Khaw tin 10h30 saong 14h30 harei  26/4

           # Bair harei kabroi (25/4), Ủy viên mintri Chính trị, Bí thư Trung ương Đảng, akaok Ban dân vận Trung ương Trương Thị Mai hu var ngak bruk saong Ban Thường vụ Tỉnh ủy Quảng Bình. Brei panuac tamat var ngak bruk, Ủy viên mintri  Chính trị, Bí thư Trung ương Đảng, akaok Ban dân vận Trung ương Trương Thị Mai ndom lac: meyah oh langyah hu dom bruk pambuak tal ngak mbang kinh te lac kol drei kan si pasiam hu raidiuk di  bhapbini. Meyah raidiuk di bhapbini hu pasiam,  an sinh xã hội hu khik caga ye bhapbini meng jia tame đảng, nao tui đảng. Yau nan ye, 5 thun tal dahlak caong khin Quảng Bình salih barau saong patagok. Hu 3 danakdak bo nyaom roya Đảng bộ tỉnh hu brei thau, dahlak sahaneng lac Quảng Bình njauk pilih ruah jalan nao đột phá. Ka sa lac bruk kan kathaot, ka dua lac trun kathaot saong bruk ngak; ka klau lac bruk di urang jakar.)

         / Jeng dalam biar harei 25/4, Ủy viên mintri Chính trị, Phaok Thủ tướng rajaei Trương Hòa Bình, akaok Ủy ban An toàn jalan mbak pakat negar hu var ngak bruk saong jabat rajaei, UB an toàn jalan mbak pakat negar ka bruk khik kajap an toàn jalan mbak. Phaok thủ tướng ndom lac, piah ngak hu bruk patrun meng 5 tal 10% dom bala angaok jalan mbak, dom urang metai, dom urang njauk rambuah brei kham merat jang di taong abih gah saong brei hu jalan ngak khang jang.

           # Kapul khik ramik darak pasal cơ động di Chi cục khik ramik darak pasal  tỉnh Hà Giang harei kabroi (25/4), hu duah mboh 267kg pandap athur hu rilo pabui saong nội tạng pabui oh cambaih asal daok pajeng ba dalam huyện Vị Xuyên, tỉnh Hà Giang. Urang po di mbang ngaok suan ini lac ông Lương Mạnh Thế, doak di tổ 3 phường Ỷ La, ban sit Tuyên Quang, tỉnh Tuyên Quang. Tui panuac khai di po pajeng, dom pandap hu taduan mek di km 12 huyện Yên Sơn, tỉnh Tuyên Quang, pajeng tagok Hà Giang meda hu ba nao pablei di dom huyện Đồng Văn, Mèo Vạc.

         / Mesup 25/4, di huyện Đồng Phú, tỉnh Bình Phước, Công ty cao su Bình Phước peih bruk padang ngak dự án jalan Đồng Phú - Bình Dương atah 42 km. tui yaom jien  buh tame ngak abih tih jaik 4.000 tỷ đồng. Dự án ini hu peih ngak tui jalan BOT ngan saong bruk rik daong phun jien di dom doanh nghiệp. Dự án ngak salah, ba tame pandar  hu daong jhul pakhang bruk patagok bhum kinh tế trọng điểm gah selatan tỉnh Bình Phước, pambuak saong dom khu công nghiệp di tỉnh Bình Phước, labik Tây Nguyên saong dom tỉnh gah meraong.

         # Ủy ban bhapbini tỉnh Lâm Đồng peih pakak saong peih bambang raok tuai mai ravang mein inem mek sajarah cách mạng Sang guk uranaih Đà Lạt (di jalan Hồ Xuân Hương, ban sit Đà Lạt) hadei tukvak ramik pasiam. Sang guk uraniah Đà Lạt hu brei thau inem mek sajarah pakat negar di thun 2009. Danakdak ramik pasiam inem mek sajarah ini hu peih ngak meng thun 2013 ngan saong jien ngak abih tih jaik 25 tỷ đồng.

             / Dom harei tapa, bhap bini dom puk palei di tỉnh Ninh Thuận mboh duh hatai kayua côn trùng tame sang ngak brei katal, ngak kan kandah tal sinh hoạt. Chi cục pala drak saong khik caga phun pala (sở ngak nông saong patagok palei pala) tỉnh Ninh Thuận brei thau, ini lac janih cim kadit patih,  daok ieu lac kadit halak mbang phun, hu angan lac Scirpophaga incertulas Walker...ini lac janih takre pui hadah, tuk langik sup, hadei 17 tuk, tuk bhap bini peih điện dalam sang lac kadit par tame, ndam tame pandap, tame menuac ngak brei katal kan daok. Chi cục jeng hu brei urang jakar kỹ thuật trun tal bein nho, medar piah tacei pato bhap bini jalan pacang cakak jit palai pajoa ka phun pala.

       # Urak ini, sang kathoat di tỉnh Đồng Tháp trun daok 3,67%, tui nan yaok thun trun 2,41% , dalam 5 thun 2011-2015 tỉnh hu 60.054 sang tabiak truh kathaot. Tỉnh kham merat trun sang kathaot 1,5%/sa thun tui chuẩn kathoat barau, taphia nan jhul khang bruk trun kathoat khang kajap tal thun 2020. 

          Patui di ini dom khau tin dunya:

          / Sa urang daok di Ôn-ta-ri-ô  lac urang akaok meti di Ca-na-đa njom vi-rút Zika akaok meti tapa jalan ndih daok. Tui jabat y tế công cộng Ca-ca-đa, urang kamei hu ndih saong sa urang likei barau mai meng sa taneh ia hu jit Zika. Tui kuhria mboh, urak ini di Ca-na-đa hu 55 urang njom vi-rút Zika hadei di tuk  mai meng dom taneh ia hu jit. Dalam dom urang ini hu takik di abih sa urang kamei daok metian. 

         # Harei 25/4, rajaei Nhật kuhria jien ka padang ngak veik hadei mbang megaiy taneh khang jaik ini di taneh ia ini tagok tal 2 tỷ 560 triệu đô la.Tui  báo chí Nhật Bản, rajaei njauk ndua jaik 80% abih tih jien ramik pasiam jalan nao mai, tatua cống saong 90% jien ramik pasiam dom cơ sở ngak nông. Rajaei Nhật jeng kham merat parabha jien brei glaong jang ka dom bruk khẩn cấp abih yaok ratuh tỉ yên.

       / Kadung jien dunya IMF harei 25/4 tabiak harak pathau khan lac, dom taneh ia xuất khẩu menyek di TQ khat lahik 390 tỉ đô la kayua yaom menyek trun dalam thun bloh saong meda khat lahik trak jang dalam thun ini ngan saong yaom khat lahik labaih 500 tỉ đô la. Tui harak pathau khan, yaom menyek trun jeng ngak ka kinh tế di 6 taneh ia di hội đồng pambuak bruk vùng vịnh trun meng 3,3% thun 2015 trun 1,8% dalam thun ini./.