Khaw tin 10h30 saong 14h30 harei 23/3/2016

# Melam bloh (22/3), di sang Quốc hội, kapul urang kamei Quốc hội mbang XIII peih bruk pataom iek veik bruk ngak di nhiệm kỳ. Taong yaom glaong dom bruk ngak di dom urang Quốc hội, Chủ tịch Quốc hội Nguyễn Sinh Hùng ndom lac, luac 70 thun sajarah di Quốc hội tuk halei jeng hu mbaok rik saong siam, hu trach nhiem saong hu sap ndom di dom urang  kamei Quốc hội . Yaok urang hu brei mboh labik dang, bản lĩnh, năng lực saong trách nhiệm glaong dalam Quốc hội.

/ Oh lac xã nao dahlau ka bruk palei pala barau, Dũng Phong, sa xã bhum glaong di huyện Cao Phong, tỉnh Hòa Bình, labik hu jaik abih menuac lac mikva bangsa Mường daok hu thau tal lac xã ngak siam bruk  pacang cakak ma túy. ONG Bùi Văn Thủy, akaok công an xã Dũng Phong brei thau, hadei di 5 thun kham merat, tal urak ini xã oh hu urang halei vi phạm barau.

# Harei pataom mbang menyum dunya - Huế 2016 meda rah tabiak meng harei 28/4 tal 2/5 di mblang bein Phú Xuân, Nghênh Lương Đình- Phu Văn Lâu, hu mbaok 15 taneh ia di dunya. Harei pataom mbang ini hu labaih 100 gian pandap. Tuai du lich meda hu maong dom janih nghệ thuật, mbang menyum độc đáo di dom nghệ nhân saong maong dom pandap thủ công mengkan di rilo taneh ia. Tui mban peih bruk, harei pataom lac tuk piah ka dom nghe nhan ngak iek pandap mbang saong pagaong bruk taom gaok ilimo, ginum biai alamu saong duah darak pasal, pambuak bruk ngak mbang gah du lịch.

/ Di ban sit Gia Nghĩa, tỉnh Đắc Nông, mintri ngak nông saong patagok palei pala, mban tacei pato Tây Nguyên pambuak bruk saong UB bhap bini tỉnh Đắc Nông peih nyaom meyai tabiak jalan pacang cakak pandiak bhang thun 2016. Tui dom tham luận di nyaom meyai, piah pacang cakak pandiak bhang, dom puk palei brei pasang iek quy hoạch thủy lợi, ngak nông, ngak glai, ba ia pandar; jhul samar tukvak ngak dom dự án thủy lợi; paglaong bruk kuhria mboh dahlau saong caga pacang cakak dom kanjah jhak di langik tasik, peih ngak siam bruk pala glai saong khik caga glai đầu nguồn. 

# Huyện cù lao Tân Phú Đông, tỉnh Tiền Giang hu jaik 900 ha phun kandiuk. Ini lac janih phun mbang baoh hu laba glaong abih di bhum ini , yaok ha laba hu labaih 200 triệu đồng. Urak ini, kayua tua, mbak dui atah, bhum Cù lao thu abih ia taba yau nan ye huyện Tân Phú Đông hu jaik 20 ha beir phun pandiuk metai thu, jaik 100 ha karei daok layau. Urak ini, sang beir puk palei oh hu jalan ngak halei piah daong thulagu ka phun.  Ông  Hồ Văn Thanh, sang beir pala phun kandiuk di xã Tân Phú, huyện Tân Phú Đông, tỉnh Tiền Giang ndom lac :“Thun ini  ia abih aval, kan kandah tal phun kandiuk xiem. Ia  abih aval lac drei oh buh khak tame hu, oh pruh ia hu lac ngak sjak ka baok saong hala. Bilan pandiak ini, phun atau lihik hala bo drei buh khak, pruh ia ginup lac phun oh lihik pren. 

/ Meng kuhria mboh lac pandiak bhang, njom mbak daok rah tabiak khang saong dui atah tal bilan 6, UB bhap bini tỉnh Kiên Giang gam saong dom gah chuyên môn saong dom puk palei peih dom jalan ngak chip piah daong yaok ribau ha padai oh ka yuak saong khik caga ka padai hè thu saong vụ 3 jaik tal, khik kajap ia pandar ka bhap bini.   

# Bảo hiểm xã hội ban raya Hồ Chí Minh brei thau, kuhria tal harei 21/3, dom mẫu kê khai blei bảo hiểm y tế sang mek mai hu 78%. Dalam nan, dom mẫu kê khai ini daok kurang rilo dữ liệu ye harei, bilan, thun ndih tapui, ka sổ hộ khẩu, tạm trú, ka chứng minh nhân dân. Yau nan ye, urak ini tok hu dữ liệu ka bảo hiểm y tế tui sang di labaih 4,3 triệu menuac di abih tih jaik 8 triệu urang bhapbini di ban raya Hồ Chí Minh, hu tỷ lệ 55,2%. Bảo hiểm xã hội ban raya taong yaom ini lac tỷ lệ bair abih duk saong dalam taneh ia.

 Patui di ini dom khau tin dunya:

/ Mintri Y tế Braxin brei thau, kuhria tal harei 19/3, dom urang njom saong medil njom vi-rút Zika tagok tal 5.200 urang, nan lac tagok jaik 70 urang duk saong sa adit dahlau nan. Braxin lac labik njauk gaok kan kandah trak abih kayua vi-rút Zika hu medil lac pambuak tal ruak akaok sit di uranaih. 

# Harei kabroi (22/3), hadei di tuk rah tabiak dom mbang taong mbom bak darah di Brúc-xen (Bỉ) ngak takik abih 34 urang metai saong jaik 200 urang bị thương, rilo taneh ia hu lên án mbang taong khủng bố saong brei thau hatai jum pataom saong Bỉ. Dalam panuac ba tabiak hadei mbang taong khủng bố di Bỉ, Tổng thống Pháp Phrăng-xoa Ô-lăng-đơ ieu dom taneh ia dalam Liên minh châu Âu peih ngak dom bruk njauk ngak piah brei thau nguy cơ di dom đe dọa khủng bố. 

/ Meng tuk bruk padeih cuh hu peih tabiak di Xiry meng bilan dahlau, dom urang metai di labik srau kadau di taneh ia ini patrun biak ralo. Harei 22/2 meng bloh, Nga saong Mỹ njauk gauk brei padeih cuh di Xyri saong bruk nan hu ba tabiak ngak meng harei 27/2. Tui kuhria mboh di lHQ, meng tuk kalin kan rah tabiak di Xyri, labaih 470 ribau urang metai saong 2 triệu urang karei njauk rambuah./.