# Mentri Công Thương brei thau, dom urang pal akaok dom negar dalam Hiệp định pambuak bruk xuyên Thái Bình Dương (TPP) hu ynjauk gauk brei mboh tangin tame Hiệp định TPP dalam harei 4/2 anak tal di Auckland, New Zealand. Taong abih negar hu mbaok dalam TPP tagok tal 12.  Dom negar hu mbaok dalam TPP njauk gauk ka tukvak 2 thun piah quốc hội dom negar mboh tangin tame hiệp định. Yau nan, Hiệp định pambuak bruk xuyên Thái Bình Dương hu hiệu lực dalam thun 2018. Dom gah hu pambak tal tuk Việt Nam hu mbaok tame TPP nan lac gah raong glang, doanh nghiệp phân phối – pablei lẻ, gah doanh nghiệp sit haong gap.

# Mintri pato megru barau brei thau angan dom anek saih mek hu giải dalam mbang pakacah palih ruah anek saih joi pakat negar THPT 2016. Tui nan, ban HN hu 146 anek saih mek hu giải glaong di abih dalam mbang pakacah anek saih joi pakat negar thun 2016. Patui di nan lac kapul Hải Phòng, Nghệ An, Nam Định… , saong Cao Bằng hu anek saih mek hu giải takik di abih. Njauk caik hatai nan lac dalam taneh ia hu 6 anek saih mek hu giải nhất anek saih joi pakat negar môn sajarah.

# Gah rivang ma-in bal Đà Nẵng mbang akaok mereip ngak tui jalan pambuak gauk di Karja – Sang bac - Doanh nghiệp dalam pato tacei hướng dẫn viên du lịch sap Hàn Quốc. Tui nan, labaih 40 sinh viên thun puac Khoa Sap Hàn, Sang bac Ngoại ngữ Đà Nẵng hu palih ruah piah bồi dưỡng, pato tacei nghiệp vụ hướng dẫn viên Sap Hàn. Dalam tukvak 3 bilan, dom sinh viên hu ngak hướng dẫn viên ka dom doanh nghiệp lữ hành daok hu tuai Hàn Quốc. Tal urak ini, Đà Nẵng hu jaik 50 hướng dẫn viên Sap Hàn Quốc.

# Hadei di jaik 5 bilan padang ngak, harei 29/1, tatua Cẩm Kim daok di ban sit Hội An, tỉnh Quảng Nam hu peih pakak, pambuak pagam dom xã gah daih kraong Thu Bồn saong pasak ban klak Hội An, tỉnh Quảng Nam. Tatua Cẩm Kim tah labaih 620 m, sa làn radaih. Tatua ngak abih 32 tỷ đồng. Tatua Cẩm Kim barau padang ngak,  pabak hatai caong di bhap bini ban Hội An saong dom xã bhum ti-mur tỉnh Quảng Nam.   

#  Harei 29/1, Văn phòng thường trực Ban Tacei pato pacang cakak bala meng langik tasik saong roh duah urang njauk bala tỉnh Bình Thuận drei thau: riyak prong gam haong angin khang taong karam sa sruh gilai ikan di urang taong ikan daok di phường Phước Hội, bal sit La Gi. Sruh gilai karam kayua ong Lê Thành Tân lac urang dang tabiak peih nduac. Angaok gilai hu 15 urang ngak. Harei 25/1, tuk gilai daok nuac tame pabah lange La Gi, sruh gilai njauk riyak taong khang tame kè patau. Urak ini po gilai nan hu pah manuac urang mai peih talaih saong trục vớt hu máy tàu, ba tame ar pasiam veik, kuhria khat lahik labaih 3 tỷ đồng.

# Dom harei tapa, kayua langik tasik di dom tỉnh, ban gah brak trun biar, ngak kan kandah tal bruk pabak  dom janih njam patam, baoh karaoh, nan ye dom janih ini di ban raya HCM daok tagok yaom hasit. Di dom drak yau Thị Nghè, quận Bình Thạnh; drak Tân Định, Quận 1; drak Vườn Chuối, quận 3 yaom njam rum tía; 18 ribau đồng sa kg, sabei thìa 17 ribau  đồng sa kg, njam lang 18 ribau đồng sa kg, cà rốt 25 ribau đồng sa kg… Yaom njam patam, baoh karaoh tagok di dom drak pasar, daok dom siêu thị yaom biak tani tanat. Min, yaom ralo pabui di ban raya HCM jeng daok di tanut glaong. Di dom drak pasar, ralo pha yaom 95 ribau đồng sa kg, ralo ba rọi 120 ribau đồng sa kg.

Patui di ini dom khau tin dunya:

# Hadei di tuk dom lệnh taong phat  Iran hu tah klaak, biak ralo hãng kapal haok prong di châu Âu brei thau meda samar peih veik dom mbang par tal negar ini. Urak ini, hãng kapal haok negar di Iran (Iran Air) yaok adit hu 3 mbang par tapak tal Luân Đôn ( Anh) saong 2 mbang par tal Pari  (Pháp) saong Amxtecđam (Hà Lan).  

# Cảnh sát Indonesia barau tabiak mbaok ứng dụng tích hợp angaok phon pan tangin, piah pachreih bhap bini khan ka jabat chức năng thau dom bruk khủng bố. Urang patagok Adjie Pratama brei thau, ứng dụng barau hu angan ieu lac “pacang cakak khủng bố”, hu tính năng truyền tapak dom panuac ka dom bruk khủng bố tal pasak thông tin di cảnh sát.

# Ác-hen-ti-na  brei thau , sa urang akaok mereip njaom vi-rút Zi-ka di negar ini. Urang ruak nan lac sa urang kamei Cô-lôm-bi-a urak ini daok di bal ine Bu-e-nốt Ai-rét (Buenos Aires) di Ác-hen-ti-na, dương tính haong vi-rút Zi-ka. Urang kamei ini bahrau mai meng  Cô-lôm-bi-a, labik daok tamuh khang jit Zi-ka. Hadei di tuk duah mboh urang njaom vi-rút Zi-ka akaok meti di Ác-hen-ti-na, karja negar ini hu peih bruk pruh jru pametai jamaok pak bal ine Bu-e-nốt Ai-rét saong dom labik ngoại ô hu ralo bhap bani./.