# Ủy ban Bhap bani tỉnh Sơn La bahrau peih nyaom biai pataom iek veik bruk peih danak dak ngak jalan nao tal pasak dom xã. Tal abih thun 2010, dalam tỉnh Sơn La hu 123/204 xã, phường, bal sit hu jalan nao tal pasak dom xã, lac labaih 60% dom xã. Tui kuhria dahlau, tal puac thun ini hu 164/204 xã, phường, bal sit hu jalan nao tal pasak, samu 80% taong abih xã, dut haong thun 2010 rilo jang 41 xã saong samu 107% dut haong bruk tỉnh ba tabiak.

# Di Khu Kinh tế Nghi Sơn, huyện Tĩnh Gia, tỉnh Thanh Hóa, Công ty cổ phần Gang Thép Nghi Sơn bahrau peih bruk padang ngak Pabah lamnge tổng hợp dunya Gang thép Nghi Sơn, tui yaom jien buh tame 5.850 tỷ đồng. Pabah lamnge tổng hợp Gang Thép Nghi Sơn daok dalam dom pabah lamnge tasik Nghi Sơn, lac pabah lamnge đầu mối khu vực (janih 1), hu padang ngak njauk haong dom tiêu chuẩn dunya ka khik iek, vận hành saong an toàn di Kapul tatua pabah lamnge tasik dunya, praong 71 ha, dalam nan hu mblang taneh bến cảng saong labik hậu cần kho bãi caik pandap panda.

# Meng thun bac ini, Sở Pato megru tỉnh Quảng Ngãi peih bruk pasang iek, taong yaom veik kapul nyaom gru pato. Sở njauk pasang iek, taong yaom dom gru pato dalam dom sang bac trung học phổ thông, giáo dục thường xuyên. 14 jabat Pato megru di dom huyện, bal sit jeng peih ngak, taong yaom gru pato meng pakat mầm non tal trung học cơ sở tui rabha pakat. Ong Đoàn Dụng, Akaok Sở Pato megru tỉnh Quảng Ngãi brei thau: Meda hu tiêu chí tuk pasang iek  piah taong yaom. Dalam tiêu chí pasang iek taong yaom kapul nyaom urang jakar khik iek gru pato hu iek tui chất lượng chuyên môn oh iek tui sang bac, iek trak tal bruk mek hu chuẩn atau oh hu chuẩn. 

# Hadei di tuk sruh jit cúm menuk ada chủng H5N1 hu duah mboh di  xã Lương Sơn, huyện Ninh Sơn, gah chức năng tỉnh Ninh Thuận samar tame bruk, peih ngak dom jalan pacang cakak jit cúm pambak prong. Tui Chi cục Thú y tỉnh Ninh Thuận, makna ba tal tapol ada di sang ong Đặng Hùng Khiêm ( palei Trà Giang 2, xã Lương Sơn) njauk jit cúm H5N1 di puac bilan 8 meng blaoh nan kayua tapol ada labaih 1.000 drei di sang ong oh hu klauk caga ginup vắc-xin.

# Jaik di ini, hu oh takik urang pablei salih lac urang Trung Quốc pandar visa du lịch mai Bình Thuận duah blei thanh long suan adat hukum, ngak kan kandah ka bruk khik iek. Anak bruk yau nan, Công an tỉnh Bình Thuận hu tacei pato dom  gah nghiệp vụ pambuak haong công an dom huyện patagok duah thau ka bruk nan, pasang iek, duah mboh saong ba tabiak jalan langyah catang dom urang Trung Quốc mai Bình Thuận Thuận ngak bruk oh njauk yau dalam thị thực. Gam haong bruk taong phạt, Công an tỉnh Bình Thuận daok ngak harak pakatut tukvak tạm trú ngan haong dom urang daok hu thị thực labaih 15 harei, pandar urang nan nao tabiak truh Việt Nam. 

# Trà Vinh meda paglaong chất lượng pato megru taong abih gah. Nan lac bruk ngak prong bo Sở Pato megru tỉnh Trà Vinh ba tabiak dalam thun bac 2015- 2016. Thun bac ini, Trà Vinh jak ba uranaih umo 6 thun tame tal 1 hu jaik abih, labaih 95% uranaih umo 5 thun tame mẫu giáo, labaih 98% anek saih hu bac tame pakat I tame bac pakat II saong labaih 98% anek saih tamat Trung học cơ sở tame bac tal 10.

# Hadei di sa thun ba tame ngak, Sang iek ruak urang kamei bal Cần Thơ hu pandar siam ralo jalan ngak bahrau dalam bruk iek ruak. Tui nan, sang iek ruak peih ngak hu jeng ralo ilamu kỹ thuật bahrau piah iek glang pren yava, iek ruak ka urang kamei saong urang ruak. Sang iek ruak hu blac raih nội soi ka jaik 600 urang u sơ tử cung, u nang buồng trứng, iek ruak nội khoa metian langiu tử cung, ruak gah tế bào raong. 

Khaw tin dunya:

# Thủ tướng Ôxtrâylia Tô-ni A-bót (Tony Abbott) brei thau meda taduan raok suai lavik 12 ribau urang tỵ nạn Xyri. Ini lac sa dalam dom mbang Ôxtrâylia taduan raok ralo urang tị nạn abih kuhria meng Mesruh metak Dunya mbang ka 2. Ong lac meda pataom tame daong 12 ribau urang Xyri ini, dalam nan, bruk duah labik daok bahrau ka urang tị nạn nan lac  bruk njauk ngak dahlau abih piah khik caga suai lavik ka urang kamei, uranaih saong dom baoh sang daok likau tị nạn tạm pak Gioócđani, Libăng saong Thổ Nhĩ Kỳ...Thủ tướng A-bót ndom lac bruk duah labik daok bahrau ini meda hu peih ngak samar abih. 

# Di jabat Raja-ei Lào daok di bal ine Viêng Chăn (Vientine), ong Sổm-sa-vạt Leng-xa-vắt, Ủy viên Bộ Chính trị, Phaok Thủ tướng Raja-ei Lào hu taduan raok Kapul urang lambaok pakat glaong bal ine Hà Nội kayua amuk Ngô Thị Thanh Hằng – phaok Bí thư thường trực Thành ủy Hà Nội ba akaok daok rivang saong ngak bruk pak Lào. Lambaok ka Đảng, Raja-ei, bhap bani dom bangsa Lào, ong Sổm-sa-vạt Leng-xa-vắt caong khin, ngan haong ilamu di drei, Hà Nội meda klah rabha haong Viêng Chăn ilamu khik iek grap tanat chính trị, trật tự an toàn xã hội, bruk quy hoạch bal ine, dalam tuk thun 2016 Lào dang Akaok ASEAN.  

# Cảnh sát Thái Lan brei thau dom kadha bahrau ka bruk taong mbom ngak metai ralo manuac pak kalan Ê-ra-oan (Erawan) di Băng-cốc harei 17-8 meng bloh,, tui nan brei thau sa nghi phạm chính khan lac nyu hu gaok urang ngak bruk nan di gah langiu sa ga tàu điện piah ba baoh balô hu mbom dahlau di tuk mbang patuh rah tabiak. Mbang patuh mbom di kalan Ê-ra-oan melam  17/8 di labik hu ralo tuai mai me-in di paak Băng-cốc ngak ka labaih 20 urang metai, dalam nan hu ralo tuai negar langiu./.