Khaw tin 19h harei 19/5 saong 6h30 harei 20/5

        # Pa-uan bruk pahadar 126 thun harei menek di Chủ tịch Hồ Chí Minh, page harei 19/5,  kapul urang pan akaok bal raya Hồ Chí Minh kayua Bí thư Thành ủy Đinh La Thăng ba akaok peih bruk pok bingu, cuh gilau pahadar Chủ tịch Hồ Chí Minh pak Mblang bein Rup patau Chủ tịch Hồ Chí Minh.

         # Tổng Giám đốc rayo paparsap ndom Việt Nam (VOV) Nguyễn Thế Kỷ saong kapul ngak bruk barau nao ravang saong alin pandap ka bhapbini xã Y Can, huyện Trấn Yên, tỉnh Yên Bái. Kapul hu alin 30 baok ra-đi-ô saong thiết bị thu sóng papar binguk ka mikva bangsa Dao labik ini. Tổng Giám đốc rayo paparsap VN Nguyễn Thế Kỷ ndom lac, dom pandap ini yau dom urang yut jaik taphia, daong ka mikva thau hu bruk ngak dalam taneh ia, dunya saong dom puk palei karei dalam taneh ia, rik daong paglaong raidiuk ilimo ka mikva.

       # Harei 19/5, pak Đại Nội - Huế hu peih parang iek "Huế dalam meta dom hoạ sĩ sambo màu aia dunya 2016". Parang iek hu 57 blah rup cih di 29 tác giả nan lac hoạ sĩ mai meng dom negar: Singapore, Malaysia, Indonesia, Thái Lan, Trung Quốc saong Việt Nam. Dom blah rup cih nan rilo meng brei mboh ka inem mek kiến trúc saong phong cảnh, langik tasik taneh riya Bal yao klak Huế.

       # yaom lac oh hu bac tapa sang bac ka alamu cơ khí min meng hatai takre roh duah alamu, ông Vũ Văn Dung, 54 tthun di xã Yên Mạc, huyện Yên Mô, tỉnh Ninh Bình hu ngak tabiak sruh mac li ua oh hu động cơ, pandar hu di rilo taneh saong nang suat li ua glaong, daong ka bruk hamu puh di mikva urang nong. Kein lagaih di mac li ua oh động cơ lac oh abih xăng menyek, tam drak tapak hàng.

      # Tal thun 2020, tỉnh Bình Định grap tanat tanut patagok jien buh tabiak brei ka khoa học saong công nghệ meng kadung jien karja tỉnh samu atau glaong jang tanut patagok jien buh tabiak bhian thun kadung jien di tỉnh saong mek hu bình quân labaih 2% taong abih jien buh tabiak thường xuyên kadung jien di tỉnh yaok thun. Taphia di nan, tỉnh daok jhul pakhang xã hội hóa, pachreih dom phun jien buh tame di negar langiu brei ka khoa học saong công nghệ. Nan lac panuac brei thau di urang pal akaok tỉnh Bình Định dalam Nyaom biai “Pataom iek veik bruk ngak khoa học saong công nghệ tỉnh Bình Định vakru 2011 - 2015, jalan ngak vaktu 2016-2020”, bahrau hu peih ngak di bal Quy Nhơn. 

       # Pagaiy harei 19/5, jaik 12 rabau cử tri di 49 labik buh phiếu di 11 xã saong 01 labik dalam tỉnh Quảng Nam peih bruk pilih ruah dahlau. 49 labik buh phiếu di 11 xã bhum atah bayah, tapeng negar, pulao kaoh saong sa labik bol bala di dom huyện Tây Giang, Nam Giang, Thăng Bình saong Hội An, tỉnh Quảng Nam hu peih bruk pilih ruah. Cử tri Trần Quốc Mạnh, urang lin Đồn biên phòng Cù Lao Chàm, xã pulao Tân Hiệp, ban sit Hội An, tỉnh Quảng Nam mbang akaok mereip nao pilih ruah ndom lac : Dahlal caong khin lac dom urang trúng cử meda ba abih pren yava, akaok sahneng saong tài năng di drei piah dak padang taneh ia saong abih di nyu nan lac sangka patagok tasik pulao.

      # Tỉnh Tiền Giang hu ralo jalan kraong, jalan radaih quan trọng pambuak pagam haong dom tỉnh, bal dalam bhum Taneran kraong Cửu Long yau: jalan roya 1, roya 60, roya 30 saong kênh Chợ Gạo... Piah grap tanat an toàn giao thông dahlau, dalam saong hadei di harei bầu cử Quốc hội, Hội đồng bhap bani dom pakat, dom gah chức năng di tỉnh hu jalan ngak pambuak gauk dalam bruk pasang iek, saong khik caga siam bruk nao mai angaok jalan, palagaih ka nao mai di cử tri. Ong Nguyễn Văn Bảy, Phaok Chánh Thanh tra Sở Giao thông vận tải tỉnh Tiền Giang lac: Pak tỉnh  hu sa kapul saong dom urang pal akaok meda nao pasang iek grauk labik dalam  tỉnh. Dom bến phà, bến thủy dahlau di nan jeng hu pasang iek, kakaei blaoh, palaghaih ka bhap bani nao mai dalam harei bầu cử ka nyu siam; hu brei ka dom phà dự phòng piah ba tuai damuai tapa kraong ngak nghĩa vụ công dân dalam harei bầu cử.

      Khaw tin dunya

     # Ngan saong 241 phiếu thuận saong 184 phiếu chống, Hạ viện Mỹ harei 18/5 brei tapa dự luật kadung jien karja lac 622 triệu đôla piah pacang cakak bruk njom mbak di jit ruak vi-rút Zi-ka. Yaom jien inu bair jang biak rilo duk saong caong khin di Tổng thống Ba-rắc Ô-ba-ma (Barack Obama) jeng ye tanut bo Thượng viện Mỹ kuhria brei tabiak.

      # Blah báo “The Star” Malaisia harei 18/5 brei thau, ralo urang ngak mbang pablei salih gah njam patam baoh karaoh saong pandap mbang menyum pak Malaysia pok sap iew Raja-ei negar ini blei tame rilo jang njam patam meng dom negar dalam bhum yau: Việt Nam, Indonesia, Thái Lan, piah pabak pandap daok kurang yau urak ini. Kayua El Nino, nan ye njam patam baoh karaoh pak Malaysia dalam tukvak tapa trun daok biak takik, ngak ka yaom kaom tagok glaong.

     # Dalam mbang ravang di Tổng thống Croatia Kolinda Grabar-Kitarovic (Cô-lin-đa Gra-ba Ki-ta-rô-vích) tal Iran, 2 taneh ia hu njauk hatai gauk peih praong talei pambuak bruk dua gah di rilo bruk, abih di nyu nan lac kinh tế, ilimo saong ravang mein; taphia nan, brei patagok talei pambuak bruk caga chủ nghĩa khủng bố saong chủ nghĩa cực đoan.