# Sở Thông tin saong Truyền thông tỉnh Kon Tum hu peih nyaom pakacah pathau khan lưu động ka an toàn giao thông tỉnh Kon Tum mbang ka sa. Nyaom pakacah thun ini hu 11 kapul nyaom, ngan haong 110 urang pathau khan mai meng 8 huyện, bal saong 3 đơn vị hu mbaok tame. Dom kapul nyaom  pakacah 3 asal kadha: pathau meng cambuai, tiểu phẩm saong văn nghệ jak ba dalam tukvak meng 30 tal 35 minit. Nyaom pakacah piah paglaong hatai saneng ngak siam adat hukum di urang peih radaih saong dak padang ilamo nao mai angaok jalan mbak dalam bhap bani. 

# Tỉnh Quảng Ngãi duah mboh jiak 100 mbang vi phạm hành lang an toàn lưới điện. Yaom lac hukum Điện lực hu tacei tabiak bruk oh brei padang ngak atau pasiam veik sang dok dalam paga khik caga an toàn jalan talei điện, min jabat brei adat song po danak dak oh sangka tal quy định ni. Ong Cao Chức, phaok akaok iek gah Công ty Điện lực Quảng Ngãi brei thau, bruk urang padang sang dalam phạm vi hành lang an toàn lưới điện hu rah tabiak gam, oh pacang cakak hu.

# Pak bal raya Hồ Chí Minh, Cục Cảnh sát Hình sự, Mentri Công an peih ngak nyaom biai giao ban lực lượng cảnh sát hình sự pakat negar thun 2015. Meng akaok thun tal ini, dalam negar rah tabiak jaik 52 ribau mbang ngak suan adat hukum hình sự, dalam nan hu duah mboh labaih 39 ribau vụ, mek langyah labaih 76 ribau urang. Brukh tội phạm trun, min tính chất jeng daok mboh biak trak, bruk ngak suam adat hukum biak kanjah jhak, khang hatai abih di nyu nan lac kaol pametai manauac.

# Hadei di labaih 3 thun salih tapa song ba tame ngak, mô hình sang bac bangsa gam bac gam dok di dom xã bhum ceik tỉnh Ninh Thuận dak harei dak patagok siam lagaih. Di dom sang bac trung học cơ sở yau Phan Đình Phùng (xã Ma Nới, Ninh Sơn), Nguyễn Văn Linh (xã Phước Tân), Đinh Bộ Lĩnh (xã Phước Bình, Bác Ái), bruk salih tapa hu dong ka anek saih mbang dok hu siam lagaih jang, anek saih tagok jiak 95%  dong patagok bruk pato pakai song bac daa.

# Tukvak tapa huyện Hàm Thuận Bắc tỉnh Bình Thuận hu peih ngak ralo sarak patagok bruk ngak mbang kinh tế dalam bhum urang Cam yau: peih bruk brei 248 ha taneh pala drak ka 276 baoh sang; brei ka 378 baoh sang mesre piah blei 78 drei limo menek. Mei meng bruk patagokbaoh jeng siam mekre di dom công trình thủy lợi nan ye năng suất padai di bhum urang Cam urak ini kuhria rah tapa hu meng 50 tạ tal 56 tạ/ha/vụ; pandap mbang kuhria rah tapa tui akaok manuac hu 980kg sa urang dalam sa thun, glaong jang dua mbang dut haong dahlau diah.

# Di Đồng Nai, Cục khik ramik, iek ruak pambuak bruk song Sở Y tế Đồng Nai peih nyaom pataom iek veik 2 thun peih ngak kỹ thuật tim mạch can thiệp tui đề án sang iek ruak vệ tinh. Ngan song phun jien hu tỉnh buh tabiak labaih 75 tỷ đồng. Sang iek ruak Thống Nhất (Đồng Nai) hu ngak salah bruk pasiam cơ sở pandap panda ka Pasak tim mạch song ginup pandap panda bahrau. Urak ni, bruk ba urang ruak di khoa tim mạch can thiệp meng đồngnai tagok di gah ngaok hu patrun, meng 47 % dok 4% dalam thun ni.

 # Pak muyim Ilamo dom bangsa Việt Nam pak tỉnh Thái Nguyên hu rah tabiak mbang parang iek thaik binguk nghệ thuật ngan haong kadha “Thái Nguyên palei tea”. Mbang parang iek meyaih khan tal bhap bani labaih 100 tác phẩm di 80 tác giả chuyên saong oh chuyên daok diuk rai dalam tỉnh Thái Nguyên. Asal kadha do dom tác phẩm nhiếp ảnh brei mboh ka rai diuk di bhap bani bhum Việt Bắc, mblauk abih nan lac rai diuk ilamo, hatai saneng di manuac urang bhum tea Thái Nguyên.

Khaw tin dunya:

# Gah y tế dunya brei thau, yaok thun hu labaih 142 ribau urang di Châu Âu hu iek ruak HIV dalam nan hu dom negar gah timun hu urang njom mbak glong di abih. Dalam tuk nan, urang njom HIV di dunya hu patrun 35% dalam 15 thun tapa.

# Raja-ei Na Uy hu patabiak dom jalan pasang iek tapen negar piah pacang cakak dom urang oh hu harak gar nao tame negar ini, dalam tukvak manuac urang tị nạn ba gauk mai Na-uy dak harei dak ralo. Na Uy jeng mong iek veik bruk peih prong pasang iek pak dom pabah mbang negar brei ka bruk pajeng ba meng kapal haok saong dom labik tapen negar dalam taneh aia.

# Mintri Môi trường Nhật Bản tabiak panuac lac, thun jien padai 2014 (tamat bloh di bilan 3 thun 2015) lac thun camereip hadei di 5 thun, lượng khí thải ngak hiệu ứng sang camin di Nhật Bản patrun. Dalam thun jien padai 2014,Nhật bản phát thải 1 tỉ 650 triêu tấn khí sang camin, trun 3% dut song tukvak ini thun dahlau./.