# Biar harei 23/5, pak Jabat Trung ương Đảng, Tổng Bí thư Nguyễn Phú Trọng hu taduan raok Tổng thống Hoa Kỳ Ba-rắc Ô-ba-ma daok rivang Việt Nam. Pak van taduan raok, Tổng Bí thư Nguyễn Phú Trọng khang panuac lac Việt Nam daok mong Hoa Kỳ lac sa dalam dom gah pambuak bruk  prong dang akaok saong ndom lac dua gah njauk patagok talei pambuak bruk tame dalam,  hu kein laba. Daok gah drei, Tổng thống Ô-ba-ma brei mboh hatai jia talei rohim Việt Nam - Hoa Kỳ  meda cak rok patagok samar jang dalam tukvak anak tal kayua kein laba di yaok taneh aia, kayua sron mbon, grap tanat, pambuak bruk saong patagok dalam khu vực saong angaok dunya.

# Harei ini (24/5), Tổng thống Barack Obama hu kadha ndom puac brei thau ka talei pambuak bruk Việt-Mỹ di pasak nyaom biai negar . Tapa nan, Tổng thống Obama meda tacei tabiak dom bruk praong dalam talei pambuak bruk di dua taneh ia jeng ye dom siam mekre  barau bo dua gah ngak hu dalam dom thun jaik ini. Langiu di nan, ong Obama jeng hu ndom tal dom bruk karei daok kandon veik di Mỹ saong Việt Nam jeng ye jalan langyah nyu saong ba tabiak jalan jhul khang talei pambuak bruk saong patagok di dua gah di anak tal.

# Taduan panuac daa di akaok Mentri Quốc phòng Lào, meng harei 23 tal 26/5, Đại tướng Ngô Xuân Lịch, Ủy viên Bộ Chính trị, Akaok Mentri  Quốc phòng ba akaok kapul urang lambaok Quân sự pakat glaong negar drei tapa rivang negar Cộng hòa Dân chủ Bhap bani Lào saong hu mbaok dalam Nyaom biai Akaok mentri Quốc phòng dom negar ASEAN mbang ka 10 (ADMM-10) rah tabiak pak bal ine Viêng-chăn (Lào).

# Harei ini (24/5),  cáp treo Fansipan kreik pambang padheih raok tuai piah pasiam tui định kỳ. Tui nan, dom bruk daok dalam labik cáp treo di ga nao saong ga mai meda padheih ngak bruk dalam sa harei. Meng harei 25/5, dom dịch vụ hu peih pambah veik. Lambaok Công Ty Dịch Vụ Du Lịch Cáp Treo Fansipan Sa Pa brei thau, bruk padheih ngak bruk piah ramik pasiam saong paglaong chất lượng cáp.

# Dalam tukvak nao pasang iek, Trạm Cảnh sát giao thông Diễn Châu (Phòng cảnh sát giao thông Công an tỉnh Nghệ An) duah mboh saong cap khik sa sruh radaih pajeng 7000 baoh menuk ada oh ka hu dut iek. Pak tukvak duah mboh, cap khik, urang peih radaih oh hu hu harak dut iek njauk adat hukum. Kayua yau nan ye, Trạm cảnh sát giao thông Diễn Châu brei capkhik dom baoh nan saong pambuak haong dom jabat chức năng karei piah lanyah.

# Barau blaoh, Công an huyện Văn Lâm, tỉnh Hưng Yên brei thau, gah chức năng hu pambuak bruk saong mban tacei pato 389 huyện Văn Lâm hu cuh klak 1 tấn meteh pruac pabui oh thau asal di Công ty cổ phần môi trường đô thị saong  công nghiệp - Urenco 11. Dom pruac pabui ini hu duah mboh di sa sruh radaih tải daok pajeng di xã Tân Quang, huyện Văn Lâm. 

# Tổng công ty Bảo hiểm Bảo Việt brei thau, hadei di tuk taduan hu panuac khan ka dom khat lahik di tuai damuai dalam mbang njauk bala angaok jalan roya 1 dalam page mesup harei 22/5, labik nao tapa huyện Hàm Thuận Nam, Bình Thuận, Bảo hiểm Bảo Việt hu buh tabiak bayar akaok mereip yaom 2 triệu đồng ka yaok urang njauk bala metai saong 1 triệu đồng ka yaok urang njauk rambuis. Bảo hiểm Bảo Việt daok nao taom gaok dom gah chức năng saong po radaih piah klah rabha haong dom urang njauk bala daok veik. Taphia di nan samar ngak salah blaoh harak ba-ar piah mong iek langyah bayar dom khat lahik daok dalam trách nhiệm bảo hiểm dalam tukvak samar drah, tui njauk adat hukum. 

Khaw tin dunya

# Dalam mbang ravang dua harei di I-ran 22 saong 23/5 di Thủ tướng Ấn Độ Na-ren-đi Mô-đi (Narendra Modi), Ấn Độ saong I-ran hu mbaoh tangin tame rilo văn kiện jhul khang talei pambuak bruk dua gah, abih di nyu nan kac gah dầu khí saong pablei salih. Mintri Ngoại giao I-ran brei thau, dalam mbang ravang Iran di Thủ tướng Ấn Độ, dua taneh ia hu mbaoh tangin tame 14 thỏa thuận pambuak bruk, dalam nan hu thỏa thuận patagok dom cảng gah meraong di Iran Cha-ba-ha (Chabahar). Meyah hu peih ngak, dom canah jalan ini jeng jeng patagok biak rilo bruk nao mai, pablei salih saong Ấn Độ, Ap-ga-ni-xtan saong bhum Trung Á.

# Jabat khik iek bala meng langik tasik Băng-la-đét bahrau brei thau, mbang ribuk khang Rô-an-nu (Roanu) hadei di tuk tuh tame dom labik gah Meraong negar ini ngak khat lahik trak tal manuac urang saong drap ar. Ribuk Rô-an-nu  ngak jeng ralo mbang glut jaleih taneh saong aia sua pak bal tasik Chi-ta-gong (Chittagong). Pasak pambuak bruk pacang caga bala di negar brei thau, ribuk Rô-an-nu ngan  pren khang tagok tal 90km sa tuk gam haong hajan prong daok ngak khut khat yaok pluh ribau baoh sang saong ngak DAUK jaik 20 puk palei di labik gah meraong di Băng-la-đét. Hu takik abih 24 urang metai saong labaih 500 rituh ribau urang njauk panduan nao daok di labik karei. Urak ini ribuk Rô-an-nu daok yếu trun tuk tuh tame Mi-an-ma.

# Harei kabroi, ceik apui Xi-na-bung (Sinabung) di In-đô-nê-xi-a pruh tabiak ngak takik abih 7 urang metai. Tui urang jakarpak nan, dom urang njauk bala jeng hu duah mboh di palei Gam-bơ (Gamber), atah di ceik apui 4 ki-lô-mét. Baok ceik apui Xi-na-bung glaong 2.460 mét lac salam dom 127 ceik apui daok ngak bruk di In-đô-nê-xi-a, pruh di harei 21/5. Ceik apui pruh athak, dhur mur glaong tal 3 ki-lô-mét tagok lingik saong dalam bán kính 4,5 ki-lô-mét. Gah an ninh hu ba bhapbini nao plaih truh dom labik jaik ceik apui./.