# Mentri Pato megru brei thau, tui harak pathau khan di Mentri bahrau hu Thủ tướng raja-ei njauk hatai  brei adat dui atah bruk peih ngak sarak daong bac megru ngan haong dom adei, anek saih, sinh viên bangsa biak takik manuac tui Khoản 4, Mục 4, Điều 1 Quyết định ka 2123 di Thủ tướng Raja-ei kuhria meng harei 01/01/2016 tal tuk hu văn bản tabiak sarak bahrau, salih. Phun jien bayar ka sarak daong ba ini hu kaoh tabiak dalam kadung jien brei ka bruk pato megru yaok thun di puk palei.

# Meng harei 22 tal harei 24/2, di tỉnh Yên Bái hu hajan gam tui ngin li-ar, nhiệt độ meng 12 tal 18 độ, di bhum glaong gaok tuk ala 10 độ C. Anak bruk langik tasik yau ini, tỉnh Yên Bái hu tacei dom puk palei ngak dom bruk piah khik caga phun pala saong athur raong yau: paga pacang var ro; klauk vacxin ka tapol athur raong, pruh jru pahacih labik raong; ngak pandap mbang pabak ka kabau, limo. Klah khat lahik yau mbang li-ar dahlau tết meng bloh, ngak ka jaik 1000 drei kabau, limo, saih, pabe di mikva nyu metai.

# Dom harei jaik di ini, thủy điện angaok kraong Vu Gia, Thu Bồn palao aia trun nan ye độ mbak halau aia di kraong cầu Đỏ, bal Đà Nẵng hu trun, meda pabak ia ka Sang mac cấp aia Đà Nẵng ngak bruk. Ong Nguyễn Sơn, Phaok Giam đoc iek gah Công ty Thủy điện Sông Bung 4, tỉnh Quảng Nam brei thau:  “Urak ini hu yêu cầu palao trun piah caga pandiak bhang, taphia di nan jeng hu yêu cầu pataom mek aia duh ka dom bilan mùa daok khin hu aia. Kreh  2 yêu cầu nan drei njauk palih ruah jalan ngak yau habar ka nyu siam abih. Urak ini, aia mai hồ biak takik min drei jeng cakak veik, palao trun ralo jang lượng aia mai” .

# Hadei di tukvak padeih tết, dom anek saih bhum urang Chăm tỉnh Bình Thuận nyu klak bac. Dom anek saih klak bac ralo meng lac bac yếu saong baoh sang kan kandah. Bruk njauk meyai nan lac dom anek saih klak bac jeng klak palei nao tame ban raya HCM duah bruk ngak, kayua yau nan ye biak kan ka bruk jak ba dom adei gilac mai bac veik. Gru Lâm trọng Nhơn – hiệu trưởng sang bac THCS Phan Hòa, huyện Bắc Bình, tỉnh Bình Thuận lac: Ngan saong trách nhiệm saong quyền hạn di sang bac lac nao jak ba dom adei min. Tuk mboh dom adei padeih bac ye nao jak ba daok dom adei oh nao bac oh thau ngak hagait. Gah sang bac jeng peih dom bruk me-in, bloh daong anek saih bac yếu, daong dom adei gaok kan kandah ye sang bac jeng peih ngak yaok thun. Tuk UB bhap bini huyện saong Huyện ủy trun, pambuak bruk saong gah công an min jeng oh hu kết quả”.

# Pak khu du lịch cụm thác Đray Sáp – Gia Long, xã Đắc Sôr, huyện Krông Nô, tỉnh Đắc Nông bahrau rah tabiak Lễ hội uan raok thun bahrau Bính Thân 2016 ngan haong kadha “Tình xuân Krông Nô”. Pak lễ hội, dom nghệ nhân, vận động viên hu mbaok tame pakacah dom kadha ndung bak ilamu meng kan yau: pakacah daoh kadha daoh bhap bani, tamia, diễn tấu cồng chiêng, angui cuk khan ao meng kan; pakacah thok brah tahanek lisei samar, ẩm thực, menyim jih dalah, pak yot saong dom kadha ma-in bhap bani… dom bruk ngak ini pachreih ralo bhap bani puk palei saong tuai damuai hu mbaok tame. Ong Nguyễn Đăng Thông, sa urang hu mbaok dalam lễ hội lac: “Mikva mboh biak bui sambai, mboh biak chreih chai. Mikva mong iek hu dom hagait biak karei di ilamo bangsa drei. Ini lac labik rivang ma-in du lịch pambuak pagam haong dom bruk ngak ini nan lac biak hu yaom, lễ hội biak tuyệt vời”.

# Tui sở jien padai ban raya HCM, taong abih 14 đơn vị pajeng ba taxi di ban raya HCM hu kê khai ginup bruk ramik veik yaom trun pajeng ba. 14 đơn vị pajeng ba tut angan saong sở jien padai trun yaom meng 200 đồng tal 700 đồng sa km. Đơn vị ramik veik yaom biar di abih nan lac Công ty taxi Hoàn Mỹ, ramik veik yaom glaong di abih nan lac Công ty Comfort  Savico. Dom doanh nghiệp ramik veik yaom biar di abih lac dahlau daih hu ramik bloh yaom. Min urang dang akaok sở jien padai ban raya HCM hu pandar dom đơn vị ini brei ramik veik ka nyu lagaih saong yaom trun di yaom xăng urak ini.

# Harei kabroi (24/2), gam haong ralo dam dara dalam negar, dom dam dara urang bangsa takik dalam huyện Tân Châu, tỉnh Tây Ninh jeng chreih chai tagok jalan nhập ngũ. Mbang ini huyện Tân Châu hu 160 urang nhập ngũ, dalam nan hu 4 urang dam lac urang bangsa takik. Hu labaih 30 urang dam hu trình độ Cao đẳng, Đại học; 4 đảng viên. Tui ong Nguyễn Văn Chinh – Phaok Chỉ huy Trưởng Ban chỉ huy quân sự huyện Tân Châu, chất lượng tân binh thun ini siam jang haong dom thun dahlau. Lac sa urang đảng viên bangsa duy nhất dalam kapul nyaom urang lin bahrau bangsa takik di huyện Tân Châu hu mbaok tame nhập ngũ harei ini, sa-ai Lâm Sua Buôn, bangsa Khmer bui sambai khan lac:  “Sang dahlak hu 3 adei sa-ai, oh ka hu thei nao lin, adei halar tian  nao lin kayua bruk nao ini nyu daong ka adei biak ralo dalam bruk bac megru saong hu mbaok tame pacang khik palei negar”

Patui di ini dom khau tin dunya:

# Dalam tuk dom labik nao tal di tuai DL Nga daok gaok kan kandah, harei kabroi 24/2, di ban ine Moskva, Hiệp hội Du lịch Việt Nam pambuak saong Sở Du lịch Hà Nội peih danak dak “Peih tabiak darak tuai DL Nga. Bruk ngak ini jeng lac piah patagok talei pambuak bruk di dua taneh ia VN – LBN dalam gah DL, taphia di nan pachreih hu tuai DL Nga mai tal VN.

# Campuchia hu urang akaok meti metai kayua jit cúm H1N1. Ong Ly So-Văn, Urang tabiak panuac di Mentri Y tế Campuchia brei thau urang nan lac sa-ai Khun Nô, umo 29 thun daok ngak urang vak ka Rayo papar binguk CTN, njauk ruak pandiak glaong jaik 5 harei dahlau di nan. Hadei di tuk ba tame sang iek ruak pak bal ieng Phnômpenh, bác sỹ mek mẫu xét nghiệm brei kết quả dương tính haong virus cúm H1N1. Yau nan min, hadei di tukvak iek ruak urang nan metai blaoh dalam harei kabroi.

# Jabat khik iek bala langik tasik di negar Phi-gi barau brei thau, kuhria tal ini, dom urang metai kayua ribuk nhiệt đới Uyn-xtơn tuh tame taneh ia pulao kaoh ini tagok tal 42 urang. Dom taneh ia nan lac Trung Quốc, Niu Di-lân saong Ôxtrâylia barau hu panuac caong daong chip ka taneh ia pulao kaoh  diThái Bình Dương ini./.