# Ủy ban Mặt trận Negar Việt Nam tỉnh Đắc Lắc hu peih nyaom biai tacei pato dom jabat, kapul nyaom hu parabha, ba menuac tabiak ứng cử Quốc hội mbang 14 saong Hội đồng bhap bani tukvak 2016- 2021. Suai di abih nan lac harei 10-3-2016, urang ứng cử njauk ngak salh blaoh bruk nộp hồ sơ ứng cử Quốc hội saong Hội đồng bhap bani tỉnh, piah tal harei 17-3-2016 hiệp thương mbang ka dua 2.

# Dalam 2 bilan akaok thun, dalam taneh ia hu labaih 13.900 doanh nghiệp tut angan tame padang barau  saong yaom phun jien abih tih  lac 113 ribau tỷ đồng, ralo jang 1% ka dom doanh nghiệp saong ralo jang 45,8% ka phun jien tut angan tame duk saong thun dahlau. Dom doanh nghiệp kan kandah njauk padeih ngak dalam 2 bilan akaok thun ini nan lac labaih 16.470 doanh nghiệp, ralo jang 17,3% duk saong thun dahlau.

# Urak ini, Việt Nam duah mboh hu jaik 100 nhóm ruak takik mboh dalam labaih 7000 nhóm bhian hu  duah mboh angaok dunya. Ruak takik mboh nan lac ruak takik hu menuac njauk janih ruak nan (meng 1/500 tal 1/2000 urang njauk ruak). Pak negar drei, bruk duah mboh ruak takik mboh daok gaok biak ralo kan kandah kayua kurang phun jien saong kurang thau. Pak sang iek ruak Nhi Trung ương daok khik iek 9000 hồ sơ urang ruak njauk ruak takik mboh.

# Meng harei 27 tal harei 29/2, kapul daong urang joh jo saong uranaih metui medhua VN tỉnh Quảng Trị pambuak saong kapul Canadian Wheel Chair Founation (Kapul radaih lăn tangin Canada) alin hadiah 124 radaih lăn saong 30 radaih lắc ka urang joh jo gaok kan kandah dalam tỉnh. Thun bloh, kapul hu jak ba dom urang ngak pahala peih dom bruk ngak daong ka 7.959 mbang urang joh jo, 220 uranaih metui medhua ngan saong abih tih yaom jien labaih 6,6 tỷ đồng. 

# Thành Đoàn Đà Nẵng bahrau peih bruk tabiak mbaok Bilan dam dara thun 2016 ngan haong kadha “Dam dara ngak bruk brei ka cộng đồng, xã hội sangka iek glang  dam dara”. Bilan dam dara thun ini, Thành Đoàn Đà Nẵng ba tabiak jalan ngak nan lac taong abih kapul nyaom Đoàn pak ala taduan mek bruk peih ngak tuyến jalan hijao – hacih sa-at – siam mekre saong patui khik dom mô hình padang ngak văn minh đô thị; tư vấn pato bruk ngak ka dam dara, pasang iek ruak saong brei sraoh jru oh mek jien ka 3.000 mikva kathaot, baoh sang sarak karja, hu mbaok tame bruk brei darah ngak pahla.

# “Harei pataom tư vấn tuyển sinh – hướng nghiệp thun 2016” barau hu báo Tuổi trẻ, mintri pato megru pambuak bruk peih tabiak di sang bac đại học Bách Khoa ban raya HCM. Harei pataom thun ini pachreih hu jaik 30 ribau anek saih ban raya HCM saong dom tỉnh yau Long An, Đồng Nai, Bình Dương, Bình Phước, Tây Ninh, Bà Rịa – Vũng Tàu, An Giang. Harei pataom hu pabak ka anek saih saong amiak ame dom thông tin tư vấn, hướng nghiệp dalam mbang pakacah “2 dalam 1” jaik tal.

# Tỉnh Bạc Liêu bahrau buh tabiak 6 tỷ đồng piah ka dom puk palei peih ngak dom jalan samar drah pacang cakak tua riya pandiak bhang. Tal tukvak ini dalam  hu labaih 8.500 ha padai saong 6.000 ha hadang njauk khat lahik kayua pandiak bhang, mbak. Taphia di bruk buh jien tabiak daong ka dom puk palei, tỉnh Bạc Liêu jeng likeu Raja-ei, Mentri ngak nong saong patagok palei pala daong 170 tỉ đồng piah pacang caga tua riya pandiak bhang. Yaom jien ini pandar piah kuac kuah jaik 180 ribaong pakat 2, pakat 3 ngan haong 550 km piah padang aia duh ka bruk ngak mbang pala drak.

Patui di ini dom khau tin dunya:

# Rajaei NB daok kuhria mbaoh tangin tame sa thỏa thuận saong chuyển giao trang thiết bị QP ka Indonesia saong Malaixia. Bruk ngak ini rah tabiak dalam tuk TQ daok patagok bruk ngak quân sự di Biển Đông. NB saong Philippin dahlau nan jeng quyết định mbaoh tangin tame sa thỏa thuận jhul pakhang bruk chuyển giao dom trang thiết bị QP saong pambuak bruk công nghệ. Ini lac thành viên ASEAN akaok meti mbaoh tangin tame thỏa thuận QP saong NB.

# Trung Quốc bahrau duah mboh dua urang tra njaom mbak vi-rút Di-ca (Zika), patagok manuac urang njaom mbak Di-ca pak negar ini tagok 8 urang. Dua urang bahrau njaom mbak vi-rút Di-ca pak Trung Quốc nan lac dua adei sa-ai bahrau mai veik  negar hadei di mbang nao rivang Vê-nê-xu-ê-la. Dua urang nan harei kabroi hu brei thau lac njaom mbak vi-rút Di-ca saong urak ini daok hu iek ruak pak sang iek ruak.

# Tổng thống Iran Hát-xan Ru-ha-ni  saong gah cải cách đồng minh mek hu jayah praong dalam bruk bầu cử harei 26/2. Ngan saong 90% dom phiếu bầu cử QH hu kiểm, gah cải cách đồng minh di Tổng thống Iran Hát-xan Ru-ha-ni mek hu taong abih 30 gaiy di ban ine Têhêran di Quốc hội. Gah quan sát ndom lac, bruk bầu cử QH hu peih tabiak tukvak barau ka Iran thực thi dom salih barau saong dang anak bruk tuk jaik 60% dalam 80 triệu bhap bini umo ala 30 thun daok chreih chrai ba drei tame saong dunya hadei di tuk lệnh cấm vận hu yak klak./.