Peih akaok khau tin dalam taneh aia harei ini, daa mikva saong taong abih gauk pang khaw tin ndom ka dom bruk ngak salam uan 40 thun Harei Peih paha gah Meraong, yasa taneh aia (30/4/1975 – 30/4/2015)

# Njauk tame 6tuk meteh page harei ini 30/4, pak Bal raya Hồ Chí Minh rah tabiak mít tinh, duyệt binh, diễu hành salam uan 40 thun yasa taneh aia. Tổng bí Thư Nguyễn Phú Trọng, Urang dahlau diah ngak Tổng bí thư Lê Khả Phiêu, Nông Đức Mạnh, Akaok negar Trương Tấn Sang, Thủ tướng Nguyễn Tấn Dũng, Akaok Quốc hội Nguyễn Sinh Hùng saong ralo urang dahlau diah, urang urak ini dang akaok,   Đảng saong karja jeng hu mbaok ... Ralo kapul nyaom tuai damuai dunya, amaik Việt Nam anh hùng, dom tướng lĩnh bol lin saong công an, lambaok ka dom urang dahlau deih ngak bol gam haong lambaok dom ban, ngành... jeng hu mbaok angaok lễ đài. Bruk pahadar hu dua bruk ngak praong nan lac cuh gilau pahadar saong mít tinh, diễu binh, diễu hành.

 # Page harei kabroi 29/4, Kapul urang lambaok Ban Chấp hành Trung ương Đảng, Akaok negar, Quốc hội, Raja-ei, Ủy ban Trung ương Mặt trận negar Việt Nam jeng hu caik bingu, tame Kalan sirah Chủ tịch Hồ Chí Minh tukvak pahadar 40 thun Harei peih paha gah Meraong, yasa taneh aia. Patui di nan, Kapul urang lambaok Ban Chấp hành Trung ương Đảng, Akaok negar, Quốc hội, Raja-ei, Ủy ban Trung ương Mặt trận negar Việt Nam hu mai caik vòng bingu saong pahadar dom Anh hùng liệt sỹ pak Đài tưởng niệm dom Anh hùng liệt sỹ.

 # Tỉnh Long An hu peih ngak dalam prong prang bruk pahadar 40 thun peih paha gah meraong yasa taneh aia. Akaok negar Trương Tấn Sang saong lambaok dom urang dahlau diah, jang yau urak ini dang akaok tỉnh, dom urang jakar lão thành cách mạng, amaik Việt Nam anh hùng, dom urang dahlau diah ngak bol lin gam haong ralo bhap bani tỉnh Long An mai pataom mbaok. Dalam tukvak nan, akaok negar hu nao rivang Amaik Việt Nam Anh hùng Nguyễn Thị Út pak ấp Nhơn Trị, xã Nhơn Thạnh, bal sit Tân An saong Amaik Việt Nam Anh hùng Nguyễn Thị Ba pak ấp Đình Cang, xã Bình Thạnh, huyện Thủ Thừa, tỉnh Long An.

 # Pak bal sit Vị Thanh, tỉnh Hậu Giang, Thủ tướng Nguyễn Tấn Dũng hu mai pataom mbaok dalam tuk pahadar 40 thun Harei peih paha gah meraong, yasa taneh aia. Mai pataom mbaok, daok hu urang dahlau diah ngak Tổng bí thư Lê Khả Phiêu, urang dang akaok dom bộ, ban, ngành, kapul nyaom trung ương, dom urang Lão thành cách mạng, Amaik Việt Nam anh hùng, Anh hùng lực lượng vũ trang bhap bani gam haong dom rairah bhap bani tỉnh Hậu Giang. Jeng dalam van ngak lễ, Thủ tướng Nguyễn Tấn Dũng hu pok brei ka lambaok 28 angan Amaik Việt Nam anh hùng kayua Karja pok brei. Tỉnh Hậu Giang jeng hu peih ngak lễ truy tặng  224 angan prong glaong Karja Amaik Việt Nam anh hùng di tỉnh. Ini lac bruk brei thau dhal phol di Đảng, Karja saong bhap bani ngan haong bruk hy sinh gandang gandi, dom rik daong prong prang bo oh hu baoh panuac halei ndom abih di dom Amaik dalam bruk peih paha bangsa, yasa taneh aia.

 Patui veik nan lac dom khaw tin njauk caik hatai karei:

# Biar harei 29/4, pak bal raya Hồ Chí Minh, Phaok akaok negar Nguyễn Thị Doan hu van taom gaok ong Bounnhang Vorachith, Phaoak Akaok negar Cộng hòa Dân chủ bhap bani Lào, Akaok kapul nyaom urang lambaok pakat glaong Lào tapa hu mbaok dalam van Pahadar 40 thun Harei peih paha gah meraong, yasa taneh aia. Pak van taom gaok, dua phaok akaok negar njauk hatai taong yaom: talei rohim pambuak bruk nao mai taong abih gah di dua Đảng, Karja, Raja-ei saong bhap bani dua negar Việt Nam - Lào daok dak harei dak cakrok patagok khang kajap, siam lagaih, kein laba di taong abih gah.

 # Jeng dalam biar harei nan, pak Bal raya Hồ Chí Minh, Phaok Thủ tướng Nguyễn Xuân Phúc hu taduan raok kapul urang lambaok Campuchia kayua amuk Men Xom On, Ủy viên Ban Thường vụ Trung ương Đảng Bhap bani Campuchia, Phaok Thủ tướng Raja-ei Hoàng gia Campuchia ba akaok, tukvak tapa Việt Nam pataom mbaok dalam van ngak Lễ pahadhar 40 thun peih paha gah Meraong, yasa taneh aia Việt Nam. Pak van taduan raok, dua gah hu ginum biai saong njauk hatai haong gauk lac dalam tuk bruk dunya saong khu vực urak ini, Việt Nam saong Campuchia njauk patagok jang bruk gul pataom, talei rohim pambuak bruk nao mai saong daong ba gauk, njauk haong bruk van klaak rup drei di dom rai rah nao dahlau, pabak hatai caong khin di bhap bani dua negar, ngak brei sron mbon, grap tanat saong patagok di khu vực saong angaok dunya.

 # Tukvak padeih lễ thun ini, tuai damuai mai rivang ma-in, padeih padei pak bal sit Nha Trang, tỉnh Khánh Hòa tagok ralo. Pak dom labik rivang ma-in yau: bến tàu du lịch Cầu Đá, Bimon Ponagar, Vinpearl Land, Viện Hải dương học, Khu du lịch Long Phú… pak bal sit Nha Trang mboh biak ralo tuai damuai. Piah pachreih tuai damuai mai mong iek, rivang ma-in, dom labik ndih daok, labik ma-in hu peih ngak ralo bruk ma-in bahrau, ralo janih, ralo kadha. Piah grap tanat ka tuai damuai hu ma-in sambai dalam siam mekre, patak pataom dalam tukvak padeih Lễ, tỉnh Khánh Hòa hu padang ralo kapul nyaom liên ngành nao pasang iek bruk niêm yết yaom saong chấp hành niêm yết yaom pak dom labik ngak dịch vụ, du lịch taphia di nan brei thau ka jalan talei pandiak piah daong ka tuai damaui.

 Khaw tin dunya:

# Mỹ bahrau hu panuac caong Iran daong ba dom gah di Yê-men daok la tame ginum biai piah duah tabiak sa jalan chính trị ka bruk srau kadau di taneh ia Trung Đông ini. Tui ong Ke-rry, Mỹ pachreih taong abih gah njauk patagok bruk ngak di drei piah patrun bruk mesruh gauk, brei adat ka dom mbang ginum biai rah tabiak piah khik cagakein laba di bhap bini Yê-men. Iran hu maong lac hu labik dang praong tal kapul vũ trang Hút-thi  daok khik iek ban ine Xa-na di Yê-men.

 # Thủ tướng Ucraina A-xê-ni Y-át-xê-ni-úc (Arseny Yatseniuk) bahrau brei thau, lin padam pui Ucraina daok pacang hu pui khuah glai daok mbuan si pambak praong tal jaik sang mac hạt nhân Chéc-nô-bưn (Chernobyl). Tui ong Y-át-xê-ni-úc, tanut phóng xạ di labik ini jeng daok di tanut bình thường. Pui khuah glai jaik sang mac điện hạt nhân ngak ka urang mboh duh hatai jang ka bruk patagok tanut phóng xạ dalam labik ini. Jabat khẩn cấp di Ucraina hu brei labaih 300 lin padam pui , 3 sruh kapal haok saong sa sruh trực thăng mai piah pacang padam pui.

  # Tui ong Gia-mi-ê Mắc-gôn-rích (Jamie McGoldrick) urang di Liên hợp quốc iek gah daong  ngak pahla ka Nê-pan, rajaei Nê-pan bahrau pandar dom taneh ia jhui payua gilac dom kapul cứu hộ tal taneh ia ini. Karja Nê-pan mboh lac, urang hu ginup pren, ginup menuiac piah cứu hộ saong ngak dom bruk hadei di mbang megei baoh taneh kayua hu pambuak bruk haong dom kapul chuyên gia taneh ia lingiu daok hu mbaok vil val ban ine Cát-man-đu (Kathmandu)./.