Khaw tin 19h harei 22-10 saong 6h30 harei 23-10

# Page harei 22/10, Nyapm roya Đảng bộ tỉnh Bình Phước mbang 10, vaktu 2015-2020 hu peih pakak ngan haong 350 urang lambaok ka jaik 30 ribau urang đảng dalam 22 kapul nyaom đảng daok dalam Đảng bộ tỉnh.  Nyaom roya Đảng bộ tỉnh Bình Phước mbang ini pataom tame langyah, taong yaom piah ba tabiak kadha bac ilamu dalam bruk pal akaok puk palei ngan haong jalan ngak tal thun 2020, taong abih kadung jien karja mek hu 4 ribau 850 tỷ đồng, jien mek tame meng bruk pablei tabiak negar langiu hu 2 tỷ USD, kham merat jaik metah dom xã mek hu chuẩn palei pala bahrau. Brei panuac pak nyaom roya, Ủy viên Mentri Chính trị Phạm Quang Nghị lac: Njauk sangka tal quốc phòng, an ninh, khik kajap chính trị, tani tanat bhum tapen negar. Bình Phước njauk padang jalan pacang caga tapen negar khang kadang, khik kajap chủ quyền negar, pambuak haong bruk cakrok patagok kinh tế haong grap tanat quốc phòng, an ninh. Puk palei njauk patagok bruk đối ngoại, pakajap talei rohim gul pataom, hữu nghị haong dom tỉnh jaik taphia negar, rik daong ngak siam bruk ngoại giao bhap bnai haong negar ayut Campuchia. Tỉnh jeng hu dom jalan ngak langyah ka nyu abih dom bruk yak bak tapa pakat, dui atah, oh caik ka nyu jeng labik pandiak.)

# Mbang nyaom Quốc hội mbang ka 10 ini hu rilo cử tri Tiền Giang sangka. Kayua ini lac mbang nyaom puac thun 2015 ngan saong rilo asal kadha praong. Abih di nyu nan lac tapa dom pathau khan di rajaei ka bruk ngak hu dalam patagok kinh te – xa hoi 5 thun 2011-2015, jalan patagok kinh tế-xã hội 5 thun 2016-2020, cử tri tỉnh Tiền Giang biak njauk hatai saong brei thau yaom lac gaok rilo kan kandah tavak tavaiy, min kinh te – xa hoi di taneh ia drei hu patagok jang, radiuk bhapbini hu tani tanat. Ông Nguyễn Văn Đồng, cử tri huyện Gò Công Đông, tỉnh Tiền Giang ndom lac : Caong Quốc Hội ginum biai bruk caga tham nhũng. Nan lac bruk praong, lac bruk bo urang hu mbang tui. Dahlak maong di báo, rayo ba tagok bruk tham nhung ini biak rilo bo bruk xu ly oh ka trak, oh ka glaong.

 # Pak nyaom biai pataom iek veik thun bac 2014-2015 saong jalan ngak ka thun bac 2015-2016 khối đại học, cao đẳng page harei 22/10, Mentri Pato megru hu brei thau ka dom kadha bahrau dalam mbang pakacah Trung học phổ thông pakat negar saong palih ruah đại học, cao đẳng thun 2016. Tui nan, mbang pakacah thun 2016 tui kuhria hu peih ngak dalam 3 harei 13, 14, 15 bilan 6. Mentri pato megru meda patui veik peih ngak cụm thi tỉnh saong cụm thi liên tỉnh yau thun 2015 ngan haong dom kadha hu pasiam ramik veik ka nyu njauk; patagok bruk pambuak gauk, daong ba di dom sang bac đại học; thí sinh di dom labik giáp ranh di dom cụm thi hu brei palih ruah cụm thi ka hu laghaih; dom labik đặc thù hu ralo kan kandah meda mong iek piah ba caik dom labik pakacah laghaih ka thí sinh.

# Tui Ủy ban mặt trận negar Việt Nam tỉnh Kon Tum, kuhria tal akaok bilan 10/2015, kadung jien “ kayua urang kathaot” dom pakat di tỉnh jak ba hu labaih 8,4 tỉ đồng. Meng jien ini hu daong jaik 490 triệu đồng piah daong sang kathaot padang sang jum pataom saong ramik pasiam 6 baok sang; alin 120 paok jien bac ka anek saih kathaot kham merat bac da-a naih joi ngan saong yaom jien 60 triệu đồng; alin 17.265 paok pandap tuk lễ, tết saong yaom jien jaik 7 tỉ đồng.

# 5 thun tapa tỉnh Bình Thuận hu daong 3.833 baoh sang padang ngak sang daok, dalam nan hu 3.630 baoh sang kathaot saong 203 baoh sang jaik kathaot ngan haong phun jien abih jaik 103 tỉ đồng meng phun jien daong brei tui Quyết định 167 di Thủ tướng Raja-ei saong kayua dom kapul nyaom, doanh nghiệp saong manuac urang daong brei tapak. 

# Ngak tui harak 1735/QĐ-TTg di Thủ tướng rajaei brei bruk daong brah ka bhapnini pacang eik lipa tuk cang yuak, meng harei 19-21/10, tỉnh Ninh Thuận hu brei labaih 836 tấn brah meng gilang brah caik piah di negar brei ka 13.376 sang ngan saong 55.756 menuac. Kuhria rah tapa yaom menuac hu 15 kg brah yaok bilan. Dom sang taduan mek brah daong nan, lac kayua pandiak bhang dui atah, njauk padheih pala drak dalam tukvak tapa. Saong ini lac mbang ka 4 dalam thun 2015, tỉnh Ninh Thuận hu rajaei daong brah pacang eik lipa .

# Jaik meteh bilan ini, pak labik jaik taphia tasik tỉnh Trà Vinh langik hajan the ngak ka hadang metai ralo. Kuhria meng akaok bilan 10 tal ini, dalam tỉnh hu labaih 200ha hadang raong njauk khat lahik, ngan haong lượng pajaih jaik 150 triệu drei, paglaong mblang taneh raong hadang njauk metai lahik meng akaok vụ tal ini tagok jaik 5.500ha. Hadang raong metai ralo dalam tukvak meng 20-60 harei kayua nyu njaom ruak đốm mbong, hoại tử kanduh saong cơ quan ngak tabiak darah. 

Khaw tin dunya 

# Pagaiy harei 22/10, rajaei Campuchia peih pakak tatua Chroi Chang-va (Chroy Changvar) barau piah parun bruk gar jalan di labik pabah mbang gah Brak ban ine Phnôm Pênh. Mbaik tatua barau atah labaih 700m, hu rajaei Campuchia ngak meng jien masreiy jien di taneh ia langiu saong jien đối ứng di Campuchia, abih tih labaih 39 triệu đôla Mỹ. Tatua Chroi Chang-va  peih tabiak hu makna praong ka gah kinh te – xa hoi, brei mboh bruk kham merat di rajaei dalam padang ngak jalan mbak nao mai.

# Raja-ei Nhật Bản bahrau pok tagok Uỷ ban Giải trừ quân bị saong An ninh dunya di Liên hợp quốc dự thảo nghị quyết ka bruk patrun vũ khí hạt nhân. Dự thảo nghị quyết pachreih dom urang pal akaok dom taneh ia saong rai rah dam dara mai rivang saong caik hataiui pang dom nạn nhân di vũ khí hạt nhân piah paglaong akaok saneng ka tác hại di vũ khí hạt nhân. Hu thau, ini lac thun ka 22 gam gam, Nhật Bản hu đề xuất Nghị quyết ini.

# Dom urang ngak praong di Pakistan brei thau, Thủ tướng Pakistan Na-oa Sa-ríp (Nawaz Sharif) meda ndom saong Tổng thống Mỹ Ba-rắc Ô-ba-ma (Barack Obama) dalam mbang taom gaok di Nhà Trắng lac, Pakistan oh njauk hatai bruk brei takik pandar Vũ khí hạt nhân chiến thuật ( TNW) sit. Pakistan ndom lac, phao ndao sit jang meda daong pacang dom mbang taong tame bất ngờ di taneh ia jaik taphia lac Ấn Độ, jeng lac sa taneh ia khang gah hạt nhân.