# Pahadar Harei Gru jru Việt Nam 27/2, page mesup harei kabroi, pak Hà Nội, Sang ruak Nhi Trung ương saong Sang ruak Việt Đức peih pakak baoh sang bahrau duh ka bruk iek ruak. Baoh sang ilamu glaong hu 11 tal di Sang ruak Việt Đức ngak brei patagok baoh kapal ndih iek ruak meng 1.100 tagok 1.450 baoh saong mblauk jang 20 duk blac raih, rik daong peih ngak siam bruk ngak di gah dang akaok ngoại khoa, sa dalam dom pasak blac raih prong abih dalam negar.  

# Harei kabroi, di labik tanum Đại tướng Võ  Nguyên Giáp pak xã Quảng Đông, huyện Quảng Trạch, tỉnh Quảng Bình. Trung ương Kapul damadara Cộng sản Hồ Chí Minh  peih bruk Tết pala phun “ Miat miat hadar dhar phuan Wa Ho”. Di tuk peih bruk, saai Nguyễn Đắc Vinh - Bí thư ka sa Ban Chấp hành Trung ương kapul dam dara Cộng sản Hồ Chí Minh caong khin dom pakat Đoàn, urang đoàn, dam dara, uranaih dalam taneh ia paglaong hatai nao dahlau, pataom tame pala phun, pala glai, khik caga alam moi truong, khik caga halau ia hacih, daong cakak biến đổi khí hậu.

# Bruk tabiak tasik taong chap kaya ikan akaok thun sak pabe 2015 hu Nghiệp đoàn Nghề ikan xã An Hải, huyện đảo Lý Sơn, tỉnh Quảng Ngãi peih ngak di van page mesup harei kabroi ngan haong hatai caong khin angin siam hajan lagaih, tasik gindang, gilai mai hu ralo ikan hadang. Yaok rituh đoàn viên Nghiệp đoàn nghề ikan xã An Hải, huyện Lý Sơn hu pataom gauk veik pak Đền thờ lăng ikan Ong Nam Hải pak thôn Đông, xã An Hải piah hu mbaok ngak adat cầu ngư tabiak tasik taong mek ikan akaok thun. Lac nghiệp đoàn nghề ikan akaok meti dalam negar, hadei di 4 thun peih ngak tal harei ini Nghiệp đoàn nghề ikan xã An Hải hu labaih 60 gilai taong ikan hu jaik 730 urang.

# Harei kaboi, ban sit Đà Nẵng peih bruk pahadar 60 thun harei gru jru VN saong pok brei giải “ hadah tanyak Blouse patih 2014”. Dom thun tapa, gah y te ban sit Da Nang hu rilo salih bahrau, brei mboh lac pasak y te chuyen sau dalam bhum kreh negar saong Tay Nguyen. Da Nang lac puk palei dang akaok dalam taneh ia ka bruk  bảo hiểm y tế , tui nan hu labaih 92% bhapbini hu harak bảo hiểm y tế; uranaih lavang lavaih umo ala 5 thun bair abih dalam taneh ia.

# Harei kabroi, Tỉnh uỷ, Hội đồng bhap bani, Uỷ ban Bhap bani, Uỷ ban Mặt trận negar Việt Nam tỉnh Đắc Lắc peih bruk taom gaok akaok thun sak pabe ngan haong bruk hu mbaok di labaih 400 urang lambaok ka dom văn nghệ sĩ, báo giới, trí thức daok ngak bruk dalam tỉnh. Pak van taom gaok, kapul urang trí thức, văn nghệ sĩ, báo giới tỉnh Đắc Lắc khang panuac lac, meng hatung hatian saong tinh thần trách nhiệm meda patui veik iek prong ý thức công dân, patagok akaok sahneng dalam bruk ngak saong bruk salih bahrau. 

# Hadei di sa tukvak suai livik trun bair, dom harei jaik di ini, yaom padai di bhum taneran kraong CL daok tagok gilac, rilo urang blei duah mai tal mblang hamu saong halan hatian brei jien nyim dahlau ka urang nong hu hamu jaik si yuak. Bruk ini ngak ka urang nong biak chreih chrai uan tabuan, min rilo urang jeng oh ka takre pablei padai kayua mehit lac mbang blei khik piah padai  đông xuân hu peih tabiak meng akaok bilan 3 tal.

# Ủy ban Bhap bani bal raya Hồ Chí Minh peih nyom biai taong yaom bruk ngak mbang kinh tế - xã hội 2 bilan akaok thun saong ba tabiak jalan ngak prong ka dom bilan patui vei. Dua bilan akaok thun, gah công nghiệp saong thương mại di bal raya tagok glaong dut haong tukvak ini thun dahlau. Taong abih tanut pablei lẻ pandap panda saong dịch vụ mek hu labaih 100 ribau tỷ đồng, tagok jaik 12%. Abih di nyu nan lac, dalam bilan 2, bilan Tết, bal raya hu grap tanat pandap panda, peih ngak siam bruk grap tanat yaom kaom nan ye chỉ số yaom blei pandar dalam bilan ini trun 0,40% dut haong bilan dahlau. Ini lac mbang akaok meti dalam 10 thun tapa,  chỉ số yaom blei pandar pak bal raya Hồ Chí Minh dalam bilan Tết trun.

# Tổng thống Pháp Phrăng-xoa Ô-lăng harei kabroi hu mbang ravang pakat karja di Phi-líp-pin. Mbang ravang piah jhul pakhang talei pambuak bruk di dua taneh ia, taphia nan, ginum biai dom jalan pacang cakak biến đổi khí hậu dahlau di nyaom biai pakat dunya di  Paris di puac thun ini.

# Nga saong Cộng hòa Síp bahrau mboh tangin brei adat ka hải quân Nga pandar dom pabah lamnge di negar ini. Bruk nan mek hu hadei di dom mbang ginum biai di  Tổng thống Nga Vla-đi-mia Pu-tin saong Tổng thống Cộng hòa Síp Ni-cốt A-na-xta-si-át daok rivang Mát-xcơ-va, harak mboh tangin sanya ini hu taong yaom lac  brei adat ka hải quân Nga pandar pabah lamnge pak Cộng hòa Síp dahlau diah.

# Phó Tổng thống Bôlivia Ga-xi-a Li-nê-ra hu mbaok di bhum xua ribuk Pan-đô gam saong kapul cứu hộ khẩn cấp brei pandap cứu trợ hu khar ao, laneng ndih saong dom pandap panda ka urang njauk nao plaih di khat lahik. Meng akaok adit bloh, ia kraong Ác-rê ndik tapa ar ngak ka xua ribuk khang di labik bhapbini daok jaik bhum  Amazôn di Bôlivia, ngak ka  450 sang gam saong jaik 5 rabau menuac di 6 bhum bhapbini gah Brak pambuak pagam saong biên giới Braxin njauk panduan nao daok labik karei./.