# Taduan panuac daa di Thủ tướng Raja-ei negar Cộng hòa Dân chủ Bhap bani Lào Thoong-xỉnh Thăm-mạ-vông (Thongsing Thammavong), Thủ tướng Raja-ei negar Cộng hòa xã hội chủ nghĩa Việt Nam Nguyễn Tấn Dũng meda ba akaok kapul urang lambaok pakat glaong tapa rivang saong ngak bruk pak Lào dalam dua harei 13 saong 14/9/2015.

# Jaik 240 tỷ đồng nan lac yaom jien huyện Mường Nhé, tỉnh Điện Biên  hu buh brei piah peih ngak dom danak dak, dự án meng kadung jien dalam sarak 30a di rajaei dalam labaih 5 thun tapa. Gam saong dom kadung jien karei, huyện hu daong ngak sang daok, pato pakai urang jakar saong ba bruk ngak ka urang ngak palei pala; taphia di nan daong brei phun pajaih, anek pajaih, vật tư, pandap ngak mbang, pandap pandar dalam sang… Tapa nan, baoh sang kan kathaot di huyện hu patrun, meng labaih 65% thun 2009 trun daok ala 50%. 

# Sở Y tế Hà Nội brei thau, urang njauk ruak pandiak tabiak darah pak Hà Nội hu rilo dalam bilan 7, bilan 8 saong jeng daok mbuan hu rilo jang. Kuhria tal harei ini, dalam bal hu 1.537 urang njauk ruak pandiak tabiak darah di 29 dalam 30 quận, huyện, dang ka 6 dalam negar, rilo jang labaih 3 mbang dut haong tukvak ini thun dahlau. Piah pacang jit ruak pandiak tabiak darah meda hu ralo di anak tal, Sở Y tế Hà Nội hu jalan ngak cambaih laih dalam bruk vệ sinh môi trường, dhul pataom hareik hareim, puh ramik haci hacih… piah daong pacang cakak jit ruak tamuh tabiak.

# Tapa pasang iek radaih nao tapa pabah mbang negar dunya Bờ Y, tỉnh Kon Tum, gah chức năng hu duah mboh saong cap mek radaih ô tô pajeng tuai biển kiểm soát 82B-001.86 kayua ong Lâm Văn Ánh (daok di ban sit Plei Kần, huyện Ngọc Hồi, tỉnh Kon Tum) peih, angaok radaih hu pajeng 19 hợp pháo (medil lac phao patuh) trak abih tih 35 kg, tauk angan Happy Boom  mai meng TQ. Dom pháo ini hu pajeng lậu meng Lao mai VN. Hadei di tuk duah mboh saong cap mek, chi cục Hải quan pabah mbang dunya Bờ Y hu jao menuac saong radaih gam saong pandap ka Đồn biên phòng pabah mbang dunya Bờ Y langyah tui quy định di hukum.

# Karja saong gah chức năng huyện Đạ Tẻh, tỉnh Lâm Đồng daok kham merat daong ka bhap bini pasiam veik dom khut khat kayua ngin ribuk rah tabiak di biar harei 7-9. Labaih 200 baoh sang di bhap bini labik ngin ribuk khut jaleih, dalam nan hu 150 baoh sang khut trak, 3 baoh sang jaleih abih, 2 sang bac par tabung, jaleih jaik 20 ghang điện trung saong  hạ thế; yaok pluh hec-ta phun pa-ok blait, cao su saong dom janih phun mbang baoh tabuac gha. Ong Phạm Ngọc Anh Tuấn, Phaok akaok Ủy ban Bhap bani huyện Đạ Tẻh, tỉnh Lâm Đồng lac: Sang halei tapeih tabung, jaleih ye drei pacang veik, ngak veik kajang ka mikva daok.. Pandap mbang ye jao ka Jabat Lao động thương bi xã hội nao pasang iek, sang halei kurang pandap mbang, pasah abih oh hu brah mbang ye daong brei chip ka mikva. Daok urang njauk rambuis ye hu 6 urang, dalam nan hu sa urang njauk trak hu ba tagok Sang iek ruak Chợ rẫy kayua daok atah nan ye huyện oh ka nao rivang hu, dom urang daok jaik ye anak meta hu huyện daong meng 500 ribau đồng tal 1 triệu đồng sa urang piah mikva blei jru cavao.

# Pambuak tal sruh kapal ikan patuh di langiu tasik atah di Phan Thiết 200 hải lý di sabuh 6/9 meng bloh, biar harei 8/9, 15 urang tabiak truh bala hu mai tal pulao Phú Quý. Urak ini daok hu sa urang lahik angaok tasik. Dalam 15 urang tabiak truh bala, hu saai Nguyễn Văn Thương (umo 20 thun), lac njauk rambuah trak kayua patuh kapal. Dua gah takai di saai pandung trak, urak ini daok iek ruak di sang iek ruak quân dân y Phú Quý. Mesup harei 9/9, gauk gar hu ba saai Thương tame Phan Thiết iek ruak. Pren yava di dom urang karei hu tani tanat tuk  mai sang.

# Biar harei 8-9, Phòng Cảnh sát điều tra saong pacang cakak tội phạm gah trật tự xã hội, Công an tỉnh Tây Ninh hu peih bruk pasang iek quán Sky Win pak labik 11, jalan Võ Văn Truyện, phường 2, ban sit Tây Ninh, tỉnh Tây Ninh duah mboh saong cap khik ralo urang daok me-in game cuh ikan piah ngak ka nyu cambaih laih bruk taong bạc. Tui gah chức năng, labik ini hu peih tabiak meng thun 2014 tal ini; tukvak peih ma-in dui atah luac harei melam. Yaok urang ma-in pak ini hu mbang atau lah biak rilo jien, yaok urang meda mbang atau lah meng dom rituh ribau đồng tal jaik 100 triệu đồng sa harei. Urak ini gah chức năng daok pasang iek cambaih laih bruk ini.

 Patui di ini dom khau tin dunya:

# Thủ tướng Ba Lan Ê-oa Kô-pắc brei thau, taneh ia ini meda taduan rilo jang 2000 urang tị nạn hu sanya di bilan 7 min daok iek tui bruk di taneh ia. Dalam mbang ndom biai tapa phon saong thủ tướng Đức An-giê-la Méc-ken  sa harei dahlau nan, amuk Kô-pắc  jeng ndom lac an toàn di bhap bini Ba Lan nan lac bruk praong dang akaok di rajaei, saong bruk daong ka urang tị nạn njauk iek tui pren di taneh ia.  

 # Sa mbang ribuk cuah prong nao tapa labik Trung Đông ngak ka dua urang metai saong yaok rituh urang njauk tame sang iek ruak kayua kan suak yava. Ribuk cuah prong ngak tabiak tal dhul kanjik me-om bak ralo labik pak Libăng, Xyri, Gioocđani, Ixraen saong Ai Cập ngak ka ralo sang bac njauk kareik pabah mbang, ralo mbang par njauk padeih veik. Bhap bani hu panuac kakei njauk daok veik dalam sang atau cuk khẩu trang tuk tabiak langiu piah plaih dhul.

# Sa sruh kapal haok Boeing 777 di hãng kapal haok Anh khuah angaok jalan băng tuk daok caga par tagok di mblang kapal haok Lát Vê-gát, Mỹ. Sruh kapal haoh số hiệu 2276 di hãng kapal haok Anh hu lịch par tuk 16tuk harei 8/9 tui mong puk palei piah tal mblang kapal haok Gát-guých  di Luân đôn. Tal 16 tuk 13 minit tuk daok nduac angaok jalan băng caga par, baoh jamriak gah  ieu di kapal haok nyu khuah, nan ye tui damuai njauk tabiak truh kapal haok meng jalan trượt chip./.