Khaw tin 19h harei 21-10 saong 6h30 harei 22-10

# Page harei 21/10, Nyaom roya Đảng bộ tỉnh Quảng Ngãi mbang ka XIX, vaktu 2015-2020 hu peih pakak. 350 urang lambaok ka labaih 46 ribau urang đảng di 20 đảng bộ hu mbaok tame Nyaom roya. Ngan haong kadha  “Gul pataom - Dân chủ- Kỷ cương- salih bahrau”, Nyaom roya Đảng bộ tỉnh Quảng Ngãi mbang ka XIX, vaktu 2015-2020 hu langyah, taong yaom dom mbuan lagaih, kan kandah saong mong iek dom kadha daok kandaong veik, cuang kandah dalam vaktu tapa; ba tabiak jalan ngak praong nan lac: "dak padang Đảng bộ khang kajap, hacih sa-at; patagok pren khang di taong abih bhap bani; kham merat jeng tỉnh ngak kong tui jalan bahrau".

# Urang ngak ikan tỉnh Phú Yên barau ba trun tasik 2 kapal ikan kanduh kayau hu ngak barau meng jien mesraiy tui Nghị định 67. Yaok kapal hu  pren khang 700 mã lực, yaom 13 tỷ đồng/sa kapal, dalam nan 70% jien mesraiy meng gilang pariak dau tu saong patagok dhar Phú Yên. Ông Nguyễn Tri Phương, Phó akaok Sở ngak nong saong patagok palei pala tỉnh Phú Yên brei thau : Di Phú Yên urak ini hu rilo urang tut angan min uy mban bhapbini bahrau phê duyệt 19 sruh. Urak ini bahrau mbaoh tangin brei 4 sruh kapal kayau, sa sruh kapal thép, daok veik dom sruh tra gilang pariak daok ngak bruk saong dom po kapal piah tut angan tame hợp đồng. 4 sruh kapal nan  vah ikan ngừ đại dương, daok kapal kanduh thép lac mành chụp).

# Page harei 21/10, Uỷ ban bhap bani tỉnh Khánh Hòa peih bruk pok brei saong duah brei veik angan “Amaik Việt Nam anh hùng” ka 203 amaik dalam  tỉnh Khánh Hòa. Dalam 203 amaik hu pok brei saong duah brei veik angan mbang ini, hu 12 amaik daok diuk. Tal urak ini, tỉnh Khánh Hòa hu 859 amaik hu pok brei saong duah brei veik angan “Amaik Việt Nam anh hùng”. Tỉnh Khánh Hòa jeng daok ngak harak likau Karja pok brei, duah brei veik ka 30 amaik karei angan “Amaik Việt Nam anh hùng”.

# Dom harei tapa, hajan ribuk rah tabiak di huyện Hàm Thuận Bắc, tỉnh Bình Thuận, ngak khat lahik trak ka bruk ngak nong, abih di nyu nan lac taneh thanh long karei bilan daong truic menyek. Tui kuhria oh ka ginup abih, di huyện Hàm Thuận Bắc hu jaik 1.000 héc-ta phun pala njauk ia dauk. Dalam nan rilo meng lac taneh padai saong thanh long. Rilo urang nong eng drei ngak ar glaong, pandar mac bơm tathaok ia tabiak piah daong phun thanh long. Min, nan lac bruk ngak di anak meta, kayua thanh long gaok ia dauk oh tapa 3 harei meda bruk gha meda, mbuan si metai. 

# "Kaya nong di urang nong mek hu chuẩn meda hu daong piah ba tame meyaih khan pak dom labik du lịch, nyaom darak". Nan lac panuac di urang dang akaok Sở Công thương Bal raya Hồ Chí Minh pak van ginum biai “Urang Việt Nam dahlau di abih njauk pandar pandap Việt Nam” dalam page harei 21/10. Van ginum biai kayua Kapul urang nong bal raya peih ngak. Amuk Lê Ngọc Đào, Phaok Akaok Sở Công thương Bal raya Hồ Chí Minh brei thau, urak ini, Sở Công thương gam haong haong Sở Du lịch bal raya daok padang dom baoh darak, dom pasak kaya nong mek hu chuẩn piah meyaih khan ka tuai damuai mai rivang ma-in. Amuk Lê Ngọc Đào lac: Urang nong njauk sangka, kasa nan lac mẫu mã bao bì ka nyu gheih saong mek meta, khik hu siam mekre pandap panda. Abih di nyu njauk caik hatai tal pandap Vietgap saong Globalgap piah ka urang blei pandar hu thau saong jia tame. Tuk drei duh ka tuai damuai nan jeng lac drei meyaih khan angan je kaya nong saong pandap panda di urang nong.).

# pagaiy harei 21/10 , di Cần Thơ, Giải vô địch taong mbanh takai tasik pakat negar cúp PV Gas D hu peih tabiak. Giải vô địch taong mbanh pakat negar rah tabiak tal puac harei 24/10, hu 29 đội tuyển saong  60 vận động viên mai meng dom tỉnh, ban, mban nganh dalam taneh ia mai pataom mbaok.

# Khoa Sử, Sang bac Đại học Khoa học xã hội saong Nhân văn (Hà Nội) bahrau peih nyaom biai “Ilamo dom bangsa Tày-Nùng: Meng kan saong salih bahrau”. Tui nan, dom kadha ka bruk khik ramik yaom ilamu meng kan di dom bangsa Tày-Nùng, ka dak rai sajarah dak padang taneh aia saong khik iek palei negar jang yau hatung hatai di bhap bani bangsa Tày-Nùng ngan haong Wa Hồ prong ranam... hu ba tabiak piah ginum biai.

Khaw tin dunya

# Tui gah Y tế dunya (WHO), yaok thun dunya hu labaih 200 triệu urang loãng xương, ba tal jhoh talang jaik 9 triệu menuac. Kuhria rah tapa dalam 3 giây lac hu sa urang jhoh talang kayua loãng xương. WHO hu panuac lac, tal thun 2050, urang likei jhoh talang meda tagok labaih 3 mbang, urang kumei lac dua mbang saong meda meblah tal 50% menuac sia dunya . 

 # Page harei 20/10, kapul radaih pajeng 389 urang dalam 96 baoh sang Hàn Quốc tabiak meng bal Xốc-chô pak gah đông bắc hu tapa biên giới dua taneh ia Triều  Tiên nao tal labik padeih padei ceik Cưm-cang tapen tasik gah đông nam Cộng hoà dân chủ Bhap bani Triều Tiên piah taom mbaok gauk gar hadei di labaih 60 thun atah di gauk. Dalam kapul hu labaih 20 urang umo 80 saong 90. 

# Harei 21/10, sa urang jakar di In-đô-nê-xi-a brei thau, bruk khuah glai di taneh ia ini daok pambak praong di abih kuhria meng dahlau mai tal ini. Dahlau nan, harei 20/10  dom labik khuah glai di In-đô-nê-xi-a daok tagok jang dua mbang, nan lac 3 rabau 226 labik duk saong 1 rabau 545 labik di harei 19/10. Ini lac labik khuah  praong abih kuhria meng dahlau mai tal ini.