pulao Lý Sơn.

# Sở ngak nong saong patagok palei pala tỉnh Đắc Lắc barau peih nyaom biai yaih khan ka dankadak salih bruk ngak nong khang kajap di Việt Nam (VnSat – vi en sát) mai meng dom gah khik ramik, dom hợp tác xã saong dom sang ngak nong pala cà phê dalam tỉnh. Dự án VnSat kayua gilang pariak dunya daong, jien dau tu abih tih jaik 300 triệu Đô la Mỹ, tukvak meng thun 2015 tal thun 2020 di 13 tỉnh ban . 

       # Mentri Xây dựng kuhria dahlau phun jien piah padang ngak sang daok ka anek saih, sinh viên dalam negar tukvak 2016-2020 nan lac jaik 9.000 tỷ đồng. phun jien ini meda mai meng phun jien karja atau jien trái phiếu Raja-ei. Tui kuhria di Mentri Xây dựng, ta-eng thun 2016 caong khin jaik 1.000 tỷ đồng. kayua bruk xã hội hóa buh jien tame ngak ký túc xá ka nek saih, sinh viên biak kan kandah nan ye bruk đầu tư meng kajien karja piah patagok labik daok ka đối tượng ini nan lac bruk njauk ngak dahlau. 

# Tui urang dang akaok tỉnh Bình Dương , dalam dom bilan akaok thun 2015 tal abih thun 2016, Bình Dương meda pataom tame langayh dom labik ngak nerak alam moi truong di dom puk palei dalam tinh. Taphia nan, caik dahlau patagok dom gah sản xuất công nghiệp siam ka alam moi truong, hu  yaom  glaong, hacih, patak pataom nguyên liệu.

# "Tố Hữu ngan haong ilamo bangsa" nan lac angan di nyaom biai kayua  Pasak khik ramik saong patagok ilamo bangsa Việt Nam pambuak haong kapul nyaom thơ Đường luật Việt Nam peih ngak dalam harei 16/10 pak Hà Nội, tukvak pahadar 95 thun harei menek di ong. Pak nyaom biai, dom urang lambaok brei thau: Labaih sa meteh abap tapa, thơ Tố Hữu jeng lac sap ndom jam ji jaik taphia haong urang puac, nan lac hatung hatai di sa urang ranam taneh aia, sa urang cách mạng anak dom cuang kandah di taneh aia tapa dua mbang mesruh rambah rambup. 

Khaw tin dunya

 # Tổng thống Venezuela Nicolás Maduro (Ni-cô-lát Ma-đu-rô) khan brei thau meda patagok 30% jien bilan tối thiểu ka urang ngak taneh ia ini kuhria meng harei 1/11 tal. Tui nan, jien bilan takik di abih di urang ngak Venezuela meda di tanut 1.531 USD . Langiu patagok jien bilan, urang ngak saong công nhân Venezuela daok hu tandun mek thẻ blei pandap mbang menyum yaom tal labaih 1.000 USD. 

# Akaok Mentri Giao thông Đức A-lếch-xăng-đơ Đô-brin (Alexander Dobrindt) bahrau brei thau, jabat giám sát ô-tô di Đức hu yêu cầu kapul nyaom Vôn-xoa-gen (Volkswagen) taduan mek gilac 2,4 triệu radaih ô-tô pagam phần mềm gian lận phát thải pak negar ini. Akaok mentri A-lếch-xăng-đơ Đô-brin brei thau, bruk mek gilac meda hu peih ngak dalam akaok thun 2016, ala bruk mong iek di jabat ngak gah radaih cơ giới di Đức (KBA).

# Dom urang alamu Mỹ hu duah mboh sa janih protein meda daong duah tabiak dom janih jru iek ruak Alzheimer. Kadha ini hu ba tabiak di tạp chí "Science Translational Medicine" (Y học Tịnh tiến khoa học), tabiak harei  14/10. Piah peih bruk roh duah, dom urang alamu hu phân tích não bộ di dom drei tikuh ruak lahik trí nhớ di dom cấp độ karei di gauk. Tapa ngak bruk hu mboh protein hu angan ieu GPR3 daong pasiam akaok sahaneng  saong trun takik dom triệu chứng di ruak var drei.