Khaw tin 19h harei 22/3 saong 6h30 harei 23/3/2016

# Paih samar klah rabha kan kandah saong karja, bhapbini dom tỉnh, ban bhum Tay Nguyen, Nam Trung bộ saong bhum taneran kraong Cửu Long daok ndua nong khat lihik trak kayua tua riya saong njaom mbak, ban ine HN brei kaoh tabiak meng kadung jien daong khat lihik 19 tỷ đồng  piah daong bhapbini 19 tỉnh, ban; yaok tỉnh, ban 1 tỷ đồng. Taong abih yaom jien nan hu uy mban Mặt trận negar ban ine Hà Nội payua tal kadung jien daong khat lihik di 19 tỉnh, ban piah daong mikva pasiam dom khut khat, tani tanat raidiuk, pala drak.

/ Dalam sa bilan tapa, hu yaok pluh bhap bini daok di xã Mô Rai, huyện Sa Thầy, tỉnh Kon Tum njauk ruak jalan tung pruoc (aih caraoh) bo makna nan lac kayua pandiak bhang, bhap bini brei pandar ia kraong craoh oh hacih. Makna nan lac kayua mbang menyum oh saat, ia pandar kurang, bhap bini njauk pandar ia kraong, craoh ralo nan ye ngak kan kandah tal jalan tung pruac. YAOM lac bruk ini rah tabiak dalam jaik sa bilan bloh, karja huyện Sa Thầy hu mai duah thau, pasang iek min oh ka hu jalan ngak triệt để piah khik caga pren yava di bhap bini. 

# Danakdak pahadar 130 thun harei dunya urang ngak (1/5/1886 - 1/5/2016) saong bilan urang ngak thun 2016 hu peih ngak meng rilo bruk hu makna, siam lagaih. Dom bruk ngak pahadar piah brei mboh veik bruk rik daong praong di giai cấp công nhân dalam dak padang saong khik caga negar; paglaong akaok sahaneng, hatai tự hào di urang jakar, urang đoàn, urang ngak, viên chức lao động ka bruk cách mạng di Đảng, di bangsa. Taphia nan, pataom, ieu pataom, pok meyaom dom cong nhan urang ngak sáng tạo saong nao dahlau dialam bruk ngak chính trị saong patagok kinh te – xa hoi di taneh ia.

/ Hadei di labaih dua thun hu mbaok tame Kapul pambuak bruk raong limo ia tasau, ralo baoh sang bhap bini bangsa takik daok di xã Ka Đô, huyện Đơn Dương, tỉnh Lâm Đồng hu jalan salih barau saong paglaong rai diuk. Kapul pambuak bruk raong limo ia tasau xã KA Đô hu padang tagok meng puac thun 2013, ngan saong 20 baoh sang, dalam nan hu 12 baoh sang urang bangsa takik hu mbaok tame saong tal urak ini patagok hu 56 drei limo ia tasau. Hu mbaok tame bruk ngak ini, yaok urang dalam kapul hu mesraiy meng kadung jien daong ka urang nông ngan saong yaom jien 30 triệu đồng sa baoh sang. Hadei di dua thun, tal urak ini, kapul pambuak bruk raong limo ia tasau xã KA Đô daok ba mai kein laba.

# Pandika bhang dui atah ngak ka ia di dom công trình thủy lợi di tỉnh Bình Định daok trun khang. Tal urak ini, ia di dom danao padang ia praong kayua Công ty Khai thác công trình thủy lợi Bình Định khik iek daok labaih 280 triệu m³, hu labaih 60% dung tích; dom danao padang kayua puk palei khik iek daok oh ka tal meteh dung tích. Bruk njauk duh hatai lac ia di dom danao padang ia daok trun meng 3 tal 6 triệu m³/sa adit, tui kuhria mboh dahlau, jaik 15 danao padang meda thu ia tuk tame akaok bilan pala drak hè thu. Ông Phan Trọng Hổ, Giám đốc Sở ngak nong saong patagok palei pala tỉnh Bình Định brei thau : “Urak ini tua riya mbuan rah tabiak trak dalam tỉnh Bình Định, abih di nyu nanlac  bilan hè thu. Dalam tacei pato pala drak, kol dahlak hu dom jalan caga tua saong jalan meda hu hajan tiểu mãn. Taphia nan, kol dahlak hu dom jalan ngak piah ba ia ka bhapbini.

/ meng akaok thun tal ini, di tỉnh hậu Giang gam gam rah tabiak dom mbang glut jaleih takai kraong. Meyah dahlau daih, bruk glut jaleih rah tabiak ralo di bilan hajan, ia sua ye urak ini nyu rah tabiak di kreih bilan pandiak bhang. Dom harei bahrau ini, sa mbang glut jaleih rah tabiak di palei Đông Sơn, xã Đông Phước, huyện Châu Thành ngak ka jaik 100 met vuông taneh jaleih trun kraong. Labik taneh jaleih gam tame jalan nao mai ngak ka bruk nao mai gaok ralo kan kandah. 

# Urak ini, Công ty trách nhiệm hữu hạn sa thành viên ba ia Tiền Giang pandar  ia di kraong Tiền piah pabak ka labaih 40.000 sang bhapbini di ban sit Mỹ Tho. Bruk njauk ndom nan lac jaik ini, ia mbak nyu tuh mai thượng nguồn di kraong Tiền yau nan ye dom sang mac ia di doanh nghiệp ini njauk pandar ia njaom mbak hu xử lý bloh piah pabak ka urang blei. Di tukvak ini ia kayua Công ty trách nhiệm hữu hạn sa thành viên ba ia Tiền Giang ba ia ka ban sit Mỹ Tho hu độ mbak meng jaik 500mg/sa lít, glaong jang tanut di mintri Y tế labaih 200mg/sa lít.  Ini lac mbang akaok mereip bhapbini ban sit Mỹ Tho njauk pandar ia njaom mbak. Urak ini, doanh nghiep ini daok patagok bruk quan trắc, duk độ mbak piah mek ia taba duh ka bruk ngak mbang ngak huak di bhapbini. 

Patui di ini dom khau tin dunya:

/ Sa ruah duah di liên đoàn công nghiệp Anh brei thau barau ini taong yaom lac: bruk Anh tabiak truh liên minh châu Âu, daok ieu lac Brexit, meda ngak khat lahik ka taneh ia ini 145 tỉ USD saong ngak lahik jaik 1 triệu bruk ngak. Brexit meda ba tal kan kandah trak ka nền kinh tế Anh, ngak kan kandah khang tal bruk diuk rai, bruk ngak saong patagok kinh tế taneh ia ini. Urak ini urang Anh jeng daok neh rabha ka Brexit.

# “dom bruk cấm vận di Cuba meda tamat abih” nan lac panuac di  Tổng thống Mỹ Barack Obama hadei di mbang ginum biai saong Chủ tịch Cuba Raul Castro di ban ine Havana harei 22/3 dalam mbang ravang akaok mereip di sa Tổng thống Mỹ tal taneh ia pulao daok jaik taphia hadei di jaik 90 thun. Brei panuac saong báo giới hadei di mbang taom gaok dui atah jaik sa tukvak, dua urang dang akaok khan lac, dua gah daok hu rilo kadha oh ka njauk gauk, abih di nyu nan lac dalam dom bruk salih barau kinh te saong nhan quyền, min mboh lac njauk yah klak dom bruk trừng phạt bo Mỹ ba tabiak ka Cuba dalam labaih 5 pluh thun tapa.

/ Hy Lạp hu panuac ieu dom gah pambuak bruk liên minh châu Âu daong bruk hậu cần piah peih ngak thỏa thuận saong Thổ Nhĩ Kỳ pacang cakak menuac di cư saong tị nạn daok ba gauk tuh mai châu Âu./.