# Meng akoak bilan 2 tal ini, dalam tỉnh Quảng Trị jit laka cambuai tapok kakau hu mboh di 4 xã, bal sit di 3 huyện Gio Linh, Cam Lộ saong Triệu Phong ngan haong 59 drei kubao, limo njauk jit ruak. Ong Hà Sĩ Đồng, Phaok Akaok Uỷ ban Bhap bani tỉnh Quảng Trị brei thau: “Anak bruk jit ruak rah tabiak, Ủy ban tỉnh hu daong brei phun jien, tacei pato gah thú y di tỉnh saong dom puk palei pacang cakak dom labik rah tabiak jit ruak, samar ba vắc xin mai kluak caga ka dom janih athur raong dalam tỉnh. Tal urak ini meda lac pacang caga hu jit oh caik ka nyu njom mbak”.

# Langik tasik oh lagaih tukvak tapa ngak ka rầy nâu, rầy ka-ing patih tamuh tabiak palai kaik padai đông xuân di tỉnh Bình Định. Urak ini, 350 ha padai đông xuân di tỉnh Bình Định njauk njom rầy meng 3.000 tal 5.000 drei sa m2, pataom tame di dom huyện Phù Cát, Tây Sơn, An Nhơn, Tuy Phước. Taphia di nan, dom ruak đạo ôn cổ bông, halak blik hala sit jeng tamuh tabiak palai kaik padai. Piah pacang cakak halak halin, tỉnh Bình Định hu daong blei jru pruh ka jaik 100 ha padai hu ralo rầy. Chi cục khik caga phun pala tỉnh Bình Định brei urang jakar kỹ thuật bhian tui iek mblang hamu, tacei pato urang nông peih ngak dom jalan pacang cakak halak halin.

# Thun 2015, tỉnh Đồng Tháp hu ba bruk ngak ka labaih 32.500 urang ngak; ba 580 urang nao ngak bruk hu tukvak pak negar langiu saong peih pato bruk ngak ka labaih 20.000 urang di dom pakat cao đẳng, trung cấp, sơ cấp saong pato bruk ngak ala 3 bilan. Tapa nan, bruk patrun kathaot hu peih ngak siam, baoh sang kathaot trun daok 4%. Tui kuhria, thun 2016, Đồng Tháp meda langyah bruk ngak ka 30.000 urang ngak, ba 846 urang nao ngak bruk hu tukvak pak negar langiu, patrun urang oh hu bruk ngak di bal prong bal sit daok ala 3%.

# Thun ini pandiak bhang khang jang yaok thun min kayua peih ngak siam dom jalan pandar ia pruh, patak pataom, kein lagaih nan ye di huyện Đắc Hà, bhum ngak nông praong di tỉnh Kon Tum tal tukvak ini 28 công trình binek thủy lợi praong jeng pabak ginup ia pruh ka phun pala.

# Peih ngak Danak dak 135 ri Raja-ei, vaktu ka 3 (2011-2015), tỉnh Sóc Trăng hu buh tabiak labaih 363 tỷ đồng piah padang hạ tầng cơ sở, patagok bruk ngak mbang pala drak, ngak ka mbaok meta palei pala bhum urang bangsa takik dak harei dak salih bahrau, rai diuk di taong abih bhap bani Khmer dalam tỉnh oh padeih patagol. Ong Lý Bình Cang, Akaok Ban Bangsa tỉnh Sóc Trăng brei thau, danak dak 135 daok brei mboh lac sa jalan ngak njauk di Đảng saong Karja, saong jeng lac dandak  patrun kathaot praong, daong biak siam ka bruk cakrok patagok kinh tế - xã hội bhum biak kan kandah, bhum atah bayah, bhum hu ralo bhap bani bangsa takik daok.

# Barau ini, kayua ngin yuk khang ngak ka bruk jaleih taneh tapen tasik Gò Công di tỉnh Tiền Giang daok rah tabiak. Catang di abih nan lac labaih 40 baoh sang bhap bini daok di tapen tasik palei Tân Phú saong Cầu Muống, xã Tân Thành, huyện Gò Công Đông daok njauk ia tasik mbang tame, glut jaleih tal sang daok. Dom baoh sang njauk lahik abih taneh oh hu labik daok saong mbuan ba tal metai lihik dalam bilan ngin ini.

# Tukvak jaik di ini, bruk nyaom darak, pablei salih tapen jalan saong ala takai dom baoh tatua, pataok radaih angaok jalan pak Bal raya Hồ Chí Minh mboh dak harei dak ralo. Yaom lac gah chức năng hu panuac kakei min bruk nan jeng daok rah tabiak. Mbang bala ngak ka ralo urang njauk rambuis pak takai tatua Trường Đai, quận Gò Vấp bahrau ini nan lac bruk njauk caik hatai piah tapa nan ramik ngak kasiam.

Patui di ini dom khau tin dunya:

# Sa mbang megei baoh taneh khang 4,9 độ rích-te barau rah tabiak di gah tây bắc ban Ba-cơ-phiu, dalam bang Ca-li-phóc-ni-a, Mỹ. Tui jabat pasang iek địa chất Mỹ, pasak di mbang megei baoh atneh biak kaoh, 320 m ala mbaok taneh. Mbang megei baoh taneh ngak tatuan megei bhum tây nam ban sit Vát-cô,  dalam ban Ba-cơ-phiu. Urak ini oh ka thau metai lihik, khut khat drap ar yau habar hadei di mbang megei baoh taneh ini.

 # Harei 23/2, urang ngak praong pakat glaong dalam Liên minh châu Âu (EU) iek gah sarak an ninh saong Đối ngoại Phê-đê-ri-ca Mô-ghê-ri-ni hu panuac khan lac mbuan tamuh tabiak sa “cuộc chiến căng thẳng” di Nga saong Thổ Nhĩ Kỳ pak bhum taneh Trung Đông. Brei panuac anak Ủy ban dom kadha đối ngoại pak  Nghị viện châu Âu, amuk Mô-ghê-ri-ni ndom lac châu Âu njauk hu jalan ngak piah pacang cakak bruk căng thẳng ini.

# Sa urang kamei y tá di Xlốtlen, urang hu thit ruak hadei di tuk njom virut Ebola, njauk tame ndih iek ruak veik mbang ka 3 kayua janih virut nguy hiểm ini nyu mbang tame glo akaok. Jit Ebola nyu tamuh tabiak dalam jaik 2 thun tapa, ralo meng mboh di 3 taneh ia Tây Phi  nan lacXiêra Lêôn, Libêria saong Ghinê, ngak ka labaih 11 ribau 300 urang metai./.