# Harei 29/6 Thủ tướng Nguyễn Tấn Dũng dang tabiak peih nyaom biai bhian mbang bilan 6 ngan haong urang dang akaok 63 tỉnh, bal dalam trung ương piah yasa dom jalan tacei pato pacang caga dom kadha daok tamuh tagok urak ini. Nan lac patagok gah ngak nong saong kaya ikan biar jang dut haong tukvak ini thun dahlau, abih di nyu nan lac dalam bruk ngak pandap panda kaya mbang saong raong pala kaya ikan dalam aia. Bruk langik tasik kan kandah yau tua riya pandiak bhang, njaom mbak pambak oh takik tal bruk ngak mbang pala drak saong rai diuk di bhap bani.

# Kapul ngak bruk di Mban KT TƯ kayua ong Vương Đình Huệ, Ủy viên Trung ương Đảng, Akaok Ban Kinh tế Trung ương pan akaok hu nao rivang Israel dalam 5 harei. Tui kuhria, kapul hu var taom gaok  Tổng thống Israel Si-mon Pê-rét (Simon Peres); ngak bruk song akaok mintri KT song akaok mintri ngak nong Israel. Kapul meda nao rivang, ngak bruk song Đại sứ quán Việt Nam di Ten A-víp (Tel Aviv).

# Tỉnh Đoàn Đắc Lắc saong kapul Sinh viên tỉnh bahrau tabiak  mbaok Chiến dịch Dam dara halar hatian Bilan hè hijao saong danak daong pren pakacah thun 2015. Chiến dịch Dam dara halar hatian hè thun ini hu peih ngak di taong abih 15 huyện, bal sit, bal prong, hu jaik 10 ribau đoàn viên, hội viên dam dara hu mbaok tame.

# 964 sinh viên saong urang ngak hu dom DN palih ruah dalam “Harei pataom bruk ngak SV song urang ngak thun 2015” bahrau rah tabiak di Nẵng kayua Sở Lao động - Thương binh song Xã hội pambuak bruk song Đại học Kinh tế Đà Nẵng peih ngak. Tui tong yaom di mban peih bruk, ni lac harei  pataom bruk ngak hu urang ngak hu palih ruah rilo di abih meng dahlau mai.

   # Piah pabak hatai caong khin nao mai di labaih 10.000 thí sinh di tỉnh Phú Yên hu mbaok tame pakacah mbang pakacah phổ thông trung học pakat negar pak Cụm thi tỉnh Khánh Hòa, dom doanh nghiệp pajeng ba tuai dalam tỉnh Phú Yên hu patagok jang dom đoàn tàu saong toa radaih gam haong yaok pluh mbang radaih tuai meng Phú Yên nao Khánh Hòa. Gah Pajeng ba tỉnh Phú Yên hu patagok pasang iek bruk pajeng ba piah khik caga siam mekre ka anek saih nao mai dalam tukvak rah tabiak mbang pakacah.

# Mesup harei 29/6 urang dang akaok ban raya HCM, lambaok vakil ka rilo Sở, ban, ngành rilo nghệ sĩ, anek saih song bhap bini,  gauk gar Giáo sư Trần Văn Khê hu ba ong nao labik kubo. Bruk nan hu rah tabiak dalam prong prang tui adat hukum phật giáo. Hu thau tong abih jien phúng điếu, sang giáo sư  Trần Văn Khê piah padang jien bac angan ong piah dong ka dam dara urang ranaih umo dok tui megru gah lagu bangsa VN. Diễn giả văn hóa Hồ Nhật Quang, anek saih di Giáo sư Trần Văn Khê lac: “Hu oh thau dom caong khin daok kuhria ngak piah klah rabha haong bhap bini bo urak ni gru  oh dok tra, hulin oh thau ngak yau habar. Tuk gru dok ndih ruak, huli hu sinya song gru lac kham merat tui bruk, gru jhui suh sah. Tuk nan gru ye tangin tagok  yau sa panuac drut droi, yau panuac njauk hatai, yau nan bo  urak ni gru nao atah ye”.

# Gah chức năng saong Chi cục Kiểm lâm tỉnh Quảng Nam hu pacang cakak saong padam hu mbang khuah pak palei 3, xã Phú Thọ, huyện Quế Sơn. Dahlau di nan, bhap bani puk palei samar  mboh dalah apui mbang pak labik mbuan ceik xã Phú Thọ min kayua langik pandiak bhang, labik khuah daok atah halau aia nan ye bruk padam apui gaok biak ralo kan kandah. Mbang khuah nan nyu khuah abih labaih 20 héc ta glai keo hala tràm meng 3 tal 4 thun di bhap bani dalam palei.

# Ấn Độ song  Thái Lan hu mbaoh tangin tame harak pacang kak je 2 mbang dalam mbang nao rivang Bangkok 3 harei di ngoại trưởng Sushma Swaraj (Xus-ma Xoa-rai) meng harei 27/6. Dalam mbang nao rivang, amuk Swaraj song ngoại trưởng Ấn độ Tanasak Patimapragorn (Tha-na-sặc Pa-tị-ma-pra-con) hu pan akaok mbang ginum biai Ủy ban hỗn hợp Ấn Độ-Thái Lan, dalam nan dua gah hu mbaoh tangin tame harak pacang kak je 2 mbang song ginum biai dom văn bản brei adat dẫn độ hu mbaoh tangin di thun  2013. 

# Pasak Khí tượng Trung Quốc daok hu panuac brei thau ka hajan prong saong pandiak bhang dalam dom harei tal pak dom labik karei di gauk pak negar ini. Nan lac dom tỉnh gah kreh negar yau Hà Nam, Hồ Bắc, An Huy, Giang Tô, Chiết Giang saong bal Thượng Hải. Dom labik ini meda hu hajan prong dalam dom harei anak tal. Dalam tuk nan, tua riya pandiak bhang hu mboh di dom labik pak Tứ Xuyên, Hồ Nam, Giang Tây, Phúc Kiến… Tui kuhria, nhiệt độ pak dom labik nan meda tagok tal 37 độ C, saong hu panuac kakei bhap bani daok pak dom labik nan njauk hu dom jalan pacang caga mebuk pandiak, jang yau bruk mbuan glut jaleih taneh pak dom labik hu hajan prong.

# Cảnh sát Brazil hu khan lac chap mek hu jiak 15 tấn kaja dalam sa mbang pagui mek khol tội phạm ma túy jiak ni di rilo bang. 12 urang dalam nan hu 2 urang ranaih umo njauk chap tuk dok pajeng jru phiel. Di Sao paulo, cảnh sát chap mek hu 4 tấn kaja. Meng thun 2006 mbiah tal ni, urang njauk chap mek kayua pagam tal dom bruk ngak suan adat hukum di Brazin nyu patagok,  meng 31000 tagok tal 138.000 urang./.