# Dom harei tapa, urang jakar, urang đảng viên saong bhap bani bal raya Hồ Chí Minh gam haong grauk labik dalam negar pamaong tal Nyaom roya Đảng pakat negar mbang ka 12 ngan haong hatai caong khin Nyaom roya meda pilih ruah tabiak dom urang xứng đáng abih tame Ban Chấp hành Trung ương Đảng. Ong Trần Tấn Ngời, Phaok Akaok thường trực Ủy ban Mặt trận negar Bal raya Hồ Chí Minh lac: Khaol dahlak mboh lac, Nyaom roya biak sangka tal bruk palih ruah nhân sự siam jang piah peih ngak siam dom jalan ba, sarak hu brei tapa di mbang nyaom roya 12 ini. Khaol dahlak saneng lac, ngan haong bruk kuhria caga biak siam saong Nyaom roya meda rah tabiak ngan haong bruk kham merat biak glaong ye nyaom roya meda palih rauah tabiak hu dom urang hu angan je saong hu ilamu tame Ban Chấp hành Trung ương.

# Tapa tui iek bruk nhân sự di nyaom roya Đảng pakat negar mbang ka 12, urang jakar saong bhap bini tỉnh Tiền Giang taong yaom biak glaong saong jia tame trách nhiệm di urang lambaok nyaom roya dalam bruk palih ruah menuc piah ba  tame mban chấp hành TƯ Đảng, mintri chính trị jeng yau piah pan akaok dom bruk praong di taneh ia. Ong Nguyễn Văn Tám, bhap bini daok di phường 2, ban sit Mỹ Tho, tỉnh Tiền Giang lac: “Kol dahlak biak caong nhân sự mbang ini tuk hu ba tame, ngak abih hatai jai di drei, oh rah tabiak bruk yếu kém, kein laba nhóm, bè phái ye Đảng drei oh brei ngak yau nan, brei abih hatai jai saong bhap bini”.

# Kayua lingik la-ar, 2 harei ini, labik tasik Phú Yên riyak prong, abih di nyu pak Phường Phú Đông, bal sit Tuy Hoà, riyak prong ngak tayah abih 5 trại katung gilac di urang taong ikan, peih dua pabah lamnge bahrau saong ngak karam sa sreuh gilai công suất prong. Urang taong ikan labik ini daok dang anak dom kan kandah. Urak ini, kayua langik  la-ar, di Biển Đông hu angin pakat 6, pakat 7, ralo gilai taong ikan di bhap bani dalam tỉnh Phú Yên daok nao taong mek ikan atah njauk nao duah labik pataok daup. Bộ đội Biên phòng tỉnh Phú Yên liên lạc hu haong 164 gilai ikan ngan haong 1.596 urang ngak. Dalam nan hu 16 gilai ngan haong 154 urang ngak hu nao tame labik pataok siam mekre.

# Bruk tabau khuah daok rah tabiak dalam bilan pala ini, di bhum tabau nguyên liệu gah timur tỉnh Gia Lai, hu labaih 16 ha njauk khat lahik. Bilan khuah akaok meti hu kapul công an xã Tú An, ban sit An Khê, tỉnh Gia Lai duah mboh di 11h melam harei 23/1. Dalam tuk labaih 100 urang daok kham merat padam khuah ye pui nyu mbang tagok sa labik karei, atah nan labaih 500m. Tuk langik pandiak saong ngin khang ngak ka pui pambak samar, ngak khat lahik 16 ha di 8 baoh sang. Mbang khuah tok hu pacang cakak taong abih tuk bhap bini pandar mac li-ua tame jah tabau, ngak jeng jalan pacang cakak pui di bhum jaik taphia. Ralo baoh sang pala tabau ndom lac hu kol kanjah jhak daok palai pajoa bruk pala drak di mikva, ngak brei patrun yaom tabau.

# Pamaong tal bruk “Tết brei ka urang kathaot saong urang jaoh jo” kayua Trung ương Kapul Chữ thập đỏ Việt Nam peih ngak, Kapul Chữ thập đỏ bal  Đà Nẵng jak ba dom doanh nghiệp, urang ngak pahla rik daong jaik 8.000 pok pandap Tết, yaok pok hu yaom 500.000đồng alin brei ka urang kathaot saong urang jaoh jo dalam bal. Trung ương Kapul Chữ thập đỏ Việt Nam jeng hu daong 200 thùng pandap, dalam nan hu phui, kamo, soong gaok, pandap pandar dalam sang brei ka urang kathaot.

# Kadung jien daong ka uranaih Đắc Lắc barau peih danak dak “Xuân anit ranam” tal uranaih kan kathaot, metui medhua joh jo dalam tỉnh. Hu mbaok tame danak dak hu labaih 700 uranaih sang kan kandah hu me-in sambai, maong iek dom kadha daoh tamia salam uan thun barau kayua dom ayut uranaih parang me-in. Danak dak hu aln hadiah 100 paok jien bac yaok paok yaom 800.000 tal 1 triệu đồng ka uranaih kan kathaot yam tagok dalam bruk bac daa, alin hadiah pandap bac daa ka uranaih bhum atah bayah yaom 80 triệu đồng, alin 1000 paok pandap tết ka uranaih metui medhua, joh jo daok di pasak bảo trợ XH saong sang peih. Ini lac pandap hu makna ngan saong dom adei sit gaok kan kandah tuk tết mai.

# Tal urak ini, kapul ngak bruk kayua urang pal akaok dom tỉnh An Giang, Kiên Giang, Cà Mau, Đồng Nai saong bal Cần Thơ hu nao rivang, alin brei jaik 800 triệu đồng ka dom urang lin Vùng 5 Hải quân, dom bol lin Bộ đội biên phòng saong urang jakar daok ngak bruk pak dom xã pulao labik tasik gah Tây Nam di negar tukvak Tết Bính Thân thun 2016. Brei mboh hatai bui sambai tuk hu bruk sangka di puk palei ngan haong urang bol lin Đại tá Nguyễn Văn Đồng – Phaok tư lệnh Vùng 5 Hải quân  brei thau. “Mbang nao ini biak lac tâm quyết biak glaong siam gheih di dom urang pal akaok dom tỉnh, bal sa tangin haong gauk piah khik caga chủ quyền pulao tasik. Biak di nyu lac bruk klah rabha dom kan kandah glaih glar di urang jakar, urang lin labik labik pulao atah, ini lac baoh tatua piah pambuak pagam pulao kaoh saong taneh haluk jaik gauk jang”.

Patui di ini dom khau tin dunya:

# UB Đối ngoại di QH barau tabiak thông báo brei thau: taduan panuac daa di akaok QH Nguyễn Sinh Hùng, ong Áp-đu-la bin Mô-ham-mét I-bờ-ra him An Xa-ích, akaok hội đồng tư vấn QH taneh ia Ả-rập Xê-út meda tapa rivang VN meng harei 31/1 tal harei 3/2/2016.

# harei kabroi  (25-1), sa loạt mbang megei baoh taneh rah tabiak pak labik  Địa Trung Hải di kreh Marốc saong Tây Ban Nha, ngak 15 urang njauk rambuis pak Marốc. Tui nguồn tin y tế pak Hô-xê-i-ma (Hoceima), gah Barak Marốc, dom sang iek ruak pak khu vực ini taduan mek hu 15 urang njauk rambuis hadei di 3 mbang megei baoh taneh gam gam. Viện Địa vật lý negar Marốc brei thau, mbang megei baoh taneh khang 6,3 độ ríchte ngak megei bal rah Barak Na-đo (Nador) tuk 4 tuk 22 minit giờ GMT. Hadei di nan rah tabiak gam gam dua mbang megei baoh taneh khang 5,3 và 5,5 độ ríchte.

# Sa urang ngak praong mintri y tế Thái Lan barau brei thau, taneh ia ini hu cách li 32 urang piah pacang cakak bruk mbuan njom mbak di virut ngak laka jalan suak yava bhum Trung Đông MERS, hadei di tuk duah mboh urang ka dua njom MERS. Sa urang likei angan Ôman, umo 71 thun nao tal Băng Cốc hu mboh lac njom virut MERS. Anek likei di ong gam saong dom urang peih tắcxi, urang ngak dalam khách sạn saong tuai damuai nao gam kapal haok saong urang ruak ini hu cách li dalam 2 adit. Tui jabat pasang iek jit ruak TL, 8 urang karei daok hu xác định danh tính hadei di tuk taom gaok  urang ruak jeng hu cách li. TL kuhria raok 32 triệu tuai damuai dunya dalam thun 2016, ralo jang duk saong jaik 30 triệu tuai damuai di thun 2015. Gah DL rik tame 10% ka GDP di TL./.