# Hội văn học nghệ thuật tỉnh Hà Giang urak ini hu labaih 180 urang, sinh hoạt pak dom Chi hội chuyên ngành saong Tổ hội cơ sở dom huyện, bal. Thun 2015, Hội hu peih ngak siam ralo mbang pakacah yau: “paneh ariya ka uranaih”; “Pren diuk angaok cao nguyên patau”. Dom hội viên hu mbaok tame paneh labaih 1.700 tác phẩm dalam nan hu ralo janih yau: Văn xuôi, tiểu thuyết, ariya, thaot binguk, văn học bhap bani saong  spaneh dua-dua sap văn học bangsa takik.

# Tui QĐ di mintri Y tế, meng harei 1/3 thun ni, jiak 1900 dịch vụ iek ruak, kỹ thuật y tế brei ramik veik yaom tui jalan tagok 30%. Min di tỉnh Phú Yên, dom dịch vụ y tế oh ka hu tacei tabiak cambaih laih dalam thông tư 37 yau nan ye gah y tế Phú Yên oh ka brei tagik yaom. Amuk Nguyễn Thị Mộng Ngọc, Giám đốc Sở Y tế Phú Yên brei thau: Dalam thông tư 37, dom paka halei cambaih laih ye ngak tu, bruk halei oh ka tantu ye kuhria tui yaom klak piah cang harak harak tacei cambaih laih. Tuk peih ngak ye hu rilo bruk mblo tabiak, brei hu harak tacei pato cambaih laih jang.  

# Harei 14/3, Ủy ban bhap bani tỉnh Ninh Thuận tabiak panuac lac bala tua riya pandiak bhang rah tabiak dalam tỉnh meng harei 1/3/2016 pak dom puk palei dalam tỉnh. 6 huyện njauk pambak khang nan lac: Ninh Hải, Ninh Phước, Ninh Sơn, Thuận Bắc, Bác Ái saong Thuận Nam. Dalam nan hu dua huyện Bác Ái saong Thuận Nam njauk pambak khang di abih.

# Dahlau di nan, Ủy ban bhap bini tỉnh Bình Thuận  jeng hu tabiak panuac lac bala “ Pandiak bhang” vụ Đông Xuân 2015-2016 rah tabiak dalam tỉnh. Tỉnh BT njauk cakak trun labaih 15.400 héc-ta padai Đông Xuân. Labaih 1.400 ha phun yaok thun njauk khat lihik. Ia khik piah dalam dom krong ribong dok jaik 88 triệu khối min,  samu 41% dung tích thiết kế. Ia nduac di angaok ribong krong, chraok trun khang, rilo krong thu ia ngak kan kandah tal bruk pala drak song ngak mbang ngak huak di bhap bini dalam tỉnh.

# Dom gah chức năng tỉnh Tiền Giang daok pah sà lan pajeng aia taba meng bal Mỹ Tho mai brei ka huyện pulao Tân Phú Đông. Tui nan, sà lan ini meda pataok padang angaok kraong Cửu Tiểu saong mbeim mek aia tame hệ thống kavei di balai ba brei aia Phú Thạnh, huyện Tân Phú Đông meng ini tal abih bilan 4 thun ini. Balai njuk ba aia ini hu xử lý aia saong mbeim mek aia tame ống piah ba brei ka 3.000 baoh sang labik xã daok atah halau aia di pulao kaoh ini nan lac Phú Đông, Phú Thạnh. Tui kuhira, jien buh tame ka bruk pajeng ba aia meng sà lan tal labik pulao kaoh jaik 13,5 tỷ đồng ngan haong 430.000 mét khối aia taba.

# Meng bloh, di sang bac Đại học Trà Vinh, yaok ribau anek saih tal 12 hu mbaok tame “ Harei pataom tuk hulin umo 18 song danak dak langyah pathau khan palih ruah jalan bac megru thun 2016”. Tapa nan, dalam jiak 40 panuac tangi sua mboh rilo lac tangi sua tal bruk ngak hadei di tuk bac tamat song dom khối Y dược, Sư pham song Luật hu anek saih sangka rilo di abih. Dom amaik ame song anek saih ndom lac gah luật mbuan likau tame ngak bruk karja, Y dược mbuan duah bruk ngak, dalam tuk gah Sư phạm hu rilo ưu đãi. Min hatai sahaneng ni nyu cagar veik bruk caong pilih ruah urak ni.

# Harei pataom chat apui meng kan di urang Pà Thẻn, xã Hồng Quang, huyện Lâm Bình, tỉnh Tuyên Quang, pachreih hu yaok ribau urang mai mong iek. Tui hatai saneng di urang Pà Thẻn, apui hu mong yau sa po yang ginreih ba mai ka bhap bani rai diuk trei sil haniem phol, hu ginup pren khang piah patuak ruak hakik pandika harao... Langiu di adat chat apui di urang Pà Thẻn, mikva dalam xã daok hu daoh tamia, me-in padhih… Harei pataom chat apui lac  ilamo biak karei saong ndung bak ilamo meng kan mai di bangsa Pà Thẻn pak xã Hồng Quang.

Khaw tin dunya:

# Jien piah pacang bruk khủng hoảng urang nhập cư di Hy Lạp meda tapa yaom 600 triệu -rô (670 triệu đôla) tui kuhria mboh dahlau deih, kayua dak harei dak hu rilo urang di cư song tỵ nạn njauk dok veik negar ni . Panuac ni hu ba tabiak dalam tuk urak ni hu labaih 41 ribau urang di cư song tỵ nạn dok gar veik di Hy Lạp, kayua bruk paduan nao tal dom taneh ia kaya meda gah barak di urang tỵ nạn njauk pacang cakak veik kayua bruk kreik pambah mbang negar di dom taneh ia Ban-căng.

# Urang jakar Ấn Độ brei thau, harei 13/3, takik abih 5 uranaih metai saong 5 uranaih karei lahik hadei di tuk sa sruh gilai pajeng 13 uranaih nyu tabaleik pak bang Bi-ha (Bihar), gah Pai negar ini. Sruh gilai tabaleik pak labik jaik palei Cum-ha Xang (Kumhar Sang), huyện Bê-gu-xa-rai (Begusarai), atah bal Pát-na (Patna) - pasak di bang Bi-ha (Bihar) 121km gah pai. Tok hu 3 ranaih daok diuk caluai tame ar dalam tuk cảnh sát sraong  hu takik abih 5 urang metai. Urang jakar puk palei jeng daok jhul pakhang bruk cứu hộ piah duah 5 uranaih daok lahik.

# Harei 13/3 sa urang kumei lac gru pato urang Palétxtin angan Ha-nan En Hu-rúp (Hanan Al Hroub) mek hu giải thưởng prong abih di gah pato megru menuac  sia dunya  lac “ Gru pato naih joi abih di dunya” di thun 2016. Tapa nan, amuk -nan En Hu-rúp taduan hu pok jien thưởng tagok tal 1 triệu đô la Mỹ. Dahlau di nan, hu jaik 8 ribau urang di dunya hu ba angan tame pilih ruah pok brei giải thưởng prong glong ni. Amuk Ha-nan En Hu-rúp  hu yam tapa dom urang dalam top luac di abih di giải thưởng, mai meng dom negar Pakítxtan, Kê-ni-a, Anh, Mỹ, Nhật Bản, Phần Lan, Ôxtrâylia song Ấn Độ./.