Khaw tin 10h30 saong 14h30 harei 22-10

# Patui danak dak mbang nyaom ka 10, Quốc hội mbang 13, harei ini (22/10), Quốc hội ginum biai pak tổ ka bruk peih ngak jalan patagok kinh tế xã hội, kadung jien karja thun 2015; jalan patagok kinh tế xã hội saong kuhria dahlau kadung jien karja thun 2016; Taong yaom bruk peih ngak dom danak dak bruk ngak negar vaktu 2011-2015, dak padang saong ba tabiak jalan buh jien tame ngak danak dak pakat negar vaktu 2016-2020; ginum biai ka jalan pandar phun jien trái phiếu Raja-ei daok labaih di dom dự án pasiam veik jalan roya 1A saong jalan Hồ Chí Minh labik tapa Tây Nguyên. 

# Bair harei kabroi (21/10), di jabat rajaei, Thủ tướng Nguyễn Tấn Dũng hu taduan raok akao mintri Ngoại giao Philippines Albert del Rosario daok ravang ngak bruk di  Việt Nam. Di var raok, dua gah njauk hatai gauk brei pambuak bruk khang kajap dalam langyah, xử lý urang ngak ikan di yaok taneh ia lih tame bhum tasik di gauk tui jalan siam mekre, pambuak bruk di dua taneh ia Việt Nam - Philippines.

# Tiểu ban An ninh saong Y tế APEC 2017 harei kabroi (21/10) hu peih mbang nyaom ka sa. Nyaom biai pakat glaong Diễn đàn pambuak bruk Kinh tế Châu Á - Thái Bình Dương (APEC 2017), kadha  prong nan lac adit pakat glaong hu peih ngak pak bal Đà Nẵng tui kuhria meda rah tabiak dalam bilan 11/2107, hu mbaok di urang pal akaok 21 nền kinh tế daok dalam APEC, hu jaik 10 ribau urang mai pataom mbaok. Dalam tukvak rah tabiak Nyaom biai meda hu ralo mbang taom gaok dua gah, ralo gah di dom urang dang akaok dom negar haong urang pal akaok Đảng, Karja Việt Nam saong dom kapul nyaom hu mbaok dalam APEC 2017... 

# Ủy ban bhapbini tỉnh Quảng Nam brei thau, harei kabroi (21/10), Thủ tướng rajaei Nguyễn Tấn Dũng njauk hatai brei ka dom xã hu sang kathaot labaih 50% saong hu rilo bhapbini bangsa takik di 7 huyện lac: Bắc Trà My, Hiệp Đức, Nam Giang, Đông Giang, Tây Giang, Nông Sơn, Tiên Phước di tỉnh Quảng Nam hu mbang tui sarak di Quyết định ka 124/QĐ-TTg di Thủ tướng rajaei brei peih ngak Đề án pasiam karja puk palei bhum Tây Nguyên tukvak 2014 - 2020. 

# Dom harei jaik di ini ralo urang nong di palei 3, xã Đắc Cấm, bal Kon Tum, tỉnh Kon Tum daok duh hatai kayua tapol pabui ruak metai tal yaok pluh drei bo oh thau makna di nyu. Tui panuac khan di mikva, dom drei pabui ruak metai, trak meng 20 tal 40kg. Vaktu meng tuk tamuh ruak tal tuk metai dalam jaik dua harei, mboh hu dom biểu hiện, yau barah meta, klaak mbang, khang dalah. Ong Nguyễn Thành Được brei thau, sang ong raong 13 drei pabui, dalam nan hu 2 drei metai saong sa drei njauk ruak trak: “Hu mboh dahlau di abih meta nyu barah blaoh dalah nyu khang. Crok jeng oh mbang blaoh nyu metai. Iew thú y mai meyah nyu ruak trak ye kluac sa mbang 60.000 đồng kluac harei dahlau harei hadei nyu metai. Sang halei jeng caong khin gah thú y duah janih jru halei piah pasiam veik drei halei uan drei nan”

# Dalam bilan 10, bruk caong pilih menuac tame ngak di dom doanh nghiệp, cơ sở sản xuất pablei salih di ban raya Hồ Chí Minh tagok jaik 18% duk saong bilan  9. Ta-eng bilan 11 dom doanh nghiep saong cơ sở ngak mbang pablei salih di ban raya Hồ Chí Minh caong hu 18.000 urang ngak. Dalam nan, caong hu 10.000 urang ngak tui bilan, bruk ngak meteh tukvak .

#  Page kabroi (21/10), Kapul ngak bruk di Mentri Y tế hu nao pasang iek saong ngak bruk haong dom jabat chức năng pak dom puk palei ka bruk khut meta di dom urang ngak lasun tím pak bal sit Vĩnh Châu, tỉnh Sóc Trăng. Hadei di tuk kapul urang di Mentri Y tế nao mong iek saong ngak bruk haong dom jabat chức năng di puk palei ka dom urang njauk khut meta pak bal sit Vĩnh Châu, Giáo sư - tiến sĩ Nguyễn Thanh Long, Thứ trưởng Mentri Y tế brei thau, ini lac bruk di y tế công cộng khẩn cấp, oh njauk lac kayua lasun tím atau kayua pruh jru dalam vaktu pala iek lasun tím. Thứ trưởng khang panuac lac, makna di nyu mai meng bruk an toàn vệ sinh lao động di mikva dalam tuk pala ngak lasun tím. 

Khaw tin dunya

# Talei pambuak bruk di Anh saong Trung Quốc daok dalam siam mekre di abih saong dua taneh ia njauk patui jalan siam mekre ini piah ba mai ka harei hadei hadah hadai jang ka dua taneh ia. Nan lac panuac di Chủ tịch Trung Quốc Tập Cận Bình saong Nữ hoàng Anh Ê-li-da-bét 2 (Elizabeth II) dalam mbang payak di Hoàng gia Anh rah tabiak di Cung điện Bấc-kinh-ham (Buckingham)  harei 20/10 barau blaoh. Tui kuhria, dua taneh ia meda mbaoh tangin tame rilo hợp đồng yaom labaih 30 tỷ bảng Anh, sumu  46 tỷ đô la Mỹ. 

# Harei kabroi (21/10), Tổng thống Bulgari Rô-sen Plép-nê-li-ép (Rosen Plevneliev) hu pok huân chương hạng nhất Sta-ra Pla-ni-na di Karja Bulgari ka Đại sứ đặc mệnh toàn quyền negar Cộng hòa xã hội chủ nghĩa Việt Nam pak Bulgari Lê Đức Lưu, brei mboh dom rik daong di Đại sứ dalam bruk patagok talei rohim pambuak bruk di dua negar dalam tukvak tapa. 

#  Tui Hội đồng khí hậu di Ôxtrâylia, dalam 3 thun tal, menyek meng ia harei meda lap jang duk saong menyek karei meng jalan menyek negar. Tui pathau khan, di thun 2018 kayua dom tiến bộ dalam bruk khik piah năng lượng meng tấm thu năng lượng ia harei, điện meng ia harei meda lap jang. Bhapbini Ôxtrâylia meda padang ngak hệ thống mek năng lượng ia harei di tabung sang piah pandar. Bruk ini meda daong ka urang trun hu yaom jien menyek njauk bayan yaok bilan .