# Pak bal Buôn Ma Thuột, Ủy ban An toàn giao thông Pakat negar pambuak haong Ủy ban bhap bani tỉnh Đăk Lăk peih "Harei pataom an toàn giao thông di bhap bani dom bangsa takik Tây Nguyên". Labaih 1.200 urang đoàn, dam dara lambaok ka bhap bani dom bangsa takik Tây Nguyên hu mbaok tame danak dak. Pak harei pataom, Ban Peih bruk hu alin 1.000 mũ bảo hiểm  ka uranaih kathaot, bhap bani hu rai diuk kan kandah; pathram ilamu, pakacah peih radaih mô tô, radaih patuh; diễu hành pathau khan an toàn giao thông labik palei pala…

# UB bhap bini huyện palao Lý Sơn bahrau pok panuac likau UB bhap bini Quảng Ngãi oh brei dom kapan công suất prong tong chap dom janih kaya ikan tapen palao piah pamong bruk padang palao Lý Sơn jeng sa labik khik ramik tasik rilo janih.Ong Trần Ngọc Nguyên, akaok UB bhap bini  huyện palao Lý Sơn brei thau: Kapan công suất prong labaih 90CV tong chap tapen takai tasik  ye chap abih dom janih kaya ikan tapen tasik. Bruk nan nyu ngak kan kandah tal dom urang tong ikan jiak takai tasik, mbuan ba tal meriak gauk.

# Ủy ban bhap bani tỉnh Quảng Nam bahrau pambuak haong Viện Hàn lâm khoa học Nga peih Nyaom biai khoa học “Pandar công nghệ glaong dalam bruk khik ramik inem krung Chăm dalam tỉnh Quảng Nam. Dom urang ilamu dalam saong langiu negar hu rik tame biak ralo dalam tham luận, ba tabiak dom roh duah ilamu hu tính ứng dụng glaong dalam tukvak khik ramik dom inem krung Chăm, njauk caik hatai hu dom roh duah ka langyah cấu trúc saong khoáng chất vật liệu padang quần thể Mỹ Sơn; roh duah cấu trúc vật liệu padang quần thể Mỹ Sơn saong dom jalan phục chế, khik ramik...

# Tapa 2 thun peih ngak đề án patagok y tế tasik, palao Việt Nam tal thun 2020 (Đề án 317), tỉnh Bình Định hu ba tabiak “Jalan patagok y tế tasik, palao tỉnh Bình Định tal thun 2020”, peih rilo mbang pasram megru, pabak ilamu ka urang tong ikan piah khik iek pren yava, thau sơ, cấp cứu song ba urang njauk bala tal dom cơ sở y tế jiak di abih. Sở Y tế tỉnh jeng hu pambuak bruk song dom kapul nyaom, urang dong, brei saoh yaok ribau tu jru angaok kapan, tacei pato jalan pandar ka urang tong ikan. 

# Thun ini, tỉnh Ninh Thuận hu 6.693 thí sinh mboh tangin tame pakacah tốt nghiệp trung học phổ thông. Dalam nan hu 4.800 anek saih pakacah pak cụm pakacah tỉnh Lâm Đồng tui jalan “2 dalam 1” saong 1.893 anek saih hu mbaok tame pakacah pak cụm pakacah piah mek kết quả công nhận tốt nghiệp. Pak cụm pakacah bal Đà Lạt, Lâm Đồng hu 57 anek saih bangsa bangsa Chăm saong Raglai Sang bac bangsa gam bac gam daok di Ninh Thuận hu mbao tame saong hu bruk sangka biak ralo di dom pakat ngành, puk palei 2 tỉnh. Sở Pato megru gam haong dom gah chức năng hu sangka, palaghaih ka dom adei, yau daong 1 bilan jien học bổng saong 1 triệu đồng jien mbang huak nao mai ndih daok; Sang bac Đại học Đà Lạt jeng daong 2 sruh radaih ba raok anek saih, taphia di nan brei saoh labik mbang, labik daok saong brei dam dara halar hatian daong anek saih dalam dom harei hu mbaok tame pakacah pak  Đà Lạt. Adei Thập Nữ Ngọc Huyền – Anek saih sang bac gam bac gam daok tỉnh Ninh Thuận brei thau: Dahlau di mbang pakacah ini khaol dahlak hu dom anai gru, cei gru sangka, tacei pato abih hatai. Khaol dahlak hu daong radaih nao Đà Lạt, ini lac kadha biak bui sambai haong khaol dahlak”.

# Dalam “Adit du lịch hajao bhum taneran krong CL 2015” harei 30/6 di ban sit Cần Thơ, Mban tacei jalan Tây Nam Bộ pambuak bruk song dom mintri, dom gah TƯ peih nyaom biai xúc tiến đầu tư gah du lịch hajao bhum taneran krong CL. Nyaom biai hu pataom tame bruk duah jalan pasiam veik dom kan kandah dalam xúc tiến tame bruk du lịch dalam tukvak tapa, tapa nan yaih khan dom kein lagaih gah du lịch di bhum palei, daong ka dom po đầu tư thau hu dom dự án prong, jhul pakhang bruk patagok du lịch tui jalan khang kajap.

# Hadei di sa tukvak suai livik yaom kaom grap tanat, jaik di ini bruk pablei tabiak di baoh la-u thu pak tỉnh Bến Tre gaok kan kandah, yaom trun. Pak tukvak ini, sa pluh baoh la-u thu ( 12 baoh) yaom labaih - kurang 40 ribau đồng, trun 30% dut haong bilan dahlau. Dom janih pandap ngak meng la-u yau: cơm la-u nạo sấy, sữa la-u, menyek la-u... jeng trun tui... Makna di nyu mai meng darak pasar blei tame langiu negar abih di nyu lac dom negar Trung Đông saong Trung Quốc daok trun sản lượng. Tỉnh Bến Tre daok ba tabiak jalan ngak nan lac oh patagok mblang taneh la-u bo brei patagok bruk meyaih khan pandap panda, peih prong darak pasar.

# Tổng thống Mỹ Barắc Ôbama melam bloh (tui tukvak VN) hu mbaoh tangin tame ngak jeng hukum dom dự luật pablei salih, dalam nan jao ka Tổng thống “Quyền pachreih patagok bruk pablei salih” dok hu ieu lac quyền ginum biai samar. Ni hu mong lac jalan peih tabiak bahrau ka dom mbang ginum biai pablei salih dok tavak tavaiy di Mỹ song dom negar châu Á-Thái Bình Dương. Ngan song hukum ni, Tổng thống Ôbama meda peih prong jalan ngak salah Hiệp định pambuak bruk xuyên Thái Bình Dương song 11 negar karei karei di châu Á-Thái Bình Dương jang yau dom panuac sinya dalam bruk pablei salih karei karei.

# Kapul kỹ sư di sang bac Đại học Binh-ham-tơn (Binghamton), Mỹ brei thau urang hu ngak tabiak janih pin baar yaom lap pambak tame jalan suak yava di vi sinh vật dalam ia. Kapul roh duah brei thau, janih pin ni meda lauk veik saong nyu praong samu sa pok diêm. Meng pandap ngak mbuan duah yau baar, ia hu vi khuẩn song cực âm, cực dương lap jien, dom urang roh duah brei thau yaom jien ngak tabiak yaok pin baar labaih 5 cent Mỹ, samu labaih sa ribau đồng VN. Anak tal, dom urang roh duah cong khin janih pin ni meda pandar dalam rilo bruk, abih di nyu nan lac pabak năng lượng ka cảm biến sinh học di dom pandap chẩn đoán, tui iek ruak di dom negar dok patagok./.