# Biar harei kabroi (28/7), Phaok Thủ tướng Vũ Văn Ninh haong kapul ngak bruk di Raja-ei  mai rivang saong pasang iek bruk peih ngak danak dak bruk ngak pakat negar padang ngak palei pala bahrau di xã Khánh An, huyện U Minh, tỉnh Cà Mau saong rivang Cụm khí- điện- đạm Cà Mau daok dalam xã Khánh An. Phaok Thủ tướng Vũ Văn Ninh brei thau lac dalam tukvak padang ngak palei pala bahrau, puk palei brei ngak abih hatai ngak suai lavik, njauk jak ba pren di bhap bani, oh pachap bhap bani rik tame, abih di nyu mnan lac dom baoh sang kathaot.

# Pahadar 5 thun peih bruk jak ba “ urang Biet dahlau di abih njauk pandar pandap Biet Nam” di mintri chinh tri, melam kabroi 28/7 di Hà Nội, báo Thương hiệu saong Công luận peih danakdak pok je angan patagok khang kajap saong pandap chat luong glaong Biet Nam mbang yaka 1 thun 2014. Danakdak pok je 60 angan saong pandap chat luong di dom doanh nghiep. Ông Vũ Đức Thuận – Tổng biên tập báo Thương hiệu saong Công luận, akaok mban peih ngak danakadak brei thau: “Tapa danakdak ini, dom doanh nghiep, doanh nhan hu dom salih bahrau dalam bruk dak padang saong patagok angan khang kajap, ba pandap panda chat luong glaong hu angan nao tal urang blei dalam saong langiu taneh ia. Danakdak jeng lac labik pok je dom pren yava, rik daong praong di doanh nhan Biet Nam ngan saong bruk salih barau saong patagok taneh ia.

# Thun ini, bal Đà Nẵng pambuak haong raja-ei puk palei padang ngak bahrau saong pasiam veik jaik 900 baoh saong ka dom sang sarak karja, urang kathaot daok dalam ban . Yaok baoh sang yaom meng 30 tal 60 triệu đồng. Taong abih phun jien 18 tỉ đồng; Langiu di nan, bal Đà Nẵng daok hu daong brei pandap panda piah ngak mbang yau: Tủ nhôm saong bàn ghế pablei bánh mỳ; radaih pablei aia tabau, máy khoan ngak nghề mộc…daong ka mikva grap tanat rai diuk.

# Harei kabroi 28/7 di Hà Nội, mintri Y tế peih mít tinh pachreih tui harei Viêm gan dunya 28/7 ngan saong kadha “ dut iek, iek darah samal ruak viêm gan kayua virus”. Tui mintri Y te, urang njaom virut viêm gan B, viêm gan C di dunya urak ini jaik 1 tỷ urang saong meda hu rilo jang, dalam nan, yaok thun hu yaok ratuh rabau urang metai kayua ung thu gan saong xơ gan. Urak ini, hu vắcxin pacang caga ruak viêm gan B; daok ruak viêm gan C, yaom lac oh hu vắc xin min dom janih jru the he barau meda iek siam hu 80% urang ruak, tagok jaik 20% duk saong dahlau deih.

# Biar harei kabroi (28/07), Olympic Hóa học dunya mbang ka 46 pak Việt Nam hu tamat blaoh. Kapul anek saih Việt Nam mek hu 2 huy chương Ameh, 2 huy chương Pariak. Ini lac thành tích glaong abih di kapul anek saih Việt Nam hu mbaok dalam dom mbang Olympic Hóa học dunya kuhria meng thun 2010 tal ini. Dua anek saih Việt Nam mek huy chương Ameh nan lac Phạm Mai Phương saong Phạm Ngân Giang anek saih sang bac trung học phổ thông chuyên Amseterdam- Hà Nội (Hà Nội).

# Daok dalam chien dich dam dara halan hatian he thun 2014,  Kapul y Bác sỹ sang bac Đại học Y dược ban raya Hồ Chí Minh hu nao iek ruak saong brei jru saoh ka dom urang ruak di sang chinh sach, sang kan kathaot di dua xa pulao An sơn saong Nam Du huyện Kiên Hải, tỉnh Kiên Giang. Di ini, Kapul hu iek tong quat ye : dut điện  tim, dut darah, siêu âm, iek phụ khoa, tagei- mbaok, tu van pren yava, iek ruak saong brei jru saoh ka 1.000 urang, ngan saong yaom jien jru brei labaih 100 triệu đồng. Ông  Nguyễn Thanh Long, daok di Ấp An Cư, xã đảo An Sơn huyện Kiên Hải mai iek ruak brei thau: “Kapul bác sĩ Y dược ban raya HCM mai pak ini, bhum atah bayah xa pulao atah di baoh taneh 90 cay so iek ruak ka mikva. Bruk ini, mikva taong yaok glaong hatai di Kapul Đại học Y dược”.  

# Cục pala drak – Mentri ngak nong saong patagok palei pala pachreih dom tỉnh Nam bộ, njauk pambuak gauk ngak tabiak baoh kayau rải vụ, plaih bruk  baoh kayau karei bilan daok dalam sa vaktu yau gauk nan ye nyu hu biak rilo, ba tal laik yaom. Hu 5 janih phun pala hu palih ruah pambuak gauk labik ngak tabiak rải vụ nan lac phun darang, pa-aok, chôm chôm, thanh long, duriang. Mblang taneh rải vụ pataom tame dom tỉnh  Đồng Tháp, Tiền Giang, Vĩnh Long, Hậu Giang, Cần Thơ, Bến Tre, Long  An saong Bình Thuận,  ngan haong mblang taneh  43.420 ha angaok tổng mblang taneh 149.530ha daok pala.

Khaw tin dunya:

# Yaok ty urang islam di dunya harei kabroi 28/7 chreih chrai mbang roya Ây-đil Fit-ry (Eid al-Fitr), sa dalam dom harei roya praong dalam thun di urang Islam. Roya Ây-đil Fit-ry rah tabiak dalam 3 harei, hadei di tamat bilan eik Ramadan. Thun ini, urang Islam Inđônêxia mbang rayo dalam rilo bui sambai meng bruk ong Joko Widodo barau hu pilih ruah pok ngak urang dang akaok sa taneh ia hu nền kinh tế praong abih Đông Nam Á dalam mbang pilih ruah di akaok bilan ini.  

# Harei kabroi (28-7), Philippin raok bhap bani ka 100 triệu Philippin saong nan lac negar ralo bol bhap dang ka 12 angaok dunya. Lambaok Quỹ Dân số Liên hợp quốc pak Philippin Clau Bếch (Klaus Beck), brei thau, ngan haong 54 % bol bhap umo ala 25 thun, Philippin njauk caik hatai tal bruk pato megru, pato tacei ilamu ngak bruk, ba brei bruk ngak ka dam dara uranaih. Pak dom labik daok di urang kan kathaot, urang kamei daok kurang thông tin saong taom gaok dom dịch vụ iek glang pren yava. Thun 2012, Philippin hu hukum pandar dom pasak y tế, labik pasang iek ruak njauk ngak brei thaoh oh mek jien dom jalan ngak pacang cakak metian bahrau ka bhap bani, abih di nyu lac dom urang kathaot./.

# Harei kabroi 28-7, dom labik ngak bruk dalam taneh ia Pháp tuan cờ rủ dalam harei quốc tang pahadar dom urang metai dalam mbang kapal haok di Hãng kapal ahaok Angiêri laik atah Gô-si (Gossi) di  Mali) 80 km nao gah meraong, jaik bien gioi Buốc-ki-na Pha-sô, harei 24-7. Dalam abih tih 118 urang metai hu 54 urang quốc tịch Pháp. Langiu di nan, dom urang nao angaok sruh kapal ahaok nan hu rilo quoc tich ye: Libăng, Angiêri, Tây Ban Nha, Canađa, Đức, Lúcxămbua, Camơrun, Bỉ, Ai Cập, Ucraina, Thụy Sỹ, Nigiêria saong Mali.