khaw tin 19h harei 6/5 saong 6h30 harei 7/5/2015

# Ngan saong kadha “Hội tụ tinh hoa - lan toả nụ cười”, Carnaval Hạ Long 2015 meda rah tabiak di melam 8/5 di jalan Hoàng Quốc Việt, phường Hùng Thắng, ban sit Hạ Long, tỉnh Quảng Ninh. Tapa 8 mbang peih ngak, Carnaval Hạ Long hu jeng sa angan karei di Quảng Ninh. Tal tukvak ini, dom bruk kuhria caga maong ye ngak blaoh. Ban sit Hạ Long daok cang ka melam roya di dom cambuai klao. 

/ Tukvak jaik di ini, di ralo tỉnh, ban jeng daok hu uranaih ruak patuk biak avar, tuk barau ndih tapui tabiak meng 2 tal 4 bilan. Ralo uranaih njauk ruak kayua oh hu klauk vacxin pacang cakak ruak ginup saong klauk oh njauk lịch. Piah pacang cakak ruak ka uranaih, cục y tế dự phòng mintri y tế hu panuac kakei : dom amaik ame brei ba anek nao klauk vacxin pacang cakak ruak patuk jrum ka sa pak di tuk uranaih ginup 2 bilan. Uranaih ndih tapui tabiak brei hu klauk vacxin viêm gan B dalam 24 tuk camereip piah pacang ruak viêm gan B. 

# mBan peih ngak danakdak Nghĩa tình Trường Sơn Báo Sài Gòn Giải Phóng pambuak bruk saong Bộ Chỉ huy Bộ đội Biên phòng tỉnh Thừa Thiên - Huế saong karja huyện A Lưới, tỉnh Thừa Thiên - Huế barau peih pakak saong ba tame pandar Trạm quân dân y xã A Đớt. Trạm quân dân y xã A Đớt  peih tabiak piah duh bruk iek ruak ka labaih  400 sang gam saong labaih 2.200 urang di xã A Đớt saong yaok rabau bhapbini dom xã jaik taphia saong bhapbini labik biên giới taneh ia Lào. 

/ Bilan đông xuân 2014 – 2015, tỉnh Phú yên trun pajaih hu labaih 26.000 ha. Urak ini lac tuk tame bilan yuak padai, rilo puk palei di tỉnh Phú Yên hu daong blei padai ka mikva urang ngak nong. Di huyện Tây Hòa hu pambvuak bruk saong doanh nghiệp blei padai pak di hamu samu saong yaom padai thu di darak pasar. Amuk Võ Thị Nga, daok di xã Hòa Đồng, huyện Tây Hòa, tỉnh Phú Yên brei thau: Lagaih ka drei nan lac yuak abih tame bao mbiah ka drei drei cang pablei min, jeng lagaih ka drei yuak pablei nyu oh gaok kan kandah. Meyah padai nyu jaleih yau ini bo oh hu mac yuak drei duh hatai, drei nao ieu menuac mai yuak, urang ndok du halei drei bayar du nan. 

# Sa mbang hajan praong gam saong cakala dui atah labaih 1 tuk tuh trun ban sit Buôn Ma Thuột, tỉnh Đắc Lắc saong dom bhum jaik taphia. Angin khang rah tabiak dalam luac tukvak ini. Hadei di tuk padheih jaik 1 tuk gilac hu sa mbang hajan patui di nan,  min hajan sit jang saong oh dui atah. Tui kuhria mboh di dom urang chuyen mon, dom mbang hajan ini daok brei thau lingik oh siam lagaih tuk bo tua riya daok ngak khat lahik trak ka bruk pala drak saong raidiuk di bhapbini pak ini. 

/ UB bhap bini tỉnh Kiên Giang brei adat ngak barau dua kapal tasik nan lac kapal Thổ Châu 09 - Phú Quốc saong kapal pajeng tuai jalan Hà Tiên - xã pulaoTiên Hải, tui yaom jien abih tih 80 tỉ meteh meng kadung jien Trung ương daong, tukvak ngak dalam 2 thun (2015-2016). Kapal Thổ Châu 09 tah 36m, glaong 3m, trọng tải 25 tấn. Kapal tuai tuyến Hà Tiên tah 27m, glaong 2m3, trọng tải labaih 11 tấn. 

# Di labik công nghiệp Tân Hương, huyện Châu Thành, tỉnh Tiền Giang, Liên đoàn Lao động  tỉnh Tiền Giang barau peih tabiak bruk “ bilan urang ngak” thun 2015. Tui nan, bilan urang ngak dom pakat cong doan dalam tinh peih rilo bruk ngak pamaong ka cơ sở, iek glang urang ngak ngan saong dom bruk siam ye : pakacah duah thau adat cong doan, alin pandap, alin baok sang cong doan, alin radio ka urang ngak saong yaom jien abih tih 345 triệu đồng. 

Patui di ini dom khau tin dunya:

/ Tập đoàn năng lượng Nga Gát-prôm njauk hatai trun yaom pablei khí đốt ka TNK hadei di ralo bilam ginum meyai. Dua gah njauk gauk brei trun yaom,  meng 374 đô la 1 ribau m3 khí đốt daok 300 đô la 1 ribau m3 khí đốt quý 1 thun ini. Tapa quý 2 yaom trun daok 260 đô la. Yaok thun, Nga pablei ka TNK jaik 10 tỉ m3 khí đốt, eng thun 2014 nan lac 27 tỉ 300 triệu m3. 

# Sa urang metai saong takik abih 14 urang lahik tuk glut taneh rah tabiak di sa palei daok di tỉnh Tây Gia-va di Inđônêsia. Karja Inđônêsia brei thau, haluk gluh tuh trun 8 baoh sang di palei Ma-ga-múc-ti, daok di ban Ban-đung, bang Tây Gia-va. Kapul cứu hộ hu ba sa urang njauk bala tabiak truh labik jaleih di baoh sang. 8 urang karei bi thuong jeng hu ba nao tal sang iek ruak jaik abih piah cấp cứu. 

/ Urang y tế dunya saong puk palei peih bruk klauk pacang sởi ka uranaih di Cát-man-đu, Nê-pan. Hadei di mbang megei baoh taneh harei 25/4, yaok ribau urang njauk ndih langiu  lingik dalam dom lều trại. Bruk ini mbuan ngak brei tamuh dom jit ruak njom mbak kayua labik daok oh hacih sa-at, hu ralo uranaih. Ong Ken Pết, urang brei panuac di Qũy Nhi đồng Liên hợp quốc di Nê-pan brei thau: kol dahlak klauk jru pacang ka uranaih kayua ruak sởi mbuan njom mbak ngan saong dom urang khang kajap./.