# Biar harei kabroi 23/3, Akaok negar Trương Tấn Sang saong hadiuk di gait gam haong kapul urang lambaok pakat glaong negar drei hu nao tal Viêng-chăn peih bruk rivang saong ngak bruk pak Cộng hòa Dân chủ Bhap bani Lào meng harei 23 tal harei 25/3 tui panuac daa di Tổng Bí thư, Akaok negar Cộng hòa Dân chủ bhap bani Lào Chu-ma-ly Xay-nha-xỏn saong hadiuk di gait. Mbang rivang ini piah kak kajap jang talei pambuak bruk  meng kan, gul pataom biak karei di 2 Đảng, dua negar, taphia di nan jul pakhang talei pambuak bruk taong abih gah di Việt Nam – Lào.

# Harei 23/3, Phó Thủ tướng, akaok mintri Ngoại giao Phạm Bình Minh hu ndom biai tapa phone saong akaok mintri Ngoại giao Xinh-ga-po K.San-mu-gam. Tapa nan, Phó Thủ tướng, akaok mintri Phạm Bình Minh payua panuac klah rabha pandik harao tal rajaei saong bhapbini Xinh-ga-po ka dom khat lahik praong anak bruk palăng lahik di ong Lý Quang Diệu, urang hu ngak ka Xinh-ga-po patagok yau harei ini.

# Harei 23/3, Tỉnh Đoàn Quảng Bình peih pakak ba Pasak Dịch vụ bruk ngak dam dara Quảng Bình tame ngak. Pasak ini ba tame pandar meda pabak khau tin ka darak pasar, hướng nghiệp, tư vấn bruk ngak, pato bruk ngak saong ba brei bruk ngak ka dam dara puk palei. Ini lac bruk ngak di dam dara Quảng Bình salam uan 84 thun Harei padang kapul dam dara cộng sản Hồ Chí Minh saong nyaom roya pakat negar mbang ka 12 di Đảng.

# Jaik 12 truk jala pandiak harei kabroi 23/3, sa mbang khuah glai rah tabiak di tabung ceik Hàm Rồng daok di xã Chư H’ Drông, ban sit Pleiku, tỉnh Gia Lai. Kayua mbang khuah rah tabiak di kreih jala, tuk hu pandiak khang saong rilo angin nan ye apui pambak biak samal meda tagok tal tabung ceik, labik hu trạm papar riyak Hàm Rồng saong dom đài viễn thông. Taduan mek hu bruk brei thau, jaik 200 urang lin di Phòng cảnh sát pacang khuah padam khuah công an tỉnh Gia Lai, Kiểm lâm cơ động tỉnh, bhapbini puk palei hu mbaok ba gauk padam khuah, tal 14 tuk, mbang khuah hu pacang, padam.

# Sở Ngak nong saong patagok palei pala tỉnh Bình Thuận bahrau tabiak harak brei thau ka bruk pakuac taong mek dom janih kaya ikan dalam tasik hu yaom yau: điệp, sò lông, dòm nâu, bàn mai saong nghêu lụa… angaok bhum tasik Bình Thuận dalam vaktu 4 bilan. Dalam vaktu pakuac, meng harei 1/4 tal harei 31/7, dom kapul nyaom saong menuac urang oh brei adat blei tame, pajeng ba, ngak tabiak saong pablei salih dom janih kaya ikan daok dalam angan pakuac nan. Dom urang  ngak suan adat meda njauk taong phat tui adat hukum. Ong Huỳnh Quang Huy, Akaok Chi cục Thủy sản tỉnh Bình Thuận lac: Dalam tukvak meng akaok bilan 4 tal akaok bilan 8, dom janih nhuyễn thể 2 candaih kanduh ini daok dalam tukvak caih menek. Meyah manuac urang drei taong mek dalam tukvak ini, ye njauk khat lahik biak prong. Kayua nyu oh hu daok caih menek dalam tukvak hadei.

# Urak ini bruk kuac mek cuah suan hukum di dom kraong Tiền, kraong  Hàm Luông, kraong Cổ Chiên di tỉnh Bến Tre  daok rah tabiak khang. Kol klaik mek cuah bhian ngak bruk di var melam, hu menuac iek caga nan ye gah pasang iek kan si duah mboh. Barau ini, kapul pasang iek lien nganh tỉnh barau duah mboh 8 pandap kuac mek cuah langiu labik quy hoach di kraong Hàm Luông, dalam xã Mỹ Thạnh An, ban sit Bến Tre. Kapul pasang iek pandar dom pandap ini samal bayan cuah veik ka kraong Hàm Luông.

 # Melam kabroi 23/3, pak bal raya Hồ Chí Minh hu peih pakak Giải vô địch saong ranaih Teakwondo Đông Nam Á mbang ka 12 thun 2015. Giải thun ini pataom mbaok hu labaih 330 vận động viên mai meng 10 negar dalam khu vực saong po sang Việt Nam. Dom vận động viên meda pakacah meblah gauk 56 bộ huy chương nội dung quyền saong 116 bộ huy chương đối kháng.

Khaw tin dunya

# Barau ini, pasak pablei salih Admiral di thủ phủ Kazan di taneh ia Cộng hòa Tac-ta-rơ-stan di Liên bang Nga rah tabiak mbang khuah ngak khat lahik praong ka menuac urang saong drap ar ka rilo  urang ngak mbang pablei salih pak ini, dalam nan hu oh takik urang Việt. Harei 23/3, Đại sứ quán Việt Nam di Liên bang Nga  hu peih bruk rik daong brei mikva barau gaok khat lahik pak ini.

# Harei kabroi 23/3, amuk Phim-la-văn (Phimlawan), Phaok Akaok Pasak Roh duah kinh tế Ka-si-kon (Kasikorn) di Thái Lan hu tabiak harak kuhria mboh dahlau lac, kinh tế Thái Lan tok patagok jaik 2,8 % dalam thun ini; nyu patrun dut haong tanut patagok 4% kuhria mboh dahlau di nan. Dom kadha kuhria mboh dahlau angaok nan nyu laik haong bruk suh sah di dom urang pal akaok Raja-ei Thái Lan ka bruk kan kandah kinh tế urak ini pak negar ini...

# Cục pasang iek địa chất Hoa Kì  brei thau, sa mbang megaiy taneh khang 6,1 độ Rích-te barau rah tabiak di gah Brak Chi-lê . Urak ini jeng oh ka hu pathau khan ka khat lahik saong oh hu panuac cảnh báo ka sóng thần. Pasak di mbang megaiy taneh daok atah di ban sit Pu-trơ  32 km gah Đông Nam saong dalam 128 km. Jeng di harei kabroi, sa mbang megaiy taneh 6,1 độ Rích-te rah tabiak jaik ban Tác-na, gah meraong Pê-ru (Peru). Pasak di mbang megaiy taneh atah Tác-na 117 km nao gah timul, jaik biên giới  Chi-lê saong dalam 198 km./.