Khaw tin 19h 4-2 saong 6h30 ngày 5-2

#/ beir harei 3/2, Phó akaok negar amuk  Nguyễn Thị Doan song kapul ngak bruk di Hội  Chữ thập đỏ Việt Nam hu nao rivang song brei 150 pok pandap ka sang kathaot song urang njauk jru klik kruac dok di huyện Vũ Thư, tỉnh Thái Bình.  Phó akaok negar pok meyaom karja huyện Vũ Thư hu sangka, iek glang khik caga chế độ an sinh xã hội tal dom urang, dom boh sang hu buh pren yava ka CM, cong khin huyện Vũ Thư song tỉnh Thái Bình ba gauk peih ngak siam jang bruk thau dar phol, eik glang ka urang kathaot, metui medar 

# Kapul daong urang ruak kan kathaot tỉnh Quảng Bình pambuak bruk haong dom sang iek ruak dalam tỉnh, dom urang ngak pahla peih var huak brei saoh ka dom urang ruak dalam tuk tut Tết thun anek sak kra 2016.  Bruk ngak lisei huak brei saoh ka dom urang ruak kan kathaot hu peih tabiak meng harei 3 tal harei 13/2 di 9 sang iek ruak công lập dalam tỉnh. 

# Harei 3/2, di var taom mbaok saong pok meyaom sinh viên urang bangsa takik kham merat yam tapa kan kandah, bac da-a naih joi thun 2015, urang dang akaok Ủy ban bhap bini  tỉnh Đắk Nông hu alin harak meyaom ka 4 sinh viên bac da-a naih gheih; Hội Liên hiệp dam dara tỉnh Đắk Nông alin bằng khen ka 26 sinh viên joi saong harak meyaom ka 145 sinh viên khá.  Ini lac dom urang naih gheih lambaok ka sinh viên bangsa takik di tỉnh Đắk Nông daok bac di dom sang bac đại học, cao đẳng dalam taneh ia. 

#/ Uan raok tết nguyên đán anek sak kara 2016, harei 3/2 ban sit Quảng Ngãi hu peih pakak bein bingu Ba Tơ ngan saong kadha “ Ban sit Quảng Ngãi hadah hadai sắc xuân”.  Bein bingu Ba Tơ hu ramik ngak biak siam tui jalan sahneng bahrau, pambuak siam meng ilamu meng kan song bahrau, brei mboh bruk sami samar song siam mekre di sa ban daok ranaih. Dom bingu trang trí rilo jang 2 mbang dut song thun dahlau, abih tih hu 33 ribau yot bingu song 50 janih bingu. 

# Piah ba chreih chrai bui sambai ka bhap bini raok Tết meng kan di bangsa, pahadar 86 thun harei padang Đảng Cộng sản Việt Nam saong salam uan bruk jak jeng di nyom roya pakat negar mbang XII di Đảng, tỉnh Ninh Thuận hu peih dom bruk ngak piah uan Đảng-uan Xuân, rok Tết Nguyên đán meng tỉnh tal puk palei. Melam 3/2, mBan Tổ chức dom harei lễ praong tỉnh Ninh Thuận hu peih mbaok Bein bingu Xuân Bính Thân 2016, pakacah phun cảnh saong parang iek phun cảnh di labik miuyim tỉnh.

# Harei 3/2, dom sruh radeih camereip dalam 46 sruh radeih di bruk “Tết nghĩa tình - Xuân kết nối” kayua Liên đoàn Lao động tỉnh Đồng Nai song Tổng Công ty Viễn thông MobiFone pambuak bruk peih ngak, hu ba 2000 urang ngak di 6 khu công nghiệp di Đồng Nai mai palei mbang tết. Ni lac bruk klah rabha di dom DN song XH brei ka urang ngak.

#/ Yaok ribau uranaih hu rai duik kan kandah hu mbaok tame dom bruk ngak di danak dak “Tổ ấm ngày xuân” kayua Thành Đoàn ban raya Hồ Chí Minh peih tabiak harei 3/2 di mblang bein Tao đàn ban raya Hồ Chí Minh. Lingiu danak dak “Tổ ấm ngày xuân”, dalam tuk tết Thành Đoàn ban raya Hồ Chí Minh dok hu peih danak dak “Xuân yêu thương” ka 2000 uranaih di dom pasak rong pato uranaih, danak dak “Búp mai vàng” ka 300 uranaih jaoh jo, dom bruk iek glang anek kamuan di  urang ngak gaok kan kandah, anek kamuan di urang lin Hải quân,  bộ đội ngak bruk di palao tasik, bhum tapen negar .

Khaw tin dunya

# Mesup kabroi, Tổng lãnh sự quán Việt Nam di tỉnh Battambang, negar Campuchia pambuak bruk haong dhar kapul urang Campuchia asal Việt Nam tỉnh Xiêm Riệp (Siem Reap) peih pakak sang bac brei ka anek kamuan urang Việt daok di huyện Chi Kreng, tỉnh Xiêm Riệp (Siem Reap) saong alin hadiah pandap Tết ka mikva Việt kiều labik ini. Taong abih mikva labik ini biak chreih chrai anak bruk ndung bak hatai anit ranam di Ủy ban Karja ka urang Việt Nam daok di negar lingiu. Ini lac kadha praong piah daong ka anek kamuan urang Việt daok pak nan hu bac da-a, khik ramik ilamu bangsa saong ba drei tame pak labik drei daok. 

#/ Gah y tế dunya hu panuac khan ka jit ruak Zika kayua jamuk pambak tapa dok rah tabiak khang di dom negar châu Mỹ, meda hu tal 4 triệu urang dalam thun ni. Yaom lac dom triệu chứng ruak oh mboh hagait trak, oh mboh hagait piah duh hatai tuk urang ruak mboh pandiak, pandik akaok, pandik rup song tagok mban min virus Zika hu mong lac makna ba tal di chứng trak ka anek kama, ngak ka akaok song glaow akaok sit veik./.

# Công ty Công nghệ sinh học Ấn Độ harei 3/2 khan lac brei patagok janih vắc-xin akaok meti di dunya pacang caga vi-rút Zi-ka (Zika), janih ruak ba tal rilo biến chứng kan kandah ka anek kamar di Bra-xin, dalam nan hu ruak ngak brei akaok sit saong suai patagok glo akaok. Công ty ini hu nộp bằng sáng chế piah hu quyền patagok 2 janih  vắc-xin Zi-ka meng 9 bilan dahlau. Urak ini, Cty daok duah bruk pachreih tui di rajaei Ấn Độ piah peih bruk ngak iek 2 janih vắc-xin ini angaok athur raong saong angaok rup menuaac./.