# Caga uan raok tuai damuai vaktu Tết Dương lịch 2016, dom labik rivang ma-in pak tỉnh Khánh Hòa peih ngak ralo danak dak piah duh ka tuai damuai. Urak ini, yaom pah duk ndih di dom khách sạn meng 3 patuk tagok mboh hu grap tant, daok yaom dịch vụ di dom khách sạn ala 3 patuk tagok jaik meteh dut haong harei karei. Dom doanh nghiệp lữ hành pandar tuai damuai njauk đặt duk ndih dahlau piah plaih bruk kateik yaom, tagok yaom. Thun 2016, gah du lịch tỉnh Khánh Hòa kham merat raok 4,5 triệu mbang tuai mai daok, taong abih jien mek tame  jaik 7.700 tỷ đồng.

# UB bhap bini tỉnh Ninh Thuận hu mbaoh tangin brei adat ka 4 doanh nghiệp hu mbaok tame pablei dom janih pandap tani tanat yaom kaom puac thun 2015 saong tết nguyên đán anek sak kara 2016 nan lac: Công ty dịch vụ Sài Gòn – Phan Rang, Công ty Cổ phần Lương thực Nam Trung Bộ, Công ty dịch vụ Trúc Nguyên saong Công ty dược phẩm Thy Thy. Tỉnh daong meng kadung jien karja ka dom doanh nghiệp mesraiy 18 tỷ đồng piah peih bruk tani tanat yaom kaom dahlau, dalam saong hadei tết nguyên đán dalam tỉnh, abih di nyu nan lac dom bhum pandiak bhang, bhum ceik, bhum bhap bini gaok ralo kan kandah. Tukvak tani tanat yaom kaom meng ini tal abih harei 15/3/2016.

# Tui kuhria dahlau vaktu uan raok thun bahrau 2016 meda hu labaih 40.000 mbang tuai damuai mai Phan Thiết rivang ma-in saong padeih padei, meng akaok bilan 12, tỉnh Bình Thuận hu peih ngak ralo jalan piah khik hu siam mekre saong grap tanat yaom kaom piah pachreih tuai damuai. Tui nan, dom gah: Công an,  Chi cục Khik iek darak pasar bhian pambuak bruk pasang iek ldom labik rivang ma-in piah samar pacang cakak dom bruk ngak suan adat hukum pablei salih, abih di nyu nan lac ngan haong dom labik praong hu rilo tuai damuai yau bal Phan Thiết, bal sit La Gi..v..v..

# Kapul daong urang joh jo, uranaih metui medhua saong urang ruak kan kathaot tỉnh Bình Phước barau peih bruk alin hadaih 3 baoh sang anit ranam ka 3 baoh saoh sang daok di dom huyện Bù Đăng, Bù Gia Mập saong Phú Riềng. Ini lac dom baoh sang gaok kan kandah, daok sang taik tahak, oh hu taneh ngak mbang. Yaok baoh sang anit ranam hu padang ngak yaom jien 40 triệu đồng hu rik daong ka dom baoh sang hu labik daok siam jang saong kuhria caga uan rok tết anek sak kara 2016.

# Xã Thành Hải (bal Phan Rang - Tháp Chàm, tỉnh Ninh Thuận) bahrau taduan mek harak pok brei angan lac xã mek hu chuẩn negar ka bruk padang ngak palei pala bahrau. Thành Hải nan lac xã hu ralo urang Cam daok. Ini lac xã akaok meti di tỉnh ngak hu taong abih19 tiêu chí padang ngak palei pala bahrau. Urak ini jien mek tame kuhria rah tapa yaok akaok manuac di xã hu 31 triệu đồng sa thun, baoh sang kathaot daok tok 2,41%. Meng thun 2011 tal ini,  Thành Hải jak ba hu jaik 10 tỷ đồng meng dom nguồn lực piah padang ngak bahrau saong pasiam dom công  trình  hạ  tầng  yau điện, jalan, sang bac, balai y tế, sang ilamo, jalan ba aia.v..v..

# Piah pasiam jalan điện palei pala saong daong dom xã peih ngak tiêu chí điện dalam padang ngak palei pala barau, thun 2015, công ty điện lực Vĩnh Long buh tame 159 tỷ đồng padang ngak dom dự án, công trình praong ba điện negar mai bhum palei pala. Dự án  ngak salah bloh hu pabak điện ka 2.862 baoh sang bhap bini, patagok baoh sang hu điện dalam tỉnh labaih 99% saong pabak bruk pandar điện piah ngak mbang ka bhum palei pala

# Dalam tuk Tết dương lịch 2016, tui kuhria manuac urang di Bến radaih miền Tây, Bến xe miền Đông meda tagok meng 30 - 40% dut haong dom harei karei, dom doanh nghiệp pajeng ba Bal raya Hồ Chí Minh hu pataom taong abih radaih angaok dom tuyến tame nduac. Dalam 3 harei, 1, 2 saong 3/1/2016, Pasak Khik iek saong Điều hành pajeng ba tuai damuai công cộng jeng meda patagok jang radaih buýt di dom tuyến nao tal dom labik rivang ma-in yau Suối Tiên, Đầm Sen, Đại Nam (Bình Dương) …Pak bến phà Cát Lái, meda ba tame pandar 250 chuyến phà đôi, tagok 80 chuyến dalam harei dalam tukvak Tết dương lịch.

Patui di ini dom khaw tin dunya:

# Harei 31/12, Ngoại trưởng Malaysia A-ni-pha A-man hu panuac lac, cộng đồng hiệp hội dom taneh ia Đông Nam Á  (cộng đồng ASEAN) hu padang tagok, tapa nan brei mboh kadha praong dalam sajarah dak rai ASEAN. Công đồng ASEAN mek bhap bini ngak pasak njauk yau angan di thun puac di abih tuk ASEAN yam tal cộng đồng chung, nan lac “bhap bini di kol drei, cộng đồng di kol drei, meta maong di kol drei”.

# Akaok bal Paris ( Pháp) An I-đan-gô brei thau, piah khik kajap an ninh ka melam giao thừa thun ini, bal ine Paris meda taduan raok thun bahrau 2016 meng sa van ngak adat mbuan mbiah. Tuai damuai mai rivang ma-in saong bhap bani Paris jeng daok hu dom tukvak uan raok thun bahrau angaok jalan mekre abih di negar Pháp Xăng Ê-li-dê (Champs-Elysees), min oh hu danak dak biểu diễn prong saong oh hu danak dak cuh pháo bingu. Taong abih pandap menyum hu cồn oh brei ba tame labik quảng trường.

# Gah y tế TQ brei thau lac bahrau hu sa urang njom cúm menuk ada H5N6 di menuac dalam ban Thâm Quyến, tỉnh Quảng Đông, gah meraong taneh ia ini. Urang ruak nan lac kamei, umo 26 thun, urak ini ruak biak trak saong daok hu iek ruak di sa sang iek ruak di tỉnh. Dom chuyên gia y tế brei thau ini lac bruk cá biệt, kayua bruk njom vi rút menuk ada H5N6 di tukvak ini lac biak biar. Kuhria tal urak ini, TQ hu 4 urang njom cúm menuk ada H5N6 di menuac. Dahlau di nan, taneh ia ini hu 2 urang njom ruak di thun 2014 saong sa urang njom ruak di akaok thun ini. 3 dalam 4 urang njom ruak cúm menuk ada H5N6 jeng metai bloh./