Khaw tin 10h30 saong 14h30 harei 19-9-2015

/ Kayua ribuk ka 3, dom harei tapa di tỉnh Quảng Bình daok hu hijan khang ngak dauk rilo labik, pacang cakak 189 boh sang urang bangsa Rục di xã Thượng Hóa, huyện Minh Hóa haong gah lingiu. UB bhap bini huyện Hướng Hóa hu buh tabiak labaih 50 triệu đồng piah dong blei brah, mek ghe jamriak pajeng tal tangin bhap bini, oh caik ka hu urang halei kurang brah mbang

# Bilan Đông ini, tỉnh Nghệ An hu drak labaih 5.300 ha tangei đông, 725 ha ritak lo saong labaih 1.000 ha njam patam dom janih. Anak bruk hajan praong dui atah dom harei tapa, gah ngak nong tinh hu tacei pato dom gah tabiak bruk pacang caga hajan ia xua piah trun takik khat lihik tuk lingik oh siam.

/ UB bhap bini tỉnh Bình Định bahrua patabiak sarak dong peih ngak Đề án “Ngak iek bruk taong cap, blei, chế biến, pablei ikan ngừ đại dương” Tui nan, UB bhap bini tỉnh hu dong ka 25 po kapan hu mbaok tame đề án pasiam veik hầm khik piah, ngak hầm hạ nhiệt, tui yaom jien dong 30 triệu đồng sa sruh kapan. Dong pachreih thuyền trưởng song thuyền viên ngak tui jalan mek hu tanut chuẩn pablei tabiak negar Japon, yaom dong 50 ribau đồng sa kg ikan ng ừ. Tuk vak peih ngak sarak dong nan dalam 2 thun,  2016- 2017. 

# Kadung jien daong uranaih tỉnh Bình Dương barau pambuak bruk saong Sở Lao động – Thương binh saong Xã hội barau peih harei pataom trung thu saong alin brei jien bac ka 1.000 uranaih sang kan kandah daok di 9 huyen, ban sit dalam tỉnh Bình Dương. Dalam harei pataom trung thu, dom urang hảo tâm hu daong jien labaih 3 tỷ đồng.

/ Piah khik hacih saat pandap mbang ka bhap bini dalam tuk tết trung thu, tỉnh Sóc Trăng hu padang dom kapul pasang iek liên ngành peih bruk pasang iek dom labik ngak, pablei salih pandap mbang ka darak pasa trung thu dalam tỉnh. Meng ni tal harei trung thu, dom kapul pasang iek liên ngành tỉnh brei jhul pakhang bruk pasang iek, duah thau, piah khik hacih saat pandap mbang ka urang blei mbang.

# Ban sit Cần Thơ urak ini hu 7 xã hu brei angan lac xã palei pala barau, tal puac thun ini, hu 4 xã tra ngak blaoh 20 chỉ tiêu xã palei pala barau. Urak ini, mban Dân vận Thành ủy Cần Thơ  daok tacei patao dom gah patagok siam lagaih di dom bruk pakacah gauk padang ngak palei pala barau piah daong puk palei ngak blaoh blai dom cong trinh praong tui njauk tukvak ba tabiak. 

/ Dom boh sang rong hadang di bhum njom mbak, tapen tasik dalam 3 huyện nan lac Duyên Hải, Trà Cú song Châu Thành (di tỉnh Trà Vinh) mek hu labaih 21.000 tấn hadang dalam bilan rong thun 2015, trun jiak 10.000 tấn dut song tuk vak ni thun dahlau. Tui tong yaom di Sở ngak nong song patagok palei pala tỉnh, hadang rong trun khang kayua  langik tasik oh lagaih, labik rong njom nerak tachuak. Urak ni hu labaih 5.500 ha di 8,500 boh sang khat lihik ngan song sa tỷ drei hadang pajaih, rilo meng dok di 2 huyện Cầu Ngang song Duyên Hải.

Khaw tin dunya

# Bruk pametai vi khuẩn di dom janih xà phòng rao tangin kháng khuẩn hu hóa chất "triclosan" oh siam jang duk saong dom janih thông thường. Nan lac bruk roh duah hu di jabat khik ramik pandap mbang saong jru tavao Mỹ (FDA) ba tabiak angaok Tạp chí Hóa học trị liệu kháng vi trùng (JAC) harei 15/9. Tui dom chuyên gia, hóa chất triclosan meng lavik mai lac sa dalam dom janih hu rilo dalam dom janih xà phòng kháng khuẩn, hu yaok triệu urang blei pandar saong ba jien tame yaok thun tagok tal 1 tỷ USD di darak pasal Mỹ.

/ Lagam lagu Cuba hu yam tabiak dunya meng bruk mbaoh tangin tame harak pambuak bruk di Sony Music song hãng đĩa prong abih di Cuba ka bruk ba pablei dom sản phẩm âm nhạc di negar ni angaok darak pasa negar langiu. SoNy, lac sa dalam 3 hãng thu âm prong abih di dunya, hu panuac khan lac ba pablei độc quyền di darak pasa negar langiu dom tác phẩm âm nhạc meng thun 1960 mbiah tal harei ni di bản quyền di hãng đĩa Egrem (Cuba).

# Labaih 2.000 baoh đèn lồng hu truac hadah dalam harei peih akaok bilan Trung thu thun 2015 di khu phố urang Lo (Hoa) (China Town) di Singapore. Phó Thủ tướng Singapore Tharman Shanmugaratnam (Tha-man San-mu-ga-rát-nam) ndom lac, nan sa bruk ngak yaok thun saong lac sa bruk oh kurang hu tuk Tết Trung thu, brei mboh bruk gheih mekre, ralo janih ilimo di taneh ia rilo bangsa di Singapore.