# Gilai Quang Đỉnh-36 di Công ty Thành An-96 tuk nao tapa labik huyện pulao Trường Sa ye gaok bala kayua riyak prong. Taduan hu panuac khan, Bộ Tư lệnh Hải quân samar ba gilai 956, Lữ đoàn 125 Hải quân daok ngak bruk di labik huyện pulao Trường Sa samar tabiak duah gilai Quang Đỉnh-36. Labaih 4 tuk nao duah, gilai 956 taom gaok hu gilai Quang Đỉnh-36 pak Tây Bắc pulao Đá Lát. Urang jakar, thuyền viên 2 gilai pataom tame pacang cakak aia nduac tame gikai. Hadei di nan, gilai Quang Đỉnh-36 hu gilai 956 ba tame jaik pulao Đá Lát piah pasiam veik.  

# Sang ong Giàng Seo Sì, daok di palei Nàn Cảng, xã Si Ma Cai, tỉnh Lào Cai  lac baoh sang akaok meti daok di bhum glaong Si Ma Cao pala phun tam thất ralo. Hadei di tuk duah thau saong mboh hu kein laba meng phun pala ini, puac thun 2013, ong Sì hu mesraiy phun jien di gilang pariak gam saong phun jien pataok pataom hu  buh tame pala 0,9 ha phun tam thất di xã Sán Chải. Hadei di labaih 1 thun pala, bein tam thất di ong paik hu 3 vụ bingu. Lac pandap hu takre di drak, bingu tam thất that pablei hu yaom glaong meng 250 tal 300 ribau đồng sa kg. Meng jaik 4 tạ bingu, yaok thun,  sang ong mek tame hu jaik 100 triệu đồng.

# Uỷ ban Bhap bani bal Đà Nẵng bahrau peih bruk pok brei angan Amaik Việt Nam anh hùng ka 183 amaik. Dalam mbang ini, 1 amaik Việt Nam anh hùng daok diuk hu pok brei angan saong 182 Amaik Việt Nam anh hùng hu truy tặng angan. Ong Thái Đình Hoàng, Phaok Akaok Sở Lao động, Thương binh saong Xã hội bal Đà Nẵng brei thau: “Ngan haong bal Đà Nẵng biak sangka iek glang tal baoh sang sarak karja saong Amaik Việt Nam anh hùng. Amaik Việt Nam hu pok brei angan hu dom jabat, đơn vị, doanh nghiệp daong raong yaok bilan  meng 1 triệu đồng tagok. Langiu di nan, bal Đà Nẵng hu ngak ginup abih dom sarak tui adat hukum di Karja”.

# Khánh Hòa caik labaih 61 tỷ đồng piah daong pato bruk ngak ka jaik 6000 urang yaok thun, tapa nan , urang ngak palei pala hu bac bruk ngak di tỉnh meng 47% urak ini tagok tal 60% di thun 2020. Kadha barau dalam pato bruk ngak ka urang ngak palei pala di tỉnh Khánh Hòa tukvak 2016 – 2020 nan lac pataom tame pato bruk ngak tui jalan dalam jang, daong ka urang ngak palei pala thau cambaih ilamu kỹ thuật barau piah ba tame ngak mbang, pataok yaom kaom.

# Baharu ini, aia ndik gam haong riyak prong ngak glut jaleih takai tasik, taong jaleih abih 70 baoh sang di dom labik daok tapen tasik Bình Thuận. Menuac urang di yaok rituh baoh sang daok di labik glut jaleih daok gaok kan kandah.  Anak bruk ini, tỉnh Bình Thuận haong dom urang ngak khoa học saong Cục Pacang caga bala meng langik tasik Trung ương daok duah jalan ngak piah pasiam veik, grap tanat rai diuk ka bhap bani.

# Dom tỉnh Tây Nguyên daok tame tukvak tabung glaong di bilan thu saong pandiak bhang daok rah tabiak di ralo labik. Tui rayo khí tượng thủy văn bhum Tây Nguyên, bilan thu 2016, Tây Nguyên meda gaok pandiak bhang khang di abih kuhria dalam 60 thun tapa. Ong Trần trung Thành, phaok Giám đốc rayo khí tượng thủy văn bhum Tây Nguyên brei thau: “Ia pataom hu di thun 2015 nyu kurang, bo bialn bhang daok dui atah. Kayua yau nan ye, tui kuhria mboh di kol dahlak, bilan bhang thun 2016 biak khang di abih kuhria meng kan mai. Bruk njauk biai nan lac, bilan 3 saong bilan 4, tuk nan lac ia di thủy lợi pruh ka phun công nghiệp, cà phê saong ia pandar meda kurang khang. Kayua yau nan ye, brei hu jalan patak pataom ia”.   

# Meng bilan 3, Sở Y tế Bal raya Hồ Chí Minh meda peih bruk kluak vắc xin sởi – rubella oh mek jien ka dom urang meng 16 tal 17 thun. Dalam mbang kluak jru vắc xin sởi – rubella ini, tui kuhria Bal raya Hồ Chí Minh meda kluak jru ka jaik 124 ribau urang meng 16 tal 17 thun. Tukvak peih ngak bruk ini meng bilan 3/2016 di 24 quận, huyện dalam bal, pak dom sang bac saong balai y tế. Taong abih urang mbang tui bruk ini hu kluak sa mũi vắc-xin sởi-rubella oh kuhria lac dahlau nan hu kluak mũi vắc xin sởi đơn atau đa giá halei oh. Sở Y tế bal raya Hồ Chí Minh hu panuac kakei lac, oh kluak vắc xin sởi – rubella ka urang kamei  metian.

Patui di ini dom khau tin dunya:

# Tui kuhria dom taneh ia ngak menyek di dunya hu mbaok tame sa mbang nyaom pakat dunya peih tabiak dalam bilan 3 tal, piah duah tabiak jalan tani tanat yaom menyek. Tui panuac khan di akaok meitri menyek Vê-nê-xu-ê-la, Đen Pi-nô,  bruk cakak trun sản lượng menyek khai thác di dom taneh ia nan lac asal kadha praong dalam mbang nyaom jaik tal. Min, tukvak saong labik di mbang nyaom jeng daok hu dom taneh ia ginup gauk.

# Yau dom Lễ hội mùa Xuân daok hu peih ngak dalam negar, sa Lễ hội Xuân Việt biak karei hu peih tabiak di sang bac Đại học Pa-ris Xoc-bon kayua dom sinh viên, học viên dua khoa Việt Học di Sang bac Đi-đơ-rô saong Học viện Quốc gia ngôn ngữ saong văn minh phương Đông padang ngak. Danak dak uan raok Tết di dom sinh viên, học viên dua khoa Việt học hu padang ngak biak gheih, biak mekre  ngan haong dom kadha ragu daoh bhap bani klau bhum taneh; me-in alat ragam meng kan; ... Dom sinh viên dalam ao atah meng kan di Việt Nam parang me-in abih drei yaom lac hu ralo adei bahrau bac sap Việt, ndom puac oh ka cambaih.

# Urang kamei metian di Anh hu daong takik di abih 3 ribau bảng Anh yaok bilan piah iek glang pren yava tui hatai caong. Tui nan, urang kamei metian di Anh meda pandar yaom jien nan piah pandar dom dịch vụ thai sản, meng kamei hộ sinh mbiah tal bruk ndih tapui di sang. Bruk nan lac sa binah di danak dak iek glang metian hu ba tabiak kayua dịch vụ y tế Anh piah pabak ralo bruk palih ruah ndih tapui di urang akmei./.