Khaw tin 19h harei  3/8 saong 6h30 harei 4/8/2015  

# Di pasak Y tế Quân dân y huyện pulao Lý Sơn, tỉnh Quảng Ngãi, Kapul y bác sỹ sang iek ruak 199 hu iek ruak, tacei jalan iek ruak saong brei jru saoh ka 200 sang sarak karja, urang kathaot, urang taha  daok sa drei di pulao. Đại úy, bác sĩ Võ Thị Hồng Hướng, Phó Khoa vật lý trị liệu – Phục hồi chức năng brei thau, kapul ba tui dom jamraik barau gam saong dom y, bác sĩ rilo alamu tabiak pulao tacei pato tapak , daong urang ruak pandar dom pandap  tập trị liệu saong ngak dom bài tập pak di labik, njauk saong rilo janih ruak.

/ UB bhap bini huyện bhum glaong A Lưới, tỉnh Thừa Thiên – Huế barau peih bruk padang ngak saong pasiam veik sang bac brei ka bản Cô Tài-A Đên, huyện Sá Muội, tỉnh Salavan, taneh ia Lào. Tui nan, huyện A Lưới hu daong 500 triệu đồng ngak barau 2 duk bac saong pasiam veik dom duk bac klak,  khut di bản Cô Tài – A Đên. Tui kuhria hu ngak salah bloh di bilan 9 thun 2015, piah daong palagaih ka dom anek saih di puk palei hu labik bac daa siam jang di thun bac barau.

# Dom gah chức năng di tỉnh Phú Yên baru pambuak bruk nao pasang iek, mboh sang amuk Cao Thị Kim Phượng daok di palei Tân Long, xã An Cư, huyện Tuy An daok bơm tạp chất tame hadang piah teik trak jang. Cơ sở ini ngak bruk meng livik mai min oh tut angan pablei salih. Drei hadang hadei di tuk bơm tạp chất hu ba nao pablei ka rilo quán mbang, nhà hàng di dom tỉnh Phú Yên, Khánh Hòa, Bình Định.

/ Piah daong mikva bhum pandiak bhang di tỉnh Ninh Thuận tani tanat rai diuk, tập đoàn Viettel hu nao alin hadaih 1 tỷ 700 triệu đồng dalam nan hu 19 tấn pandap mbang menyum saong 800 triệu đồng jien ka 1.600 baoh sang kan kathaot dalam tỉnh. Langiu jien 500 ribau đồng sa paok, mikva kan kathaot daok hu alin hadaih dom pandap mbang menyum yaok harei.

# Ngak tui harak ka 36/2013/QĐ-TTg di rajaei, meng bilan 9/2015, tỉnh Gia Lai hu daong yaok bilan 15 kg brah, daong dalam 5 bilan ka yaok anek saih. Urang hu taduan mek lac anek saih sang bac pakat sa saong sang bac pakat dua daok bac di sang bac bangsa bán trú, dom sang bac hu bruk ngak mbang kinh tế-xã hội biak kan kandah, anek saih bangsa takik hu amaik ame atau urang raong hu hộ khẩu daok di bhum biak kan kandah…dalam tinh. Uy mban bhapbini tinh tacei pato dom Jabat pato megru, dom sang bac samal ba brah tal tangin anek saih dahlau si tame thun bac barau ( 2015 -2016).

/ Ngak tui quyết định 29 di thủ tướng rajaei ka bruk daong taneh daok ka bhap bini bangsa takik, meng thun 2013 tal urak ini, tỉnh Trà Vinh hu labaih 2.000 baoh sang bhap bini bangsa takik hu mbang tui sarak ini. Hu labik daok tani tanat nan lac jalan siam di abih piah mikva kham merat yam tagok truh kan kathaot.

# Di pasak ilimo huyện Côn Đảo, tỉnh Bà Rịa Vũng Tàu barau rah tabiak var taom gaok daoh tamia di kapul daoh tamia xung kích sang bac ilimo Nghệ thuật Quân đội, urang jakar – urang lin bhum cảnh sát tasik 2 saongbol bala, bhap bini di pulao. Labaih 20 tiết mục gheih pok meyaom hatai anit ranam taneh ia, tasik pulao. Thượng úy Nguyễn Anh Quốc- akoak Trung đội Đại đội 42, Tiểu đoàn Bộ binh- Ban Chỉ huy quân sự huyện Côn Đảo, tỉnh Bà Rịa Vũng Tàu brei thau : tapa dom kadha daoh Cách mạng, pok meyaom urang in, abih di nyu nan lac dom urang lin di tasik pulao…kol dahlak mboh hadah mbaok saong mboh biak drut drui. Kol dahlak yau hu pabak pren khang piah kajap tangin phao khik caga tasik pulao di negar

Patui di ini dom khau tin dunya:

/ Mỹ barau buh gac 65 triệu đô la daong pandap mbang menyum ka dom urang gaok kan kandah kayua srau kadau di Xyri jeng yau urang tị nạn Xyri di dom taneh ia jaik taphia. Jabat iek gah bruk patagok dunya di Mỹ brei thau, yaom jien ini hu rik daong tapa danak dak lương thực dunya. Meng yaom jien ini, danak dak lương thực dunya meda khik hu dom bruk ngak piah daong ka jaik 4 triệu urang di Xyri saong jaik 1 triệu 600 ribau urang Xyri tị nạn di Gioócđani, Libăng, Thổ Nhĩ Kỳ saong Ai Cập.

# Danakdak padai brah dunya daok parabha pandap panda ye : tapung, ritak saong menyek mbang ka jaik 340 rabau urang Yêmen di  8 labik di ban cảng gah meraong Ađen, lac dom labik gaok kan kandah trak abih kayua srau kadau. Tui panuac khan di dankadak pandap mbang menyum dunya, dom pandap mbang menyum pandar hu dalam dua bilan hu ba tal 8 labik dalam nan hu Mua-la, Man-xua-ra, Cra-tơ, Đa Sa-át.

/ Gah y tế dunya brei thau bruk meda yam tal patagok sa vacxin  pacang hu Ebola. Yaom lac daok hu dom ngak iek tra min vacxin VSV-EBOV hu ngak iek di Ghi-nê meng bilan 3 meng bloh daok ba mai rilo siam lagaih. Labaih 4 ribau urang mbuan njauk ruak hu klauk vaxcin ini hadei di tuk taom gaok dom urang njom ruak./.