Khaw tin 10h30 saong 14h30 harei 18-5-2016

         # Page harei 17/5, huyện Phong Điền, bal sit Cần Thơ peih bruk brei thau saong taduan Quyết định huyện mek hu chuẩn palei pala bahrau. Ủy viên Bộ Chính trị, Akaok Quốc hội Nguyễn Thị Kim Ngân hu mbaok van ngak lễ. Akaok Quốc hội Nguyễn Thị Kim Ngân ndom lac: "Khaol drei njauk pasiam veik dom kadha oh ka ngak hu saong patagok dom jak  jeng mek hu, pachreih dom tầng lớp bhap bani sa tangin rik daong pren yava padang ngak palei pala bahrau, dak padang bhummi kaya meda, văn minh."

       # Bair harei 17/5, kapul ngak bruk di Ủy ban Thường vụ Quốc hội, Hội đồng pilih ruah negar kayua Phó Chủ tịch Quốc hội, Ủy viên Hội đồng pilih ruah negar  Uông Chu Lưu ba akaok barau pasang iek bruk kuhria caga pilih ruah urang ka  Quốc hội mbang XIV saong urang ka Hội đồng bhapbini dom pakat, tukvak 2016 – 2021 di tỉnh Sóc Trăng.  Brei panuac di var ngak bruk, ong Uông Chu Lưu ndom lac, tỉnh Sóc Trăng njauk pataom tame pathau khan dalam tal yaok cử tri tapa dom jalan piah mikva thau cambaih makna ka mbang pilih : Meyah mikva oh thau hu asal kadha ye oh  ginup cơ cấu, thành phần, số lượng, abih di nyu nan lac tiêu chuẩn chất lượng di dom urang hu pilih ruah.

       #  Pahadar 126 thun harei menek di Chủ tịch Hồ Chí Minh, melam kabroi (17/5), yaok rituh  urang đoàn, dam dara lambaok ka dom kapul nyaom, urang naih gheih di Sơn La hu mbaok tame danak dak ndom biai nao mai, ginum biai ngan haong kadha “Hồ Chí Minh hadah miat angan Urang”. Dom urang lambaok hu klah rabha dom ilamu, dom jalan ngak gheih di rup drei dalam bruk bac megru saong ngak tui jalan diuk rai siam mekre di Wa Ho dalam dom gah yau: Dak padang palei pala bahrau, grap tanat an ninh quốc phòng, pato pakai saong pathram rup babhap....

         # Văn phòng thường trực Ban tacei pato pacang caga bala meng lingik tasik saong duah daong bala tỉnh Bình Thuận harei kabroi (17/5), tabiak panuac lac ikan raong lồng bè dalam huyện pulao Phú Quý metai biak rilo.  Tui panuac khan meng huyện pulao Phú Quý : jaik 4 tuk pagaiy harei 15/5, di labik Lạch Dù, xã Tam Thanh, huyện Phú Quý hu mboh ikan raong lồng bè di 4 sang raong metai labaih 800 drei. Makna hu brei thau lac kayua tal tukvak raong hala lá lụa nyu ralai, gam saong lingik pandiak bhang ngak ka ia tasik di labik nan kurang oxy, ngak ka ikan raong dalam lồng bè metai .

       # Biar harei kabroi (17/5), Ban Tuyên giáo Thành ủy Bal raya Hồ Chí Minh peih họp báo brei thau ka makna ngak ka yaok pluh tấn ikan metai kandong angaok kênh Nhiêu Lộc - Thị Nghè. Tal 17 tuk biar harei 17/5, số lượng ikan metai srong tagok angaok kênh Nhiêu lộc - Thị Nghè nan lac 14 tấn, mboh ralo nan lac ikan rô phi saong ikan chép. Makna brei mboh nan lac kayua mbang hajan biar harei kabroi ngak ka ralo độc tố angaok jalan, dalam dom jalan mbrong tuh trun kênh nan ye ba tal ô nhiễm. Nồng độ di dom chất nan lac NH3, NH4 glaong saong trun lượng dưỡng khí nan lac mekna ngak ikan metai. Ndom ka jalan ngak anak metai, dom gah chức năng hu panuac kakei bhap bani juai srong ikan metai piah mbang kayua ikan nan njaom  độc.

        # 2 mbang hajaln praong hu ngin khang dalam dom harei 16 saong 17/5 ngak ka rilo taneh darieng jaik paik baoh pablei di huyện Long Thành, tỉnh Đồng Nai druic baok. Khat lahik trak abih lac di ấp 7, xã Bình Sơn saong ấp Bàu Tre, xã Bình An, huyện Long Thành. Jaik pluh ha lac khat lahik di yaok pluh tấn darieng gaok druic baok, yaom jien yaok ratuh triệu đồng. Ông Trần Anh Tùng, sa dalam dom sang gaok khat lahik trak di ấp 7, xã Bình Sơn brei thau : Mbang angin harei kabroi ngak ka beir durieng di sang kol dahlak khat lahik biak rilo, baoh druac  jaik 30%, ye beir ini lac jaik 5 tấn durieng .)

       # Harei 17/5, gah chức năng tỉnh Tiền Giang peih bruk duah thau ngak cambaih makna saong samar pasiam veik bruk mbaih jalan mbrong aia BOO Đồng Tâm – canah tapa labik xã Bình Đức, huyện Châu Thành ngak cúp aia, pambak tal bruk ngak mbang ngak huak di yaok pluh ribau baoh sang di dom huyện thị gah Pur di tỉnh ini. Tapa pasang iek di dom gah chức năng brei mboh, meda kayua áp lực di dom sruh radaih pajeng ba trak nao mai lavik harei angaok jalan mbrong ba tame Sang mac aia Bình Đức (pak co chữ T) ngak ka co ini joh kayua xì mối hàn.

        Khaw tin dunya

     /.Harei 17/5, Giám đốc điều hành Công ty radaih puac Liên bang di Áo Crít-xti-an Kơn (Christian Kern) hu pok ngak Thủ tướng barau di taneh ia ini. Ini lac sa bruk ngak bo rajaei tui jalan trung dung di Áo jia lac meda daong cakak bruk tamuh tagok di gah cực hữu.

       # Raja-ei Mỹ harei kabroi (17/5) hu brei pacadu dom adat hukum taong phạt kinh tế ngan haong My-an-ma hadei di tuk negar Đông Nam Á ini hu raja-ei dân sự kayua đảng Liên đoàn Negar brei ka Dân chủ (NLD) dang akaok pak mbang palih ruah tổng thống meng bilan 11 thun dahlau. Dalam harak pathau khan, Mentri Jien padai Mỹ brei thau cambaih laih quyết định di Mỹ hu brei pacadu dom pacang cakak ngan haong bruk jien padai di My-an-ma, ba 7 công ty quốc doanh tabiak truh talei angan taong phạt, taphia di nan ramik veik dom adat hukum, palaghaih ka bruk pajeng ba pandap panda tapa pabah lamnge saong mblang kapal haok.

      #  Campuchia barau dauh mboh jit kum menuk ada di tỉnh Cam-pot, sa  tỉnh daok taphia Kiên Giang, Việt Nam. Ông Ly So Van, urang brei panuac di mintri y tế Campuchia khan lac, tapol menuk 350 drei di sa urang nong di huyện Chuốt (Chhot) gaok ruak saong metai rilo jaik sa adit tapa. Hadei nan dom gah chức năng hu mek mẫu dut iek saong brei mboh dương tính saong virust kum  A-H5N1. Tapol menuk nan hu ba nao cuh tui njauk hukum.