Khaw tin 10h30 saong 14h30 harei 21-10-2015

 # Patui danak dak mbang nyaom ka 10 Quốc hội mbang 13, harei ini 21-10 Quốc hội ngak bruk pak hội trường pang harak pathau khan ka dự án Hukum quân nhân chuyên nghiệp saong urang ngak gah quốc phòng, pang harak pathau khan, langyah, taduan mek panuac, pasiam veik dự thảo Hukum ngak bruk pasang iek di Quốc hội saong Hội đồng bhap bani saong ginum biai pak hội trường ka dự thảo Hukum ini gam haong dự thảo Hukum kế toán (pasiam veik).

# Melam 20/10, pak Hà Nội, Jabat Liên hợp quốc ka bruk likei kamei samu gauk saong ba brei quyền ka urang kamei (UN Women) saong Trung ương Kapul Liên hiệp Dam dara Việt Nam, Pasak Halar tian Negar peih ngak danak dak “Jhul patagok bruk likei kamei samu gauk pak Việt Nam” ngan haong kadha “Yam tagok gah anak: Urang likei sanya brei ka bruk likei kamei samu gauk”. Tapa nan, biak ralo dam dara Việt Nam hu klah rabha dom jalan sahneng, dom bruk ngak daong jhul patagok bruk likei kamei samu gauk saong tah klaak bruk iek lap kumei, iek glaong likei. 

# Harei 20/10, pak Hà Nội, Mentri Ngoại giao peih bruk ginum biai “Jalan cakrok patagok dom bruk ngak mbang kinh tế tasik: Ilamu di Na Uy saong triển vọng pak Việt Nam”. Hu mbaok tame mbang ginum biai hu labaih 100 urang lambaok dom mentri, ngành, viện roh duah saong urang blei salih Việt Nam dalam gah kaya ikan dalam aia, ngak gilai... dom urang lambaok hu ginum biai haong gauk ka dom hagiat daok rah tabiak dalam bruk cakrok patagok bruk ngak mbang kinh tế tasik di Việt Nam, dom jalan ngak paglaong pren meriak gauk dom bruk ngak mbang kinh tế tasik di Việt Nam, jang yau tiềm năng saong cơ hội pambuak bruk di Việt Nam saong Na Uy dalam bruk ini. 

# Harei 20-10, pak Hà Nội hu peih nyaom biai dunya ka bruk pacang cakak jit ruak laka cambuai tapok kakau kayua Mentri Ngak nong saong Patagok palei pala peih tabiak. Urak ini, Việt Nam daok kham merat pasang iek ruak laka cambuai tapok kakau tapa bruk peih ngak dom danak dak negar pacang caga saong cakak abih ruak laka cambuai tapok kakau dalam 2 mbang (meng 2006-2015). Mentri Ngak nong saong patagok palei pala daok hu harak pathau tagok likau Raja-ei patui veik peih ngak danak dak pacang cakak jit ruak ini mbang ka 3 (2016 -2020).

# Kapul urang kamei tỉnh Thừa Thiên-Huế bahrau peih bruk taom mbaok, pok meyaom urang kamei hadah krah di dom gah tukvak pahadar 85 thun harei padang Kapul urang kamei Việt Nam. Hu 3 kapul nyaom saong 22 manuac urang hu pok meyaom ka bruk ngak naih gheih di drei dalam dom gah yau: kinh tế, y tế - pato megru, khoa học- công nghệ, ilamo nghệ thuật... Tukvak tapa, dom pakat Kapul urang kamei tỉnh Thừa Thiên Huế hu peih ngak ralo phong trào pakacah yau “Urang kamei daong gauk patagok kinh tế”; “rik daong jien phun payeng vin”; “Mbaik krem patak pataom”,…, daong ka ralo urang kamei hu rai diuk kan kandah yam tapa truh kan kathaot.

 # Harei kabroi (20/10), pak tỉnh Khánh Hòa, Công ty Cổ phần cà phê Mê Trang peih bruk pahadar 15 thun dak padang saong patagok (20/10/2000 -20/10/2015). Tui nan, công ty hu rik daong bol lin bhap bani huyện pulao Trường Sa, tỉnh Khánh Hòa labaih 170 triệu đồng. Tapa 15 thun cakrok patagok, Công ty cổ phần cà phê Mê Trang hu ralo bruk ngak pamong tal pulao tasik yau: Bản đồ baoh pulao Trường Sa meng asal cà phê, Rik pataom kadung jien brei ka Trường Sa ranam... Pak van pahadar, ong Lê Thanh Quang, Bí thư Tỉnh ủy, akaok Hội đồng bhap bani tỉnh Khánh Hòa klah rabha: Khaol drei mboh, dak padang kadung jien piah daong ka bol lin saong bhap bani Trường Sa. Dahlak caong khin yaok urang menyum sa cavan cà phê meda rik daong Kadung jien brei ka Trường Sa ranam. Dahlak caong khin khaol drei abih hatai tapa dom bruk ngak yau ini yau công ty Mê Trang piah ka khaol drei daong ka Trường Sa. Trường Sa jeng lac di Khánh Hòa, Trường Sa jeng lac di Việt Nam.

      Khaw tin dunya:

 # Nhật Bản saong Hàn Quốc njauk patagok bruk pambuak gauk gah an ninh tal pakat dunya. Ini lac panuac di Akaok Mentri Quốc phòng Nhật Bản Gen Na-ka-ta-ni (Gen Nakatani) dalam mbang ginum biai haong Akaok Mentri Quốc phòng Hàn Quốc Han Min-Cô (Han Min-Koo) pak bal ine Xơ-un (Seoul) harei 20-10. Mentri Quốc phòng Hàn Quốc brei thau, Akaok Mentri Gen Na-ka-ta-ni hu mbaok di bal ine Xơ-un harei ini, peih mbaok mbang rivang Hàn Quốc dui atah 3 harei. Mbang rivang di Akaok Mentri Na-ka-ta-ni tal Hàn Quốc rah tabiak dalam vaktu daok hu ralo siam mekre dalam bruk pambuak talei rohim nao mai di dom negar đồng minh haong Mỹ. 

# Mentri Quốc phòng Nga harei kabroi (20/10) brei thau, negar ini bahrau padang ngak sa căn cứ quân sự prong di bhum atah bayah Bắc Cực ginup ka 150 urang lin daok dalam 18 bilan. Công trình prong 14 ribau mét vuông caik angaok pulao prong Alếchxanđra, sa binah dalam baoh pulao Phrăng Giôxép di Nga. Bruk padang ngak nan, lac sa binah dalam  học thuyết hải quân bahrau bo Nga brei thau meng puac bilan 7 bloh, mong iek labik ini yau sa bruk brei peih ngak dahlau kayua pak ini hu ralo khoáng sản jeng yau sa labik chiến lược. 

# Ribuk Koppu tuh tame Philippin meng harei 18 bilan 10 meng blaoh ngak ka 22 urang metai saong yaok ribau urang njauk panduan nao daok di labik karei. Langiu di nan, ribuk jeng ngak khat lahik trak ka gah ngak nong Philippin, tui kuhria hu tagok tal 128 triệu đôla. Mentri Ngak nong Philippin brei thau, Ribuk  Koppu ngak khut jaik 300 ribau hecta taneh ngak nong biak siam di dom labik gah Barak ngak ka dom labik nan lahik yaok rituh ribau tấn kaya nong, dalam nan tangeiy nan lac phun pala njauk khat lahik trak abih. Mentri Ngak nong Philippin hu tacei pato ka dom jabat ngak nong pak dom labik ini paphat pajaih ka urang nong piah samar pasiam gilac bruk ngak mbang pala drak./.